ފިލައިގެން އިންޑިއާގައި ހުންނެވި ބަންގްލަދޭޝްގެ ކުރީގެ ބޮޑުވަޒީރު ޝައިހް ހަސީނާ، އާންމުންނާ މުހާތަބުކުރައްވައި ފުރަތަމަ ފަހަރަށް ދެއްކެވި ވާހަކައާ ގުޅިގެން، ބަންގްލަދޭޝް ސަރުކާރުން އިންޑިއާއަށް ވަރަށް ބޮޑަށް ފާޑުކިޔައިފި އެވެ.
ބަންގްލަދޭޝްގެ ފޮރިން މިނިސްޓްރީން އިއްޔެ ނެރުނު ބަޔާނެއްގައި ބުނެފައިވަނީ، 2024 ވަނަ އަހަރު ގައުމު ދޫކޮށް އަވަށްޓެރި އިންޑިއާއަށް ފިލައިގެން ވަޑައިގެންނެވި ކުރީގެ ބޮޑުވަޒީރު ޝައިހް ހަސީނާ، އާންމުންނާ މުހާތަބުކުރެއްވުމުގެ ފުރުސަތު އިންޑިއާ ސަރުކާރުން ދިނުމުން އެކަމާ ހައިރާންވެ، ކަންބޮޑުވާ ކަމަށެވެ.
"ގިނަ އަދަދެއްގެ ބަޔަކު މެރުމުގެ ތުހުމަތު އުފުލިފައިވާ ހަސީނާއަށް، އިންޑިއާގެ ވެރިރަށް ނިއުދިއްލީގައި މިފަދަ ހަރަކާތެއް ބޭއްވުމުގެ ފުރުސަތު ދީ، ފިތުނަވެރި ވާހަކަތައް ދެއްކުމަށް ފުރުސަތު ދިނުމަކީ ބަންގްލަދޭޝްގެ ރައްޔިތުންނާއި ސަރުކާރަށް ކުރި ވަރަށް ބޮޑު އިހާނެތްތެރިކަމެއް،" މަގާމުން ދުރުކުރެވުނު ފަހުން ހަސީނާ ދެއްވި ފުރަތަމަ ތަގުރީރާ ގުޅޭ ގޮތުން ބަންގްލަދޭޝްގެ ފޮރިން މިނިސްޓްރީން ނެރުނު ބަޔާނުގައި ބުނެފައިވެ އެވެ.
އުމުރުން 78 އަހަރުގެ ހަސީނާ އިންޑިއާގައި ހިމާޔަތް ހޯއްދަވައިގެން އުޅުއްވަނީ އޮގަސްޓު 2024ގައި ދަރިވަރުން އިސްވެ ހިންގި ވަރުގަދަ މުޒާހަރާތަކާ ގުޅިގެން އޭނާގެ 15 އަހަރުވީ ވެރިކަން ވެއްޓުމާ ގުޅިގެންނެވެ. ހަސީނާގެ ވެރިކަމަކީ އިންސާނީ ހައްގުތަކަށް އަރައިގަތުމާއި އިދިކޮޅު ފަރާތްތަކާއި ހިޔާލު ތަފާތުވާ މީހުން ހައްޔަރުކޮށް، މަރަމުންދިޔަ ދުވަސްވަރެއްގެ ގޮތުގައި ވަނީ ފާހަގަކުރެވިފަ އެވެ.
އޭރު ކުރި މުޒާހަރާތައް ހުއްޓުވުމަށް ސަރުކާރުން ހިންގި ލާއިންސާނީ އަމަލުތަކުގައި 1,400އަށް ވުރެ ގިނަ މީހުން މަރުވެފައިވާއިރު، އެ ގަތުލުއާންމުތަކަށް ހިތްވަރުދީ، މީހުން މެރުމަށް އަމުރުކޮށް އަދި އެ ކަންކަން ހުއްޓުވަން ފިޔަވަޅު އަޅާފައި ނުވާތީ، މިދިޔަ ނޮވެމްބަރު މަހު ބަންގްލަދޭޝްގެ ކޯޓަކުން ވަނީ އޭނާގެ ގައިރު ހާޒިރުގައި މަރުގެ ހުކުމް އިއްވާފަ އެވެ.
