ޑިޖިޓަލް އެކި ވަސީލަތްތައް ބޭނުންކޮށްގެން ފައިސާގެ މުއާމަލާތްތައް ކުރުމުގައި އެންމެ ބޮޑު ކާމިޔާބެއް ހޯދާފައިވާ އެއް ގައުމަކީ އަވައްޓެރި އިންޑިއާ އެވެ. އެއީ ބިލިއަނުން ގުނާލެވޭ ފައިސާގެ މުއާމަލާތްތައް، ވަގުތުން ވަގުތަށް، ނަގުދު ފައިސާ ބޭނުންކޮށްގެން ކުރުމެވެ. އިންޑިއާގެ ސައި ވިއްކާ ކުދި ފިހާރަތަކާއި ޓެކްސީތަކާ އޮޓޯތަކުގައި ވެސް މިހާރު ފައިސާ ދައްކަން ބޭނުން ކުރަނީ، ޕޭޓީއެމް، ރޫޕޭ ކަހަލަ ޑިޖިޓަލް ވޮލެޓްތަކެވެ. 
ރާއްޖޭގައި އަހަރެމެން މިހާރު މިދަނީ "ފަވަރަ"ގެ ނަމުގައި އިންސްޓަންޓް ޕޭމަންޓް ސިސްޓަމެއް ބޭނުންކުރަމުންނެވެ. އަދި ދާދިފަހުން ބޭންކް އޮފް މޯލްޑިވްސް އިން ވަނީ އިންޑިއާގެ ރުޕޭކާޑު ރާއްޖޭގައި ބޭނުންކުރެވޭނެ ގޮތްވެސް ހަދާފަ އެވެ. އަދި ސްވައިޕްގެ ނަމުގައި ޑިޖިޓަލް ވޮލެޓެއް ވެސް ވަނީ ތައާރަފްކޮށްފަ އެވެ. މީގެ އިތުރުން، އުރީދޫ އެމް-ފައިސާ އާއި ދިރާގު ޕޭ ފަދަ ޑިޖިޓަލް ވޮލެޓްތައް އެބަ ހުއްޓެވެ. އެކަމަކު ބޭނުން ކުރާވަރު ނިސްބަތުން މަދެވެ. 
އިންޑިއާގެ ތަޖުރިބާއިން އަހަރެމެންނަށް ދަސްކުރަންވީ ވަރަށް މުހިންމު ފިލާވަޅުތަކެއް އެބަހުއްޓެވެ.
ވޭތުވެދިޔަ އަހަރުތަކުގައި އިންޑިއާއިން ވަނީ ދުނިޔޭގެ އެންމެ ބޮޑު ރިއަލް-ޓައިމް ޕޭމަންޓް ސިސްޓަމް ބިނާކޮށްފަ އެވެ. އިންޑިއާގެ ޔުނިފައިޑް ޕޭމަންޓްސް އިންޓަފޭސް (ޔޫޕީއައި) މެދުވެރިކޮށް 2024 ވަނަ އަހަރު އެކަނިވެސް 172 ބިލިއަން މުއާމަލާތް ހިންގާފައިވެ އެވެ. މިއީ ވިސާ އާއި މާސްޓަރކާޑު ފަދަ ޑިޖިޓަލް ޕޭމަންޓުގެ ހިދުމަތް ދޭ އެ ކުންފުނިތަކަށްވުރެ ބާރަށް ކުރިއަރަމުން އަންނަ ނިޒާމެކެވެ.
އިންޑިއާގެ މި ކާމިޔާބީގެ ސިއްރަކީ ކޮބައިހެއްޔެވެ؟
އެންމެ މުހިންމު ކަމަކީ އެގައުމުން ޑިޖިޓަލް ޕޭމަންޓް ނިޒާމު ބަލައިގަތީ ވިޔަފާރީގެ މޮޑެލްއެއްގެ ގޮތުގައެއް ނޫނެވެ. އެއީ އާންމު ރައްޔިތުންނަށް ދެވޭ ހިދުމަތެއް ނުވަތަ "ޕަބްލިކް އިންފްރާސްޓްރަކްޗާ" އެއްގެ ގޮތުގަ އެވެ. މި ނިޒާމު ފަރުމާކޮށްފައިވަނީ އާންމު ރައްޔިތުންނަށް އެއްވެސް ހަރަދަކާ ނުލައި ފައިސާ ދެއްކޭނެ ގޮތަށެވެ.
