ދުނިޔޭގެ ބާޒާރުގައި ރަނުގެ އަގު ރެކޯޑް މިންވަރަކަށް އުފުލި، ފުރަތަމަ ފަހަރަށް އައުންސެއްގެ އަގު 5,000 ޑޮލަރަށް ވުރެ މައްޗަށް އަރައިފި އެވެ.
ރަނުގެ އަގަށް މި އައި ބޮޑު ބަދަލަކީ ދުނިޔޭގެ ސިޔާސީ މަސްރަހަށް އަންނަމުންދާ ނުތަނަވަސްކަމާއި ވިޔަފާރީގެ ސިޔާސަތުތަކާ މެދު އުފެދިފައިވާ ޔަގީންކަން ނެތް ހާލަތްތަކުގެ އިތުރުން، އިންވެސްޓަރުންނާއި މަރުކަޒީ ބޭންކުތަކުން ރަނަށް އޮތް ޑިމާންޑް ބޮޑުވުމުގެ ސަބަބުން މެދުވެރިވި ބަދަލެކެވެ.
ރަނުގެ އަގު މިހާ ބޮޑަށް އުފުލިފައިވަނީ ގްރީންލޭންޑްގެ މައްސަލައިގައި އެމެރިކާ އާއި ނޭޓޯއާ ދެމެދު އޮތް ގުޅުން ގޯސްވަމުންދާ ވަގުތެއްގަ އެވެ.
އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ ވިޔަފާރީގެ ހަރުކަށި ސިޔާސަތުތަކުގެ ސަބަބުން ވެސް ބާޒާރުގައި ވަނީ ނުތަނަވަސްކަން އުފެދިފަ އެވެ. ވަކިން ހާއްސަކޮށް، ކެނެޑާއިން ޗައިނާއާ އެކު ވިޔަފާރީގެ އެއްބަސްވުމެއްގައި ސޮއިކޮށްފި ނަމަ، ކެނެޑާގެ މުދަލުން %100ގެ ޓެރިފެއް ނުވަތަ ޓެކްސްއެއް ނަގާނެ ކަމަށް ޓްރަމްޕް ދެއްވި އިންޒާރާ ގުޅިގެން އިންވެސްޓަރުންގެ މެދުގައި ވަނީ ކަންބޮޑުވުން އުފެދިފަ އެވެ.
މިދިޔަ އަހަރު ފެށުނު ފަހުން ރަނުގެ އަގު ވަނީ %60އަށް ވުރެ ބޮޑަށް އުފުލިފަ އެވެ.
މީގެ އިތުރުން ރިހީގެ އަގު ވެސް މިދިޔަ ހަފުތާގައި ވަނީ ރެކޯޑް މިންވަރަކަށް މައްޗަށް ގޮސްފަ އެވެ. މިދިޔަ އަހަރު ރިހީގެ އަގު %150އަށް އުފުލިފައި ވާއިރު، މިހާރު އައުންސެއްގެ އަގު ވަނީ 100 ޑޮލަރަށް ވުރެ މައްޗަށް އަރާފަ އެވެ.
އިގްތިސާދީ ގޮތުން ޔަގީންކަން ނެތް ދަނޑިވަޅުތަކުގައި ރަނާއި ރިއްސަކީ އިންވެސްޓް ކުރަން އެންމެ ރައްކާތެރި މާލީ ވަސީލަތްތަކުގެ ގޮތުގައި ބެލެވެ އެވެ.
އޭބީސީ ރިފައިނަރީގެ ގްލޯބަލް ހެޑް އޮފް އިންސްޓިޓިއުޝަނަލް މާކެޓްސް، ނިކޮލަސް ފްރެޕެލް ވިދާޅުވި ގޮތުގައި، ރަނަކީ ބޮންޑު ނުވަތަ ހިއްސާ ފަދައިން އެހެން ފަރާތެއްގެ ދަރަންޏާ ނުވަތަ ކުންފުންޏެއްގެ ހިންގުމާ ގުޅިފައިވާ އެއްޗެއް ނޫނެވެ. އެހެންކަމުން، ދުނިޔޭގެ މަސްރަހު ނުތަނަވަސްވެފައިވާ މިފަދަ ދަނޑިވަޅެއްގައި ރަނަކީ އިންވެސްޓްމަންޓްތައް ބަހާލުމަށް ލިބޭ ވަރަށް ރަނގަޅު ފުރުސަތެކެވެ.
މާހިރުން ވިދާޅުވާ ގޮތުގައި، ރަނުގެ އަގު އުފުލުމަށް މަގުފަހިވި އެހެން ސަބަބުތަކުގެ ތެރޭގައި ތަކެތީގެ އަގު އުފުލުން ނުވަތަ އިންފްލޭޝަން މަތިވުމާއި ޑޮލަރުގެ އަގު ދަށްވުމާ އަދި އެމެރިކާގެ މަރުކަޒީ ބޭންކު ނުވަތަ ފެޑަރަލް ރިޒާވް އިން މިއަހަރު ދެ ފަހަރެއްގެ މަތިން އިންޓްރެސްޓް ރޭޓް ކުޑަކުރާނެ ކަމަށް ބެލެވުން ހިމެނެ އެވެ. އާންމު ގޮތެއްގައި އިންޓްރެސްޓް ރޭޓް ކުޑަވުމުން ބޮންޑުން ލިބޭ ފައިދާ ކުޑަވެ އެވެ.
ޕެޕަސްޓޯންގެ ރިސާޗު ސްޓްރެޓެޖިސްޓް އަހުމަދު އާސިރީ ވިދާޅުވި ގޮތުގައި، ސަރުކާރުގެ ބޮންޑުތަކުގައި ފައިސާ ބެހެއްޓުމުން ލިބޭ ފައިދާ ކުޑަވުމުން، މީހުން ބޮޑަށް އިސްކަންދެނީ ރަން ގަތުމަށެވެ.
މިދިޔަ އަހަރަކީ 1979 ވަނަ އަހަރަށް ފަހު ރަނުގެ އަގަށް އެންމެ ބޮޑު ކުރިއެރުމެއް އައި އަހަރެވެ. މިއީ ޓެރިފްގެ އިންޒާރުތަކާއި އާޓިފިޝަލް އިންޓެލިޖެންސް (އޭއައި)އާ ގުޅުންހުރި ކުންފުނިތަކުގެ ހިއްސާގެ އަގު އޮތް މިންވަރަށް ވުރެ މަތިވެފައިވާ ކަމަށް ބެލެވޭތީ އިންވެސްޓަރުންގެ މެދުގައި އުފެދުނު ބިރުވެރިކަމާ ގުޅިގެން އައި ބަދަލެކެވެ.