މީގެ 29 އަހަރު ކުރިން ބޮސްނިއާގައި އެތައް ހާސް މުސްލިމުން މަރައި ހިންގި ގަތުލުއާންމު ފާހަގަކުރަން އދ. އަށް ހުށަހެޅި ގަރާރަށް ރާއްޖެއިން ތާއީދުނުކުރި ސަބަބު ހޯދަން ކުރީގެ ރައީސް ރައީސް މައުމޫން އަބްދުލްގައްޔޫމް އެދިވަޑައިގެންފިއެވެ.
ބޮސްނިއާ ހަނގުރާމައިގެ ތެރެެއިން ބޮސްނިއާ ސާބްސްއަށް ނިސްބަތްވާ މިލިޓަރީ ގްރޫޕަކުން ހިންގި މި ގަތުލްއާންމު ބަލައިގަތުމަށް އ.ދ ގައި ނެގި ގަރާރުގައި ރާއްޖެއިން އެއްވެސް ކޮޅަކަށް ވޯޓު ދީފައިނުވެއެވެ.
އެކަމާ ގުޅިގެން މައުމޫންގެ ދަރިކަލުން ފާރިސް ވަނީ ކަންބޮޑުވުން ފާޅުކުރައްވައިފައެވެ. ފާރިސް މައުމޫން “އެކްސް”ގައި ވިދާޅުވީ އެ ގޮތަށް ވޯޓު ދޭން ޖެހުނު ގޮތް ބަލަން ކޮންމެ ދިވެހި ރައްޔިތަކު ވެސް ބަލަން ބޭނުންވާނެ ކަމަށެވެ.
މީގެ ކުރިން ދިވެހިރާއްޖެއިން ބޮސްނިއާ މުސްލިމުންނާއެކު ތިބި ގޮތް ގިނަ ދިވެހިން އަދިވެސް ހަނދާން ހުންނާނެ ކަމަށް ފާރިސް ވިދާޅުވެފައިވެއެވެ.
ފާރިސްގެ ޕޯސްޓަށް މައުމޫން ރިޕްލައި ކުރައްވަމުން ވަނީ ވޯޓު ދޭން ޖެހުނު ގޮތް ބަޔާންކޮށްދިނުމަށް މިނިސްޓަރު މޫސާ ޒަމީރުގެ އަރިހުން އެދިވަޑައިގެންފައެވެ.
1995 ވަނަ އަހަރުގެ ޖުލައިމަހު ބޮސްނިއާގެ މުސްލިމުންނާއި ދެކޮޅަށް އޭރުގެ ބޮސްނިއަން ސާބު ލީޑަރުން އިސްވެތިބެ ހިންގި ގަތުލު އާންމުގައި 8,000 މުސްލިމުން ޝަހީދު ކޮށްލާފައި ވެއެވެ. އޭގެތެރެއިން 2000 މުސްލިމުން ޝަހީދު ކޮށްލާފައިވަނީ ޖުލައިމަހުގެ 11 ވަނަ ދުވަހުއެވެ. ޔޫއެންގެ ގަރާރަކުން މިހާރު ނިންމާފައިވަނީ ކޮންމެ އަހަރެއްގެވެސް ޖުލައިމަހުގެ 11 ވަނަ ދުވަހަކީ އެ ގަތުލްއާންމު ބައިނަލްއަގްވާމީގޮތުން ފާހަަގަކުރާ ދުވަސް ކަމުގައެވެ.
އެހެންނަމަވެސް, މި ވޯޓުގައި, ދުނިޔޭގެ ހުރިހާ މުސްލިމް ގައުމަކުންވެސް މި ގަތުލުއާންމު ހިންގި ދުވަސް ބައިނަލްއަގުވާމީ ފެންވަރުގައި ފާހަގަކުރުމަށް ވޯޓު ދީފައިވާއިރު, ރާއްޖެއިން އެއްވެސް ކޮޅަކަށް ވޯޓު ނުދިން ސަބަބުން އަދިވެސް ފޮރިން މިނިސްޓްރީން ހާމަކޮށްފައެއް ނުވެއެވެ. އަދި މި ވޯޓާއި ގުޅިގެން މުޅި ސަރުކާރުވެސް އަދިވެސް އޮތީ ހަނުއެވެ.
އެހެންނަމަވެސް, މުސްލިމުންގެ އިހުސާސްތަކާއި ދެކޮޅަށް, އަދި ދުނިޔޭގެ ތާރީޚުގައި މުސްލިމުންނާއި ދެކޮޅަށް ހިންގި އެންމެ އަނިޔާވެރި އެއް ގަތުލުއާންމު އެއީ ނުވާކަމެއް ކަމަށް ހަދާ, އެކަން ދުނިޔޭގެ ތާރީޚުން ފޮހެލުމަށް, އެވިސްނުމަށް ރާއްޖެއިން ޔޫންއެގައި ތާއީދުކުރި ސަބަބު މިސަރުކާރުން ރައްޔިތުންނަށް ސާފުކޮށްދޭން ޖެހޭނެއެވެ.
މި ވޯޓުގައި ޗައިނާއިން ވޯޓު ދީފައިވަނީ ބޮސްނިއާގެ ގަތުލްއާންމު ބައިނަލްއަގްވާމީގޮތުން ފާހަަގަކުރުމަށް ނުފެންނަކަމަށެވެ. މުއިއްޒު ވެރިކަމަށް ވަޑައިގެންނެވުމަށްފަހު, މި ސަރުކާރުގެ ޚާރިޖީ ސިޔާސަތާއި ގުޅުންހުރި ކަންކަމަށް ޗައިނާއިންދަނީ ބޮޑެތި ނުފޫޒުތައް ފޯރުވަމުންނެވެ.
ބޮސްނިއާގެ ގަތުލުއާންމު ބައިނަލްއަގްވާމީގޮތުން ފާހަގަކުރުމަށް ފެންނަކަމަށް 84 ގައުމަކުން ވޯޓު ދިނެވެ. އޭގެ ތެރޭގައި އޮސްޓްރޭލިއާ، އިޓަލީ އަދި ޖަޕާން ފަދަ ގައުމުތައްވެސް ހިމެނެއެވެ. ނުފެންނަ ކަމަށް ވޯޓު ދިނީ 19 ގައުމަކުންނެވެ. ވަކި ގޮތަކަށް ނުފެންނަކަމަށް 68 ގައުމަކުން ވޯޓު ދިނެވެ. ވަކިގޮތަކަށް ވޯޓު ނުދީ ތިބި ގައުމުތަކަކީ ގަރާރު ޔޫއެންގެ އާންމު މަޖިލީހުން ފާސްވިޔަ ނުދިނުމަށް ތާއީދުކޮށްގެން ތިބި ގައުމުތަކެވެ. ރާއްޖެ ހިމެނެނީ އޭގެ ތެރޭގައެވެ.
މުއިއްޒު ވަނީ އިޒްރޭލުގެ ޕާސްޕޯޓް ވެސް މަނާ ކުރުމަށް ދެކޮޅު ހަދާފައެވެ. މިއަދު ޔޫއެންގައި ވޯޓ މި ދިނީ މުސްލިމުންނާއި ދެކޮޅަށް ހިންގުނު ބޮޑު ގަތުލުއާންމެއް ދުނިޔޭގެ ތާރީޚުން ފޮހެލުމަށް ތާއީދު ކޮށެވެ.