ވިޒިޓް މޯލްޑިވްސްއިން ބޭއްވި ސުޕަޔޮޓު ޕްރޮމޯޝަން ކެމްޕޭން ނިންމާލައިފިއެވެ. ރާއްޖެއަކީ ލަގްޒަރީ ޔޮޓަށް ފަތުރުވެރިކަމުގެ މަންޒިލެއްގެ ގޮތުގައި އިޝްތިހާރުކުރުމަށް، ސުޕަޔޮޓު ޕްރޮމޯޝަން ފެށީ މިދިޔަ އަހަރުގެ ފަހުކޮޅެވެ. އެ ޕްރޮމޯޝަންގައި ޔޮޓު ގެންގުޅޭ މަހުޖަނުންނާއި، ބްރޯކަރުންނާއި އެ ދާއިރާގެ ހިއްސާދާރުންނާ މަޝްވަރާތައްކޮށްފައިވެއެވެ. ވިޒިޓް މޯލްޑިވްސްއިން ބުނި ގޮތުގައި، އެ ކެމްޕޭނުގެ އެންމެ މުހިންމު އެއް ހަރަކާތަކީ ބައިނަލްއަގުވާމީ ޔޮޓު ޝޯތަކުގައި ބައިވެރިވުމެވެ. އެގޮތުން، އެމްވައިބީއޭ ޗާޓާ ޝޯއާއި މޮނާކޯ ޔޮޓު ޝޯގައި ރާއްޖެ އިޝްތިހާރުކޮށްފައިވާ ކަމަށް އެ ކުންފުނިން ބުންޏެވެ. އެ ޝޯތަކުގައި ވަނީ، ރާއްޖެ ޕްރޮމޯޓް ކުރުމަށް ޚާއްސަ މެޓީރިއަލްތައް ދައްކާލައިފައި ކަމަށާއި އޭގެ ތެރޭގައި، ބްރޯޝާއާއި ބްރޭންޑިން ދައްކުވައިދޭ ތަކެތި ހިމެނޭކަން ވިޒިޓް މޯލްޑިވްސްއިން ފާހަގަކުރިއެވެ. އެފަދަ ތަކެތި، އެ ދާއިރާގެ މީހުންނަށް ސީދާ ގޮތެއްގައި ފޯރުކޮށްދިނުމުން ރާއްޖެއާ މެދު ހޭލުންތެރިކަން އިތުރުވާނެކަން އެ ކުންފުނިން ފާހަގަކުރިއެވެ. އެ ކެމްޕޭން ތެރޭގައި، ''ސުޕަޔޮޓް ޑެސްޓިނޭޝަން މޯލްޑިވްސް''ގެ ނަމުގައި ޑިޖިޓަލް ހަރަކާތެއް ފަށައި، ސޯޝަލް މީޑިއާގައި ޕްރޮމޯޓްކުރިއެވެ. ރާއްޖެއަކީ ސުޕަޔޮޓުތަކުގެ ވެރިންގެ މެދުގައި މަޝްހޫރު މަންޒިލަކަށް ހެދުމަށް، ވިޒިޓް މޯލްޑިވްސްއިން ދަނީ މަސައްކަތް ކުރަމުން -- ފޮޓޯ/ ވިޒިޓް މޯލްޑިވްސް މީގެ އިތުރުން ވިޒިޓް މޯލްޑިވްސްއިން ވަނީ 'ސުޕަޔޮޓް ސްޕައިސް ރޫޓް ޕްލެޓްފޯމް' ފަދަ ސްޓްރެޓީޖިކް ހަރަކާތްތަކުގައި ވެސް ބައިވެރިވެފައި ކަމަށް އެ ކުންފުނިން ބުންޏެވެ. އެގޮތުން މެރިޓައިމް ރޫޓްތަކަށް ބަލާއިރު ރާއްޖެ އޮންނަ މުހިންމު ސަރަހައްދު ފާހަގަކޮށް، އެ ނެޓްވޯކްގައި ރާއްޖޭގެ ބައިވެރިވުން އިތުރުކޮށްފައިވާ ކަމަށް ވިޒިޓް މޯލްޑިވްސްއިން ބުންޏެވެ. އެ ހަރަކާތްތަކުގައި ބައިވެރިވުމުގެ ނަތީޖާއެއްގެ ގޮތުން، ރާއްޖެ އިތުރަށް އިޝްތިހާރުވެ، ޔޯޓް އުޅަނދުފަހަރުގެ ވެރިންގެ ޝައުގުވެރިކަން ރާއްޖެއަށް އޮތް މިންވަރު އިތުރުވިކަން ފާހަގަވި ކަމަށް އެ ކުންފުނިން ބުންޏެވެ. ވިޒިޓް މޯލްޑިވްސްގެ ސީއީއޯ އަދި އެމްޑީ އިބްރާހީމް ޝިއުރީ ވަނީ، އެމްވައިބީއޭ ޗާޓާ ޝޯއާއި މޮނާކޯ ޝޯގައި ބައިވެރިވުމަކީ ބައިނަލްއަގުވާމީ ސުޕަޔޮޓު ސާކެޓްގައި ރާއްޖޭގެ ބައިވެރިވުން އިތުރުކުރުމަށް މުހިންމު ކަމެއްގެ ގޮތުގައި ސިފަކުރައްވައިފައެވެ. އޭގެ ސަބަބުން، ޔޮޓް ކޮމިއުނިޓީއާ ސީދާ ގޮތެއްގައި ބައްދަލުކޮށް، ރާއްޖެއިން ޖާގައެއް ހޯދުމަށް މަގުފަހިވާ ކަމަށް އޭނާ ވިދާޅުވިއެވެ. އެ ކެމްޕޭނުން ލިބުނު ކުރިއެރުންތަކާއެކު، އިތުރު ޔޮޓް ޝޯތަކުގައި ބައިވެރިވެ، އެ ދާއިރާއިން ގުޅުންތައް ބަދަހިކުރަން މަސައްކަތްކޮށް، ސުޕަޔޮޓުތައް ރާއްޖެ ގެނައުމަށް މަސައްކަތްތައް ކުރާނެ ކަމަށް ވިޒިޓް މޯލްޑިވްސްއިން ބުންޏެވެ. މިއީ، މަތީ ފަންތީގެ ފަތުރުވެރިން ރާއްޖެއަށް ގެނައުމަށާއި މި ދާއިރާ ސިންދަފާތު ކުރުމަށް ކުރާ މަސައްކަތުގެ ބައެއްކަން އެ ކުންފުނިން ފާހަގަކުރިއެވެ.