ރާއްޖެއިން އުމްރާއަށް މީހުން ގެންދިއުމުގެ އުސޫލާ އެއްގޮތަށް އަމަލު ނުކުރި 19 ކުންފުންޏެއް 5000ރ. އިން ޖޫރިމަނާކުރަން ނިންމާފައިވާ ކަމަށް އިސްލާމިކް މިނިސްޓްރީން ބުނެފި އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އުމްރާއަށް މީހުން ގެންދިއުމުގެ އުސޫލާ ހިލާފުވެފައިވާތީ އެ ކަންކަމުގެ ކުޑަބޮޑު މިނަށް ބަލައި 19 ކުންފުންޏެއް ޖޫރިމަނާކުރަން ނިންމާފައިވާ ކަމަށެވެ. އެކަމަކު އެއީ ކޮން ކުންފުނިތަކެއް ކަމެއް އަދި އާންމެއް ނުކުރެ އެވެ.
ޝަހީމް ވިދާޅުވީ އުމްރާއަށް މީހުން ގެންދިއުމަށް މިނިސްޓްރީން ދިފައިވާ ރަސްމީ ލައިސަންސް ދައްކައިގެން އުމްރާއަށް ފުރަން ކަމަށް ހަދައި އެމްއެމްއޭ އިން ޑޮލަރު ނަގައި އުމްރާއަށް ނުދާ ކުންފުންޏެއް ވެސް ފާހަގަވެފައިވާ ކަމަށެވެ.
އެ މައްސަލަ އިތުރަށް ބަލައި އެކަން ސާބިތުވެއްޖެ ނަމަ، އެ ކުންފުނި 30،000ރ. އިން ޖޫރިމަނާކޮށް ހުއްދަ ހިފަހައްޓާނެ ކަމަށް ޝަހީމް ވިދާޅުވި އެވެ. އަދި އެ މައްސަލަ ތަހުގީގުކުރަން ފުލުހަށް ވެސް ފޮނުވާނެ ކަމަށް ވިދާޅުވި އެވެ.
ޑޮލަރު ދޫކުރާނީ ފުރުމުގެ ޓިކެޓާއި ޑޮކިއުމެންޓްތައް ހުށަހެޅުމުން ކަމަށާއި އެހެންވެ، ފޭކު ޑޮކިއުމެންޓް ހުށަހެޅިކަމަށް ތުހުމަތުކުރެވޭ މައްސަލަ ބަލައި ފިޔަވަޅު އަޅަން ޕޮލިހަށް ހުށަހަޅާނެ ކަމަށް ޝަހީމް ވިދާޅުވި އެވެ.
ޝަހީމް ވިދާޅުވި ގޮތުގައި އުމްރާއަށް މީހުން ގެންދިއުމުގައި އަމަލުކުރަން ގެޒެޓްކޮށްފައިވާ އުސޫލަށް އަމަލުނުކުރާ ހުރިހާ ކުންފުންޏަކަށް ފިޔަވަޅު އަޅާނެ އެވެ.
އުމްރާ އުސޫލާ ހިލާފުވި ގިނަ ކުންފުނިތަކަކަށް ފިޔަވަޅު އަޅާފައި މިވަނީ މިދިޔަ ޑިސެމްބަރު މަހުގެ އުމްރާއަށް އަލް-ހިޖްރަ ޓްރެވެލްސް އެންޑް ޓުއާސް އިން މީހުން ގެންގޮސް ހާލުގައި ޖެއްސި މައްސަލައެއް ފެންމަތިވި ފަހުންނެވެ.
މިދިޔަ މަހުގެ އުމްރާއަށް އުމްރާވެރިން ފައިސާ ދެއްކިޔަސް، އެ ފައިސާ އިން އުމްރާވެރިންގެ ދެކޮޅު ޓިކެޓް ހަމަނުޖައްސައި، އެހެން ކަމަކަށް އެ ފައިސާ ބޭނުންކޮށްފައިވާ ކަމަށް އެ ގްރޫޕުން އިއުތިރާފުވެ އެވެ.
އެ މައްސަލާގައި މިނިސްޓްރީން ވަނީ ހިޖްރަ ގްރޫޕް އެއް ލައްކަ ރުފިޔާ އިން ޖޫރިމަނާކޮށް އަދި ހުއްދަ ބާތިލުކޮށްފަ އެވެ. އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާ އަށް މީހުން ގެންދިއުމުގެ ހުއްދަ ނުދޭން ވެސް ވަނީ ނިންމައިފަ އެވެ.
ޅ. ނައިފަރުގެ ދެމީހުން ކަމަށްވާ ފިރާގު މުހައްމަދަފުޅާއި މުސްތަފާ މުހައްމަދުފު ޑިރެކްޓަރުންގެ ބޯޑުގައި ހިމެނޭ އެ ކުންފުންޏާ ގުޅޭ މައްސަލަ ފުލުހަށް ހުށަހަޅާނެ ކަމަށް ވެސް މިނިސްޓްރީން ބުނެ އެވެ.
މިނިސްޓްރީން ވަނީ ހާލުގައި ޖެހުނު 23 އުމްރާވެރިން ހައްޖު ކޯޕަރޭޝަންގެ ހަވާލުގައި ހޮނިހިރު ދުވަހު ހެނދުނު ރާއްޖެ ގެނެސްފަ އެވެ. މިނިސްޓްރީން އެޅި ފިޔަވަޅުގެ ތެރޭގައި އެމީހުން ގެނައުމަށް ދައުލަތުން ކުރި ހަރަދު އަނބުރާ ހޯދުން ހިމެނެ އެވެ.