ކޮންމެ މީހަކުވެސް މިއަދު ބަލަނީ އެންމެ ފުރިހަމަ ގަނޑުވަރާއި އެއްފެންވަރުގެ ގެއެއް އަޅައި އެންމެ ފެންވަރު ރަނގަޅު، އެންމެ އަރާމު ފަރުނީޗަރު ގެއަށް ވައްދައި އެންމެ އަރާމު ދިރިއުޅުމެއް ދިރިއުޅުމަށެވެ. އެފަދަ ދިރިއުޅުމެއް އުޅޭއިރުވެސް ސަލާންޖަހަން އަންނަ ފަޤީރަކު ބެލްޖަހައިފިނަމަ ޖަވާބެއް ނުދެއެވެ. އެއްދުވަހު ހަތަރު ދަމު ބެލްޖެހިނަމަވެސް ގޭގައި އުޅޭކަމަށްވެސް ނުހަދާނެއެވެ.
މިބުނި ފެންވަރުގައި ގެއަޅައި ދުނިޔެއިން ލިބެންހުރި އެންމެ އަގުބޮޑު ފަރުނީޗަރާއި އެހެނިހެން ތަކެތި ހޯދައިގެން އެއިގެމަތީގައި އަރާމުކުރާ މީހުން ދަންނާށެވެ!
ރަސޫލް (ﷺ) އަމަލުކުރައްވަވާފައިވަނީ އެގޮތަކަށް ނޫނެވެ. ރަސޫލް (ﷺ)ގެ އެންމެ އަރިސް ޞަޙާބީންގެ ތެރޭގައި ހިމެނިވަޑައިގަންނަވާ އިބްން މަސްއޫދު ރަސޫލް (ﷺ)ގެ ގަނޑުވަރަށް ވަޑައިގެންނެވި ދުވަހަކު ރަސޫލް (ﷺ) ގެ ބުރަކަށިކޮޅުގައި ހުރި ފާހަގަތަކެއް ފެނިވަޑައިގަތުމުން އެއަށްވުރެ ފަސޭހަފުޅުވާނެ ގޮތަކަށް އޮށޯވެވަޑައިގަތުމަށްޓަކައި ގޮދަޑިއެއް ފަދަ އެއްޗެއް ހަދިޔާ ކުރަންވަން ބޭނުންފުޅުވެ އެކަން ރަސޫލް (ﷺ) އަށް ހުށަހެޅުއްވެވިއެވެ.
ނަމަވެސް ރަސޫލް (ﷺ) އެކަމަށް ކުރެއްވެވީ އިންކާރެވެ. ޙަދީޘްފުޅު ކުރެއްވެވީ އެފަދަ އަރާމެއް ބޭނުންފުޅުވެވަޑައިނުގަންނަވާ ކަމަށެވެ. ދުނިޔެއަކީ ވަގުތީ މަންޒިލެއް ކަމަށާއި ދާއިމީ މަންޒިލަކީ ސުވަރުގެ ކަމަށެވެ. އަހަރެމެންނަކީ މިއަދު މިތަނުގައި ތިބެފައި މާދަން ވަކިވާން ޖެހިދާނެ ދަތުރުވެރިންތަކެއް ކަމަށެވެ. ވީމާ ދުނިޔޭގައި އުޅެން ޖެހޭނީ އެކަމަށް ތައްޔާރުވެގެން ކަމަށެވެ.
ފަޤީރަކު ކާނެ އެއްޗަކަށް އެދިގެން އަތުވެއްޖެނަމަ އަތްޕުޅުގައި އެންމެ ކަދުރުއޮށެއް އޮތަސް ދެއްވަވަން ޙަދީޘްފުޅުކުރައްވަވައެވެ. އަދި ދެއްވަވާނެ އެއްވެސް އެއްޗެއް ނެތްނަމަ ޞަޙާބީންގެ ތެރެއިން އެކަން ކޮށްލައި ދެއްވެވޭނެ ބޭކަލަކު ހުންނެވިތޯ ބައްލަވައިގެންވެސް އޭނާއަށް އެހީތެރިވެވަޑައިގަންނަވަން ވަނީ މަސައްކަތްޕުޅު ކުރައްވަވައިފައެވެ. ވީމާ މީހަކު ކަމަކު އެދިގެން އަތުވެއްޖެނަމަ ޢަމަލުކުރަން ސުންނަތުގައި އޮތްގޮތަކީ މިއެވެ.
ނަމަވެސް މިއަދު އަޅުގަނޑުމެންގެ ދިރިއުޅުން ހަމަޖެހިފައި މިހުރީ ކޮން ގޮތަކަށް ހެއްޔެވެ؟ ފަޤީރަކަށް ޞަދަޤާތެއް ދޭން ވެއްޖެ ނަމަ އެކަން އޮންނަނީ ނުކުރެވިފައެވެ. އެކަން އޮންނަނީ ބޮޑު ކަމަކަށްވެފައެވެ. ނަމަވެސް ތިމާ އެންމެ އަރާމުގައި ދުނިޔޭގައި އުޅުމަށް ކިތަންމެ ބޮޑު ހޭދައެއް ކުރަން ޖެހުނު ނަމަވެސް އެކަން އެއީ އެއްވެސް ޚަރަދަކަށް ނުވެއެވެ.
އަގުބޮޑު ތަކެތި ހޯދައިގެން އަރާމުގައި ދުނިޔޭގައި އުޅޭ ކޮންމެ މީހަކުވެސް މަރުވުމަށްފަހު އެންމެ ބޮޑަށް ހިތާމަކުރާނީ އެގޮތަށް އެކަންތައް ކުރެވުނީތީއެވެ. އެތަކެތި ގަންނަން ހޭދަކުރި ފައިސާ ޞަދަޤާތް ނުކުރެވުނީތީއެވެ. ނަމަވެސް އެއިރު ވަގުތު އޮންނާނީ ފާއިތުވެފައެވެ.
ތިބާގެ ގަނޑުވަރެއް ފަދަ ގެއަށް ކަންކަމު އެދިގެންދާ މީހުންނަށް ބީރުކަންފަތެއްދީ އެމީހުން ބެލްޖެހީމާ އަޑިނާހާ މީހުން ވިސްނައިލާށެވެ! ޤިޔާމަތް ދުވަހު ތިބާއަށް ސުވަރުގޭގެ ދޮރުކޮޅުގަ ޓަކިޖެހޭނެހެއްޔެވެ؟ ނަރަކައިން ސަލާމަތްކޮށްދެއްވެވުން އެދިގެން ކުރާ އާދޭހުގެ އަޑު ﷲ ތަޢާލާ އައްސަވައި ވޮޑިގަންނަވާނެހެއްޔެވެ؟
--ޑރ. ޢަބްދުﷲ ޙާކިމް ކްއިކްގެ ދަރުސަކުން