ސާފް ފުޓްސަލް ޗެމްޕިއަންޝިޕްގައި ރާއްޖޭގެ ޤައުމީ ފިރިހެން ޓީމް މިއަދު އަވައްޓެރި ސްރީލަންކާއާ ދެކޮޅަށް ނިކުންނާނެއެވެ. މިއަދުގެ މެޗަށް ނިކުތުމުގެ ކުރިންވެސް ރާއްޖޭގެ ޓީމަށް ވަނީ މުބާރާތުގެ ޗެމްޕިއަންކަން ކަށަވަރުވެފައެވެ. އެހެންނަމަވެސް މުބާރާތުގައި ރާއްޖޭގެ ޓީމުން ހޯދަމުން އަންނަ ސައްތައިގެ ރެކޯޑް މުޅިން ނިންމާލެވޭނީ މިއަދު ލަންކާ އާ ދެކޮޅަށް ކުޅޭ މެޗުން އެޓީމް ބަލިކޮށްގެންނެވެ.
ރާއްޖެ މިއަދު ލަންކާ އާ ދެކޮޅަް ނިކުންނައިރު ދިވެހިންގެ އުއްމީދަކީ އެޓީމުވެސް ބަލިކޮށް މުބާރާތް ނިންމާލުމެވެ. ސޯޝަލް މީޑިއާގެ ކޮމަންޓްތަކަށް ބަލާއިރު، ދިވެހިންގެ އުއްމީދަކީ އެއީއެވެ.
މުބާރާތުގެ ފަހުމެޗްގައި މިއަދު ސްރީލަންކާ އާ ދެކޮޅަށް ރާއްޖެ ކުޅޭ މެޗް ފެށުމަށް ހަމަޖެހިފައިވަނީ މެންދުރު 12:00 ގައެވެ. މުބާރާތުގައި ސްރީލަންކާގެ ޓީމް އެންމެފަހުން ކުޅުނީ އިންޑިއާ އާ ދެކޮޅަށެވެ. އެމެޗް 4-1 ގެ ނަތީޖާއަކުން ކާމިޔާބުކުރީ އިންޑިއާއެވެ. މިފަހަރުގެ މުބާރާތުގައި ދިވެހި ޓީމް އިންޑިއާ ބަލިކޮށްފައިވަނީ، ތަފާތު ކުޅުމެއް ދައްކައި 5-0 ގެ ނަތީޖާއަކުންނެވެ.
ތައިލެންޑްގައި ކުރިއަށްދާ ސާފް ފުޓްސަލް ޗެމްޕިއަންޝިޕްގެ ތަށި ބާކީ އެއްމެޗް އޮއްވައި ރާއްޖެ ކަށަވަރުކުރިއިރު، މުބާރާތުގެ މިހާތަނަށް ކުޅުނު ގިނަ މެޗްތައް  ރާއްޖެ ކާމިޔާބުކުރީ ތަފާތުބޮޑު ނަތީޖާތަކަކުންނެވެ. އެގޮތުން ފުރަތަމަ މެޗްގައި ޕާކިސްތާނު އަތުން 7-1 ގެ ނަތީޖާއަކުން މޮޅުވިއިރު ދެވަނަ މެޗް ބަންގްލަދޭޝްގެ މައްޗަށް ކުރިހޯދާފައިވަނީ 6-1 ގެ ނަތީޖާއަކުންނެވެ. އިންޑިއާ އާ ދެކޮޅަށް ކުޅުނުމެޗް 5-0 ގެ ނަތީޖާއަކުން ކާމިޔާބުކުރިއިރު، ބޫޓާން އަތުން މޮޅުވީ 3-1 ގެ ނަތީޖާއަކުންނެވެ. އަދި ނޭޕާލް އަތުން މޮޅުވީ 2-1 ގެ ނަތީޖާއަކުންނެވެ.
މުބާރާތުގައި ރައްޖޭގެ ޓީމް ދެއްކި ކުޅުމަށް ކޮމަންޓޭޓަރުންނާއި، އެހެން ޓީމުތަކުންވެސް ވަނީ ވަރަށްބޮޑަށް ތައުރީފްކޮށްފައެވެ. ރާއްޖެ މި މުބާރާތަށް ނިކުތްއިރު ޤައުމީޓީމް ފަރިތަކުރުންތައް ބާއްވާލާނެ އިންޑޯ ޕިޗެއްހާ ހިސާބުވެސް ރާއްޖެއަކު ނެތެވެ. ކުޅުންތެރިން ދެކޭގޮތުގައި މިފަހަރު މުބާރާތަށް ރާއްޖެއަށް އެހާ ރަނގަޅު ނަތީޖާއެއް ނެރެވުނީ ޗައިނާގައި ކުރިއަށްގެންދިޔަ ޓްރެއިނިން ކޭމްގެ ސަބަބުންނެވެ. 
ރައްޖޭގައި އިންޑޯ ރަނަގޅު ދަނޑެއް އެޅި ވަސީލަތްތައް ތަރައްޤީކުރެވިއްޖެނަމަ މިއަށްވުރެ ރަނގަޅު ހަރުފަތަކަށް ދެވޭނޭކަމަށް ޓީމްގެ އެންމެ މުހިންމު ކުޅުންތެރިޔާ އިޝާން އިބްރާހިމް (ސައްޓު) ވަނީ ބުނެފައެވެ.