އަޒަރުބައިޖާނުގެ ވެރިރަށް ބާކޫގައި ހުންނަ ބޭރު ގައުމެއްގެ އެމްބަސީއަކަށް ޓެރަރިސްޓް ހަމަލާއެއް ދޭން ރާވަމުންދިޔަ ތިން މީހަކު އެ ގައުމުގެ ސަލާމަތީ ބާރުތަކުން ހައްޔަރުކޮށްފިއެވެ. އަޒަރުބައިޖާނުގެ ސްޓޭޓް ސެކިއުރިޓީ ސާވިސްއިން އަންގާރަ ދުވަހު ނެރުނު ބަޔާނެއްގައި ބުނެފައިވަނީ، ހައްޔަރުކުރި ތިން މީހުންނަކީ އަފްޣާނިސްތާނުގައި ހަރަކާތްތެރިވާ އައިއެސްގެ ގޮފި ކަމަށްވާ 'އައިއެސް-ކޭޕީ' އާ ގުޅިގެން ހަމަލާ ރާވަމުންދިޔަ ބައެއް ކަމަށެވެ. މި މީހުންނަކީ ޒުވާން އުމުރުގެ ތިން ފިރިހެނުންނެވެ. އޭގެ ތެރެއިން އެކަކީ 2000 ވަނަ އަހަރު އުފަންވި މީހެއް ކަމަށާއި، އަނެއް ދެ މީހުންނަކީ 2005 ވަނަ އަހަރު އުފަންވި ދެ މީހުން ކަމަށް ސަލާމަތީ ބާރުތަކުން ބުނެއެވެ. މި މީހުން ހައްޔަރުކުރިއިރު، ހަމަލާދިނުމަށް ބޭނުންވާ ހަތިޔާރުވެސް ވަނީ ހޯދާފައެވެ. https://sun.mv/211788 އަޒަރުބައިޖާނުގެ ކަމާބެހޭ އިދާރާތަކުން ބުނި ގޮތުގައި، މި މީހުންގެ މައްޗަށް ދައުވާ ކުރަނީ "ދީނީ ނަފުރަތުގެ މައްޗަށް ބިނާކޮށް ޓެރަރިޒަމްގެ އަމަލެއް ހިންގަން އުޅުމުގެ" ކުށުގައެވެ. މި މައްސަލައިގެ ތަހުގީގު އަދިވެސް ދަނީ ކުރިއަށެވެ. ހަމަލާގެ އަމާޒަކީ ކޮން ގައުމެއްގެ އެމްބަސީއެއް ކަމެއް އަޒަރުބައިޖާނު ސަރުކާރުން ރަސްމީކޮށް ހާމަކޮށްފައެއް ނުވެއެވެ. ނަމަވެސް އިސްރާއީލުގެ 'ޗެނަލް 12' އިން ރިޕޯޓްކޮށްފައިވާ ގޮތުގައި، މި ހަމަލާ އަމާޒުކުރަން އުޅުނީ ބާކޫގައި ހުންނަ އިސްރާއީލުގެ އެމްބަސީއަށެވެ. އެހެންނަމަވެސް މިކަން އަދި މިނިވަން މަސްދަރުތަކުން ކަށަވަރު ކުރެވިފައެއް ނުވެއެވެ. މި ހާދިސާ ހިނގާފައި މިވަނީ، އަޒަރުބައިޖާނުގެ ރައީސް އިލްހާމް އަލިޔޭވް، އިސްރާއީލުގެ ފޮރިން މިނިސްޓަރު ގިޑިއޯން ސާރްއާ ބާކޫގައި ބައްދަލުކުރައްވައި، ދެ ގައުމުގެ ދެމެދުގައި ވިޔަފާރީގެ ގުޅުން ބަދަހިކުރުމާ ބެހޭގޮތުން މަޝްވަރާކުރައްވާފައި ވަނިކޮށެވެ. މި ހަމަލާ ރޭވުމުގައި ބައިވެރިވި ކަމަށް ތުހުމަތުކުރާ އައިއެސް-ކޭޕީ އަކީ، މި އަހަރުގެ ކުރީކޮޅު ރަޝިޔާގެ މޮސްކޯގައި ހުންނަ ކޮންސެޓް ހޯލަކަށް ބަޑިން ހަމަލާދީ 150 އެއްހާ މީހުން މަރުވި ނުރައްކާތެރި ހާދިސާގެ ޒިންމާވެސް އުފުލާފައިވާ ޖަމާއަތެކެވެ.