މިދިޔަ ހުކުރު ދުވަހު ނިއުދިއްލީގެ ފޮރިން ކޮރެސްޕޮންޑެންޓްސް ކްލަބުގައި އިއްވި އޯޑިއޯ މެސެޖެއްގައި ހަސީނާ ވަނީ ބަންގްލަދޭޝްގެ ވަގުތީ ސަރުކާރުގެ އިސްވެރިޔާ މުހައްމަދު ޔޫނުސްއަކީ "މީހުން މަރާ ފެސިސްޓެއް" ކަމަށް ތުހުމަތުކުރައްވައި، އޭނާގެ ބެލުމުގެ ދަށުން ބަންގްލަދޭޝްގައި މިނިވަން އިންސާފުވެރި އިންތިހާބެއް ދުވަހަކު ވެސް ނުބޭއްވޭނެ ކަމަށް ވިދާޅުވެފަ އެވެ. އޮންލައިންކޮށް ދުރަށް ދެއްކި މި ވާހަކަތައް ލައްކައަކަށް ވުރެ ގިނަ މީހުން ބަލާފައިވެ އެވެ.
ހަސީނާގެ ވެރިކަން ވެއްޓުނު ފަހުން ބަންގްލަދޭޝްގައި ބާއްވާ ފުރަތަމަ އާންމު އިންތިހާބު އަންނަ މަހު 12ގައި ބޭއްވުމަށް ވަނީ ހަމަޖެހިފަ އެވެ. ނަމަވެސް، އިލެކްޝަން ކޮމިޝަނުން މިދިޔަ މެއި މަހު ހަސީނާގެ އަވާމީ ލީގު ޕާޓީގެ ރަޖިސްޓްރީ ބާތިލުކުރުމާ ގުޅިގެން، އެ ޕާޓީއަށް އިންތިހާބުގައި ބައިވެރިއެއް ނުވެވޭނެ އެވެ.
ފޮރިން މިނިސްޓްރީގެ ބަޔާނުގައި އިތުރަށް ބުނެފައިވަނީ، ހަސީނާ ވަނީ ފާޅުގައި ވަގުތީ ސަރުކާރު ވައްޓާލުމަށް ގޮވާލައްވައި، ކުރިއަށް އޮތް އިންތިހާބަށް ހުރަސްއެޅުމަށްޓަކައި ޓެރަރިޒަމްގެ އަމަލުތައް ހިންގުމަށް އޭނާގެ ސަޕޯޓަރުންނަށް ހިތްވަރު ދެއްވާފައި ކަމަށެވެ.
މީގެ އިތުރުން، މިފަދަ އަމަލުތަކުގެ ސަބަބުން ދެ ގައުމުގެ ގުޅުމަށް ބޮޑެތި ބުރޫތަކެއް އަރާފާނެ ކަމުގެ އިންޒާރު ވެސް ބަންގްލަދޭޝްއިން ވަނީ ދީފަ އެވެ. ހަސީނާ އަނބުރާ ގައުމަށް ފޮނުވައިދިނުމަށް ބަންގްލަދޭޝްއިން އެދެމުންދިޔަ ނަމަވެސް، އިންޑިއާއިން މިހާތަނަށް އެކަމަށް އިޖާބަދީފައެއް ނުވެ އެވެ.
ޖުމްލަ 170 މިލިއަން މީހުންގެ އާބާދީއެއް އޮންނަ ބަންގްލަދޭޝް އިންތިހާބަށް ތައްޔާރުވަމުން އަންނައިރު، އިންތިހާބުގައި އެންމެ ކުރީގައި އުޅެނީ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އާއި އެ ގައުމުގެ އެންމެ ބޮޑު އިސްލާމީ ޕާޓީ ކަމަށްވާ ޖަމާއަތުލް އިސްލާމީ އިސްވެ އޮންނަ ކޯލިޝަނެވެ.