މިދިޔަ އަހަރުގެ މެއި މަހު ނެޓްފްލިކްސްއިން ގެނެސްދިން ވެބް ސީރީސް "ދަ ރޯޔަލްސް" ރިލީޒްކުރުމާ އެކު އާއްމުންގެ ފަރާތުން ކުރިމަތިވި ފާޑުކިޔުންތަކާ ގުޅިގެން އެކްޓް ކުރުމާ ދުރަށް ދިޔަ ކަމަށް އެ ސީރީސްގެ ބަތަލާ ބޫމީ ޕެޑްނޭކަރު ބުނެފިއެވެ. އެ ސީރީސްގެ ލީޑް ބަތަލާގެ ގޮތުގައި މަސައްކަތްކުރި ބޫނީ ދަ ހޮލީވުޑް ރިޕޯޓާއަށް ދިން އިންޓަވިއުއެއްގައި ބުނީ އެކްޓިންގްއިން ދުވަސްކޮޅަކަށް ބްރޭކެއް ނެގީ އެނޫން ގޮތެއް އޭރު ނެތުމުން ކަމަށެވެ. ފިލްމީ ދާއިރާގައި މަސައްކަތް ކުރާތާ 10 އަހަރުވެފައިވާއިރު އެއް ކެރެކްޓާއިން އަނެއް ކެރެކްޓާއަށް ބަދަލުވުމަކީ ފަސޭހަކަމެއް ނޫން ކަމަށާއި އެއީ ނަފުސާނީ ގޮތުންނާއި ޖިސްމާނީ ގޮތުން ވެސް ބޫމީއަށް ބޮޑެތި ގޮންޖެހުންތަކެއް ކުރިމަތިވާ ކަމެއް ކަމަށް ވަނީ ބުނެފައެވެ. ބޫމީ އަދި އެކްޓަރު އިޝާން ވެބް ސީރީސް "ދަ ރޯޔަލްސް"ގެ މަންޒަރެއްގައި--ފޮޓޯ/ބޮލީވުޑްހަންގާމާ "ދަ ރޯޔަލްސް"ގައި ބޫމީ ކުޅުނު ސޯފިއާ ކެރެކްޓާއަށް ލިބުނު ފާޑުކިޔުންތަކާ ގުޅިގެން މިދިޔަ އަހަރުގެ ޖޫން މަހުން ފެށިގެން ބަތަލާ ބޮޑު ބްރޭކަކަށް ދިޔަ ކަމަށާއި އެއީ އަމިއްލަ ނަފުސަށް ހަމަޖެހުން ހޯދުމަށް ނެގި ބްރޭކެއް ކަމަށް ބޫމީ ވަނީ ބުނެފައެވެ. އަދި އެއީ ބޫމީގެ އަމިއްލަ ނަފުސަށްޓަކައި ނިންމުނު ވަރަށް މުހިއްމު ނިންމުމެއް ކަމަށް ވަނީ ބުނެފައެވެ. ހާއްސަކޮށް އަމިއްލަ ނަފުސަށް ކުރާ އިތުބާރު އަލުން ގެނައުމަށް އެއީ ވަރަށް ބޮޑަށް އެހީތެރިވެދިން ނިންމުމެއް ކަމަށް "ދަމް ލަގާ ކޭ ހައިޝާ"އިން ފިލްމީ ދާއިރާއަށް ތައާރަފްވި ބަތަލާ ވަނީ ބުނެފައެވެ. އެ މުއްދަތުގެރޭގައި ގިނަ ވަގުތު ބޫމީ ހޭދަކުރީ އެކި ކަހަލަ ފޮތްތައް ކިޔުމަށް ކަމަށާއި ފިލްމުތައް ބެލުމުގެ އިތުރުން ހާވާޑު ޔުނިވަސިޓީގައި ހާއްސަ ތަމްރީނުތަކެއް ވެސް ފުރިހަމަކުރި ކަމަށް ބަތަލާ ވަނީ ބުނެފައެވެ. ބޫމީ ދެން އެންމެ އަވަހަށް ބެލުންތެރިންނަށް ފެންނާނީ މި އަންނަ ހުކުރު ދުވަހު އެމެޒޯން ޕްރައިމް ވީޑިއޯގައި ޕްރީމިއާކުރާ ކްރައިމް ތުރިލާ "ދަލްދަލް"އިންނެވެ. މި ވެބް ސީރީސްއާ އެކު ބޫމީ އެނބުރި ބެލުންތެރިންނާ ބައްދަލުކުރަން ތައްޔާރުވެފައިވާއިރު އަމިއްލަ ނަފުސަށް އޮތް އިތުބާރު ބޮޑުވެފައިވާ ކަމަށް ބަތަލާ ވަނީ ބުނެފައެވެ.