އަނބިމީހާ ނުވަތަ ފިރިމީހާގެ ނަމުގައި ބޯހިޔާވަހިކަމެއް އޮތް ނަމަވެސް، ގޯއްޗަށް އެދި ހުށަހެޅޭ ގޮތަށް އެކުލަވާލާފައިވާ އުސޫލުގެ ދަށުން "ގޯތިގެދޮރު" ޕްރޮގްރާމަށް ފޯމު ހުށަހެޅުމުގެ ފުރުސަތު ހައުސިން މިނިސްޓްރީން މިއަދު ހުޅުވާލައިފިއެވެ. މިނިސްޓްރީން ހާމަކުރި ގޮތުގައި، މި ޕްރޮގްރާމުގެ ދަށުން އެޕްލިކޭޝަން ހުށަހެޅުމުގެ މުއްދަތު މިއަދުން ފެށިގެން އަންނަ މަހުގެ 30 ވާ ބުރާސްފަތި ދުވަހުގެ ރޭގަނޑު 11:59 އާ ހަމައަށް ވަނީ ހުޅުވާލާފައެވެ. ގޯއްޗަށް އެދި ކުރިމަތިލާން ޖެހެނީ ބޯހިޔާވަހިކަން ޕޯޓަލް މެދުވެރިކޮށެވެ. މި މަޝްރޫޢުގެ ދަށުން ދޫކުރުމަށް ހަމަޖެހިފައިވަނީ ރަސްމާލެއިން 1,250 އަކަފޫޓުގެ ގޯއްޗެވެ. "ގޯތިގެދޮރު" ޕްރޮގްރާމް ބަހާލެވިފައިވަނީ މައިގަނޑު ދެ ކެޓަގަރީއަކަށެވެ. ފުރަތަމަ ކެޓަގަރީއަކީ މާލޭގެ ރަށްވެހިންނަށް ޚާއްސަ ކެޓަގަރީއެކެވެ. ދެވަނަ ކެޓަގަރީ ޚާއްސަކޮށްފައިވަނީ މާލޭގައި ދިރިއުޅޭ އަތޮޅުތެރޭގެ ރަށްވެހިންނަށެވެ. ގޯއްޗަށް އެދި ހުށަހަޅާއިރު ބޭނުންވާ މުހިންމު ލިޔެކިޔުންތަކުގެ ތެރޭގައި: އަމިއްލަ ނަމުގައި ރަޖިސްޓަރީކޮށްފައިވާ ބިމެއް ނުވަތަ ފުލެޓެއް އޮތް ނަމަ، އޭގެ ރަޖިސްޓަރީ. މާލޭ ރަށްވެއްސެއް ނަމަ، މާލޭގައި ރަޖިސްޓަރީވި ތާރީޚު އެނގޭނޭ ރަސްމީ ލިޔުމެއް. މާލޭގައި ދިރިއުޅޭ މުއްދަތު ސާބިތުކުރުމަށްޓަކައި، ޕެންޝަން ސްކީމުގައި ބައިވެރިވާ ވަޒީފާދޭ ފަރާތަކުން ދޫކޮށްފައިވާ ވަޒީފާގެ ލިޔުން ނުވަތަ ސަރުކާރުގެ އިދާރާއަކުން ދޫކޮށްފައިވާ ރަސްމީ ލިޔުމެއް. މާލޭގައި އުޅުނު މުއްދަތު ކަށަވަރުކުރުމަށް ތަޢުލީމީ މަރުކަޒުތަކުން ދޫކޮށްފައިވާ ލިޔުންތައް ވެސް ހުށަހެޅިދާނެއެވެ. މިކަމާ ގުޅޭ އިތުރު މަޢުލޫމާތު މިނިސްޓްރީގެ ހޮޓްލައިން ނަންބަރުތަކުން ލިބޭނެ ކަމަށް އެ މިނިސްޓްރީން ބުނެއެވެ. މީގެ އިތުރުން، "ބިންވެރިޔާ" ޚާއްސަ ސްކީމަކަށް ވެސް ހުޅުވާލުމަށް ވަނީ ހަމަޖެހިފައެވެ. މިއީ ނިމިދިޔަ ސަރުކާރުގެ ބިންވެރިޔާ ސްކީމުގެ ދަށުން ޖޮއިންޓް އެޕްލިކޭޝަން ހުށަހަޅައިގެން ގޯތި ލިބުނު ފަރާތްތަކުގެ ތެރެއިން، އެ ގޯތި ދޫކޮށްލަން އެއްބަސްވާ ފަރާތްތަކަށް ވަކިވަކިން ގޯތި ދޫކުރުމަށް ހިންގާ ޕްރޮގްރާމެކެވެ. https://sun.mv/216962 މީގެ ކުރިން ޖެނުއަރީ މަހު ހުޅުވާލި ފުރުސަތުގައި، ދެމަފިރިންގެ ތެރެއިން އެއްވެސް މީހަކަށް މާލެ ސަރަހައްދުން ބޯހިޔާވަހިކަމެއް ލިބިފައިވާނަމަ ކުރިމަތިނުލެވޭ ގޮތަށް އޮތުމުން، ރައީސް ވަނީ އެފަދަ ފަރާތްތަކަށް ޚާއްޞަ އިސްތިސްނާ އުސޫލެއްގެ ދަށުން ކުރިމަތިލެވޭނެ ގޮތް ހަމަޖައްސަވައިދެއްވާނެ ކަމަށް ވިދާޅުވެފައެވެ.