ރާއްޖޭން ނަގަންވީ ކޮން ފިލާވަޅުތަކެއް ހެއްޔެވެ؟
ރާއްޖޭގައި އަދިވެސް ބައެއް ފަހަރު ޑިޖިޓަލްކޮށް ފައިސާ ފޮނުވުމުން ކުޑަ ފީއެއް ނަގާފާނެ އެވެ. ނުވަތަ ވަކި ބޭންކަކުން އަނެއް ބޭންކަށް ފޮނުވުމުގައި ދަތިތަކެއް ހުރެދާނެ އެވެ. ނަމަވެސް އިންޑިއާގެ ތަޖުރިބާއިން ދައްކައިދެނީ، މިފަދަ ނިޒާމުތައް ކާމިޔާބު ވަނީ "ޕްރީމިއަމް" ހިދުމަތެއްގެ ގޮތުގައި ބާއްވައިގެނެއް ނޫނެވެ. އެންމެންނަށް ބޭނުންކުރެވޭ ހިލޭ ހިދުމަތެއްގެ ގޮތުގައި އޮވެގެން އެވެ. 
"ފަވަރަ"އިގެ ތެރެއިން މިހާރު ވެސް ގިނަ ކުރިއެރުންތަކެއް ލިބިފައިވާއިރު، އަމާޒަކަށް ވާންވީ ނަގުދު ފައިސާ ބޭނުންކުރުން އެއްކޮށް ހުއްޓާލެވޭ ވަރަށް މި ނިޒާމު ފަސޭހަ ކުރުމަށެވެ. 
އިންޑިއާއިން "ރުޕޭ" ކާޑު ތައާރަފްކޮށް، އެގައުމުގެ ކާޑް ބޭނުންކޮށްގެން ކުރާ މުއާމަލާތްތަކުގެ ބޮޑު ބައެއް ކުރަނީ އެ ކާޑް މެދުވެރިކޮށެވެ. މިއީ ވިސާ އަދި މާސްޓަކާޑަށް ބަރޯސާވުން ކުޑަކޮށް، އަމިއްލަ ގައުމުގެ މާލީ މިނިވަންކަން ކަށަވަރުކުރަން އެޅި ފިޔަވަޅެކެވެ. ރާއްޖެއަކީ ކުޑަ ގައުމަކަށް ވީ ނަމަވެސް އަހަރެމެންގެ އަމިއްލަ ޕޭމަންޓް ނިޒާމުތައް ވަރުގަދަ ކުރުމަކީ އިގްތިސާދީ ގޮތުން މުހިންމު ކަމެކެވެ. މިއީ ބޭރުގެ ކުންފުނިތަކަށް ބަރޯސާވުން ކުޑަކޮށްދޭނެ ކަމެކެވެ.
އިންޑިއާގައި ބޭންކު އެކައުންޓްތަކާއި އައިޑީ ކާޑް، އާދާރު އަދި މޯބައިލް ފޯނު ގުޅުވާލައިގެން ވަނީ މާލީ ނިޒާމުގެ ތެރެއަށް އެތައް މިލިއަން ބަޔަކު ވައްދާފަ އެވެ. ރާއްޖެއަކީ މޯބައިލް ފޯން އަދި އިންޓަނެޓުގެ ހިދުމަތް ލިބޭ އާާބާދީނިސްބަތުން ވަރަށް މަތި ގައުމެކެވެ. އެހެންކަމުން، ކޮންމެ މީހެއްގެ އަތުގައި އޮންނަ ސްމާޓްފޯނަކީ ޑިޖިޓަލް ވޮލެޓަކަށް ބަދަލުކޮށްލުމުގެ ފުރުސަތު އަހަރެމެންނަށް އެބައޮތެވެ.
އުފާވެރި ހަބަރަކީ، ރާއްޖެއިން މިހާރު ވެސް ދަނީ މި މިސްރާބަށް މަސައްކަތް ކުރަމުން ކަމެވެ. އިންޑިއާގެ ޔޫޕީއައި އާއި ރާއްޖޭގެ ޕޭމަންޓް ނިޒާމު ގުޅާލުމުގެ މަޝްވަރާތައް ސަރުކާރުން އެބަ ކުރެ އެވެ. މީގެ ސަބަބުން ދިވެހިންނަށް އިންޑިއާއަށް ގޮސް، އަދި އިންޑިއާ ފަތުރުވެރިންނަށް ރާއްޖޭގައި ފަސޭހަކަމާއެކު ފޯނުން ފައިސާ ދެއްކޭނެ މަގު ފަހިވެގެންދާނެ އެވެ.
އަވަށްޓެރި އިންޑިއާއިން ދައްކައިދިނީ، ގައުމު ބޮޑު ނަމަވެސް އާބާދީ ބޮޑު ނަމަވެސް ޓެކްނޮލޮޖީގެ އެހީގައި މާލީ މުއާމަލާތްތައް ކުރަން ފަރިތަ މުޖުތަމައެއް އުފެއްދިދާނެ ކަމެވެ. ރާއްޖެއަށް ބުނެދެނީ "ފަވަރަ" އާއި އެހެނިހެން ވަސީލަތްތައް ބޭނުންކޮށްގެން، ނަގުދު ފައިސާއަށް ބަރޯސާ ނުވެ ޒަމާނީ އަދި ރައްކާތެރި އިގްތިސާދެއް ބިނާކުރެވިދާނެ ކަމެވެ.