މޯލްޑިވްސް ކަސްޓަމްސް އޮފިސަރުންތަކެއްގެ ހިޔާނާތާއި މަނީ ލޯންޑަރިންގެ މައްސަލަތަކެއް ތަހުގީގު ކުރަމުންދާ ކަމަށް ފުލުހުން ބުނެފިއެވެ.
އެކަމާ ގުޅޭ މާ ބޮޑު ތަފްސީލެއް ހިއްސާ ނުކޮށް ފުލުހުން މީޑިއާތަކަށް ފޮނުވި މެސެޖެއްގައި ބުނީ، މޯލްޑިވްސް ކަސްޓަމްސް ސާވިސްގެ މުވައްޒަފުންތަކަށް ތުހުމަތު ކުރެވޭ މަނީ ލޯންޑަރިން، ހިޔާނާތް އަދި ރިޝްވަތުގެ މައްސަލައެއް ފުލުހުންގެ ސަމާލުކަމަށް އައުމާ ގުޅިގެން އެ މައްސަލަ ބަލަން ފަށާފައިވާ ކަމަށެވެ.
އަދި އެ މައްސަލަ ހުށަހަޅާފައި ވަނީ ހުސްވި އޮގަސްޓު މަހުގެ 19 ވަނަ ދުވަހު ކަމަށްވެސް ފުލުހުން މައުލޫމާތު ދެއެވެ.
'ދަ ޕްރެސް' އަށް އެނގިފައިވާ ގޮތުގައި ފުލުހުން ބަލަމުންދަނީ ކަސްޓަމްސް އޮފިސަރުންތަކެއްގެ އެކައުންޓުން 400 މިލިއަން ރުފިޔާ ދައުރުކުރި މައްސަލައެކެވެ.
20 ވަރަކަށް އޮފިސަރުން ހިންގި މި ޖަރީމާގައި ފައިސާ ހޯދާފައި ވަނީ ޑިއުޓީ އޮޅުވާލައިގެންނާއި ކަސްޓަމްސްއިން ދޭ އެހެނިހެން ހިދުމަތްތަކުގެ ތެރެއިން ކަމަށް މި ނޫހަށް ވަނީ އެނގިފައެވެ. އަދި މި ހިޔާނާތުގައި އެ އިދާރައިގެ ސީނިއާ މުވައްޒަފުންވެސް ހިމެނޭ ކަމަށް މައުލޫމާތު ލިބިފައި ވެއެވެ.
މީގެ ކުރިންވެސް ކަސްޓަމްސްއަށް ރިޝްވަތުގެ އެކި މައްސަލަތަކުގައި ތުހުމަތު އޮވެއެވެ. އެގޮތުން މިދިޔަ އޮކްޓޫބަރު މަހު ތެރޭ ގަވާއިދާ ހިލާފަށް ރާއްޖެއަށް މުދާ އެތެރެކުރި މައްސަލައެއް ވަނީ ފެންމަތިވެފައެވެ. އަދި ބައެއް މިފަދަ މައްސަލަތަކުގައި އެ އިދާރާގެ މުވައްޒަފުން ވަޒީފާއިންވެސް ވަކިކޮށްފައި ވެސް ވެއެވެ.