ވޭސްޓް މެނޭޖްމަންޓް ކޯޕަރޭޝަން (ވެމްކޯ) ގެ ކުނި މެނޭޖްކުރާ މަރުކަޒުތަކަށް ކުނި އުކަން ނަގަމުންދާ ގޭޓް ފީ ކުޑަކުރަން ނިންމައިފި އެވެ.ވެމްކޯ އިން ކުރި އިއުލާނެއްގައި ބުނީ އެ ކުންފުނިން ރާއްޖޭގެ ސަރަޙައްދީ ސިޓީތަކާއި ރަށްރަށުގައި ފޯރުކޮށްދޭ ޚިދުމަތްތަކުގެ ތެރެއިން، ކުނި މެނޭޖްކުރާ މަރުކަޒުތަކަށް ކުނި އުކާލާ ފަރާތްތަކުން ނަގާ ގޭޓުފީއަށް މިއަދުން ފެށިގެން މުހިއްމު ބަދަލެއް ގެނެސްފައިވާ ކަމަށެވެ.މިގޮތުން، އަމިއްލަ ފަރާތްތަކުން ގޭޓުފީގެ ގޮތުގައި ނެގުމަށް ހަމަޖެހިފައިވާ އަގު ކުނި އުފުލާ އުޅަނދުގެ ރަޖިސްޓަރީކުރެވިފައިވާ ބަރުދަނަށް ބަލައި، ޓަނަކަށް 212 ރުފިޔާއިން ޓަނަކަށް 106 ރުފިޔާއަށް ކުޑަކުރެވިފައިވާ ކަމަށް ވެމްކޯ އިން އިން ބުނެ އެވެ.ވެމްކޯ އިން މީގެކުރިން ވަނީ މާލެ ސަރަހައްދުގެ ޓްރާންސްފާ ސްޓޭޝަންތަކުން ނަގާ ގޭޓްފީ 500 ރުފިޔާއަށް ކުޑަކޮށްފަ އެވެ.ވެމްކޯއިން ދެމުންދާ ޚިދުމަތްތައް އިތުރަށް ފުޅާކުރުމުގެ ގޮތުން ފޮޅާ ސާފުކުރުމުގެ ޚިދުމަތް ފަށަން ވެސް މިއަހަރުގެ މެއި މަހު އެ ކުންފުނިން ނިންމިއެވެ.ވެމްކޯގެ ޚިދުމަތް ފުރަތަމަ ފެށީ 2017 ވަނަ އަހަރުގެ ތެރޭގައެވެ. އޭރު އެ ކޯޕަރަޝަނުން ޚިދުމަތް ދެމުންއައީ ހަމައެކަނި މާލެ ސަރަހައްދުގައެވެ. ނަމަވެސް މިހާރު ކުންފުނީގެ ޚިދުމަތް ފުޅާކޮށް އެ ކުންފުނިން އަންނަނީ ރާއްޖޭގެ ގިނަ އަތޮޅުތަކަކަށް ޚިދުމަތް ދެމުންނެވެ.ކުނި ނެގުމަށް ހާއްސަވި ވެމްކޯގެ ޚިދުމަތް މިހާރު ރިސޯޓުތަކަށް ވެސް އަންނަނީ ދެމުންނެވެ.