ކޮވިޑް-19ގައި މިއަދު އަވަހާރަވި ދައުލަތުގެ ހިދުމަތްތެރިޔާ އުމަރު ޒާހިރަކީ ޒަމާނީ ރާއްޖެ ބިނާކުރުމުގައި އެންމެ އިސް ދައުރެއް އަދާކުރެއްވި ހިއްސާދާރު ކަމަށް، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދު މިއަދު ވިދާޅުވެއްޖެ އެވެ.
ވީ ކިހިނެއް؟ - އުމަރު ޒާހިރު ކޮވިޑަށް ޕޮޒިޓިވް ވީ ފުވައްމުލަކުގައި އަމިއްލަފުޅަށް އިމާރާތްކޮށްދެއްވި މިސްކިތެއް ހުޅުވަން އެ ރަށަށް ކުރެއްވި ދަތުރުފުޅަށް ފަހު މާލެ ވަޑައިގަތް ފަހުންނެވެ. އަދި މި މަހު 11ގައި ދަރުމަވަންތަ ހޮސްޕިޓަލްގައި އެޑްމިޓްކުރި އެވެ. އުމުރުފުޅުން 85 އަހަރުގައި އަވަހާރަވީ ހާލުކޮޅު ގޯސްވަމުން ގޮހެވެ.
ނަޝީދުގެ ބަސް - ނަޝީދު ކުރެއްވި ޓުވީޓެއްގައި ވިދާޅުވީ ޒަމާނީ ރާއްޖެ ބިނާކުރުމުގައި އިޖުތިމާއީ، އިގްތިސޯދީ، އަދި ސިޔާސީ ކަންކަމުގައި ވެސް އުމަރު ޒާހިރުގެ ބައިވެރިވުން އެހާމެ ބޮޑު ކަމަށެވެ.
ނަޝީދުގެ އިތުރުން، ކުރީގެ ރައީސް މައުމޫން އަބްދުލްގައްޔޫމް ވެސް ވަނީ އުމަރު ޒާހިރަށް ތައުރީފު ކުރައްވައިފަ އެވެ. އެމަނިކުފާނު އުމަރު ޒާހިރު ސިފަކުރެއްވީ 'ގައުމީ ލެޖެންޑެއް'ގެ ގޮތުގަ އެވެ.
މައުމޫން ވިދާޅުވީ ފާއިތުވި 50 އަހަރު ރާއްޖެ ހާސިލުކުރި ކޮންމެ ކާމިޔާބީއެއްގެ ފަހަތުގައި އުމަރު ޒާހިރުގެ ހިއްސާ އޮންނާނެ ކަމަށެވެ.
ތަފްސީލް - އުމަރު ޒާހިރަކީ 50 އަހަރަށް ވުރެ ގިނަ ދުވަހު ގައުމަށް ގިނަ ހިދުމަތްކުރެއްވި، ދައުލަތުގެ މަތީ މަގާމްތަކެއް ފުރުއްވި ބޭފުޅެކެވެ. މައުމޫންގެ ވެރިކަމުގައި މިނިސްޓަރުކަމުގެ ޒިންމާތައް ވެސް އުފުއްލެވި އެވެ. ގައުމީ ބޮޑެތި މަޝްރޫއުތައް ހިންގެވުމާއި އެ މަސައްކަތްތައް ހިނގާނުހިނގާ ގޮތް ބެއްލެވުމާއި އިޖުތިމާއީ އަދި ގައުމީ ވަރަށް ގިނަ ކަންކަމުގައި ހަރަކާތްތެރިވެވަޑައިގަތުމުގެ ލާމަސީލު މިސާލެކެވެ.  
ގުޅުން ހުރި ކަމެއް - އުމަރު ޒާހިރު އަވަހާރަވުމުގެ ހިތާމައިގައި މާދަމާއިން ފެށިގެން ތިން ދުވަހަށް ގައުމީ ދިދަ ބައި ދަނޑިއަށް ތިރިކުރަން ރައީސް އިބްރާހިމް މުހައްމަދު ސޯލިހު ވަނީ އިއުލާންކުރައްވައިފަ އެވެ.
އިތުރަށް ކިޔާލަން -
ގައުމީ ހިދުމަތްތެރިޔާ އުމަރު ޒާހިރު އަވަހާރަވެއްޖެ
އުމަރު ޒާހިރު: މިވަރުގެ ޝަހުސިއްޔަތެއް ރާއްޖޭގައި މަދުވާނެ