މިހާރަކަށް އައިސް ވަރަށް ޒުވާން ޢުމުރުގައިވެސް 2،3 ދަރިން ބަލަންޖެހޭ އެކަނިވެރި މައިން ވަރަށް ގިނައެވެ. އެމީހުންނަށް ދިރިއުޅެންޖެހެނީ ވަރަށް ދަތިޙާލުގައެވެ. އެހެންވެ އެހީތެރިވެދޭނެ މީހަކު ހޯދުމުގެ ބޭނުމުގައި އެމީހުންގެ ބައްޕައާއި އެއް ޢުމުރުގެ މީހުންނާއިވެސް އެބަ ކައިވެނިކުރެއެވެ. 
އެކަނިވެރިކަމުގެ ސަބަބުން ދިރިއުޅެވެން ނެތް ޙާލަތުގައި ޙަލާލު ދިރިއުޅުމެއް އުޅުމުގެ ބޭނުމުގައި އެފަދަ މީހުންނާއި ކައިވެނި ނުކުރާކަށް ނުބުނަމެވެ. ނަމަވެސް ދަރިން ތިއްބައި ޢުމުރުން އެހައި ދުވަސްވީ މީހުންނާއި ކައިވެނިކުރަންވާނީ އެމީހެއްގެ ރެކޯޑްތަކަށް ވަރަށް ރަނގަޅަށް ބަލައިފައެވެ. 
މިވާހަކަ ދައްކަން މިޖެހޭ އެންމެ ބޮޑު ސަބަބަކީ ތިމާގެ ދަރިންހައި ހަގު ކުދިންނާއި ކައިވެނިކުރަން ބޭނުންވާ ގިނަ ބައެއްގެ ވިސްނުމުގައި މައްސަލަތަކެއް ހުރެއެވެ. އެފަދަ ގިނަ މީހުންނަށް އެމީހުންގެ ސިކުނޑި ކޮންޓްރޯލެއް ނުކުރެވެއެވެ. އެހެންވެ އަތުންފައިން ވަރަށް ބޮޑެތި ގޯސްތައް ހެދެއެވެ. އެފަދަ ގޯހެއް ނުހަދައި އުޅެވެނީ އެމީހެއްގެ ކިބައިގައި ރިވެތި އަޚްލާޤީ ސިފަތައް ހުރެފައި، ޚާއްޞަކޮށް ރުޅިމަޑު އަދި ވަރަށް ބޮޑަށް ދީންވެރިނަމައެވެ. 
މިގޮތުން އެންމެ ގިނައިން ކުރިމަތިވާ އެއް މައްސަލަވެސް ބުނެލާނަމެވެ. އެމީހުން އަނބިމިހާ އާއި ވަޤުތު ހޭދަކުރަން ބޭނުންވާ ވަޤުތެއްގައި ދަރިންގެ ކިބައިން އެކަމަށް ހުރަސް އެޅޭނަމަ ރުޅި ގަދަވެއެވެ. ކޮންޓްރޯލްނުކުރެވިގެން ގޮސް ދަރިންނަށް އަނިޔާ ކުރެވެއެވެ. ރެކޯޑަށް ބަލަން މިބުނަނީ މިފަދަ ސަބަބުތަކަށްޓަކައެވެ.
މިވާހަކަތައް އަހުރެން ފާހަގަމިކުރީ މިފަދަ މައްސަލަތައް ޖެހިގެން ފަރުވާ ހޯދަން އަންނަ ގިނަ ބައެއްގެ ކިބައިން މިކަންކަން އެނގެމުންދާތީއެވެ. މިފަދަ ގިނަ މައްސަލަތައް ޖެހުމުން ވަރަށް ގިނަ ބައަކަށް ފަރުވާކުރަންޖެހެތީއެވެ. 
ރަނގަޅު މައަކު ނަމަ ދަރިންގޮވައިގެން ކިތަންމެ ދަތިޙާލުގައި އުޅެންޖެހުނަސް ދަރިއަކަށް އެއްވެސް ދެރައެއް އަދި އެއްވެސް ވަރެއްގެ އަނިޔާއެއް ލިބުމަކަށް ނުއެދޭނެއެވެ. ދަރިންނަށް ދެރަވާނެ ކަމެއް ޤަޞްދުގައި ނުކުރާނެއެވެ. ނަމަވެސް އެކަނިވެރިވެ ދަތިޙާލުގައި އުޅެންޖެހުމުން ޙައްލެއް ހޯދުމުގެ ބޭނުމުގައި ދިރިއުޅުމާއިގެން ކުރިއަށްދާން މަސައްކަތްކުރަން މަޖުބޫރުވަނީއެވެ. 
އަދި އެއްކަންތައް ފާހަގަކޮށްލާނަމެވެ! ދަރިން ތިއްބައިވެސް ޢުމުރުން ހަގު ކުދިންނާއި ކައިވެނިކޮށް ވަރަށް ރިވެތި ގޮތުގައި ދިރިއުޅޭ މީހުންވެސް ތިބެއެވެ. ނަމަވެސް ހިތާމައާއިއެކު ބުނަންޖެހެނީ އެފަދަ މީހުން ވަރަށް މަދު ކަމަށެވެ.
 
- ތަޖުރިބާކާރު ޢިލްމްވެރިއެއްގެ ވާހަކަފުޅުން