މިދިޔަ އަހަރު ދުނިޔެ ދޫކޮށްފައިވާ އިންޑިއާގެ ސިނަމާގެ މަގުބޫލު އައިކަން ދަރުމެންދްރަ (ދަރޭ)އަށް އިންޑިއާ ސަރުކާރުން އާއްމުންނަށް އަރުވާ ޕަދުމާ ޝްރީ އެވޯޑު އަރުވަން ނިންމައިފިއެވެ. ޕަދުމާ ޝްރީ އެވޯޑަކީ އެކި ދާއިރާތަކަށް ދިގު މުއްދަތަކަށް ޚިދުމަތްކޮށްފައިވާ ޚިދުމަތްތެރިންނަށް އިންޑިއާގެ ސަރުކާރުން އަރުވާ ހަތަރު ވަނައަށް އެންމެ މަތީ ޝަރަފެވެ. ދަރޭއަށް ޕަދުމާ ޝްރީ ޝަރަފު އަރުވަން ނިންމާފައި ވަނީ ދަރޭގެ ދިގު ފިލްމީ ކެރިއަރުގައި ހިންދީ ސިނަމާއަށް ކޮށްދީފައިވާ ޚިދުމަތްތަކުގެ އަގު ވަޒަން ކުރުމުގެ ގޮތުންނެވެ. މި ޝަރަފު މި އަހަރު ލިބޭ ފަރާތްތަކަށް ހާއްސަ އެވޯޑު ހަވާލުކުރުން އޮންނާނީ އިންޑިއާގެ ޖުމްހޫރީ ދުވަހުގެ މުނާސަބަތާ ގުޅުވައިގެން މިއަދު ބާއްވާ ހާއްސަ ހަފްލާގައެވެ. ޕަދުމާ ޝްރީ އެވޯޑު ހަވާލުކޮށްދެއްވާނީ އިންޑިއާގެ ރައީސް ދުރޯޕަތީ މުރްމުރްއެވެ. ކުރީގެ އެކްޓަރު ދަރުމެންދްރަ ހަގު އަނބިމީހާ އަދި ކުރީގެ ބަތަލާ ހެމާ މާލިނީއާ އެކު--ފޮޓޯ/އެންޑީޓީވީ ފިލްމު އިންޑަސްޓްރީގެ "ހީ-މޭން"ގެ ލަގަބު ހޯދާފައިވާ ދަރޭއަށް އަރުވާ ޝަރަފަކީ ޕަދުމާ ޝްރީގެ އެވޯޑު ކެޓަގަރީތަކުގެތެރެއިން ދެވޭ ދެވަނައަށް އެންމެ މަތީ ޝަރަފު ކަމަށްވާ ޕަދުމާ ވިބޫޝަންއެވެ. ދަރޭގެ އިތުރުން އެކި ދާއިރާތަކަށް ޚިދުމަތްކޮށްފައިވާ ހަތަރު ޚިދުމަތްތެރީންނަށް މި ކެޓަގަރީއިން އެވޯޑުގެ ޝަރަފު ހަވާލު ކުރެވޭނެއެވެ. މި އަހަރުގެ ޕަދުމާ ޝްރީ އެވޯޑު ހަވާލުކުރެވޭ ފަރާތްތަކަށް އިންޑިއާގެ ބޮޑުވަޒީރު ނަރެންދްރަ މޯދީ މަރުހަބާ ވިދާޅުވި މެސެޖުގައި ފާހަގަކުރެއްވި ގޮތުގައި ޤައުމަށް އެ ފަރާތްތަކުން ކޮށްދެއްވި ޚިދުމަތްތަކަކީ އެތައް ޖީލުތަކަކުން އެ ޚިދުމަތްތަކުގެ ހަނދާން އާ ކުރާނެ ޚިދުމަތްތަކެއް ކަމަށެވެ. އިންޑިއާގެ އިތުރުން ދުނިޔޭގެ އެތައް ބައެއްގެ ލޯތްބާއި އިހުތިރާމް ހޯދާފައިވާ އެކްޓަރު މަރުވީ މިދިޔަ އަހަރުގެ ނޮވެމްބަރު މަހުގެ 24ގައެވެ.