މިދިޔަ އަހަރު ރިލީޒްކުރި އެންމެ ކާމިޔާބު ބޮލީވުޑް ފިލްމުގެ ރިކޯޑު އޮތް "ދުރަންދަރު"ގެ މުހިންމު ރޯލަކުން ފެނުނު އެކްޓަރު ނަދީމް ޚާން ރޭޕްގެ މައްސަލައަކާ ގުޅިގެން ފުލުހުން ހައްޔަރުކޮށްފިއެވެ. ނަދީމަށް ދެކޮޅަށް ރޭޕްގެ މައްސަލައެއް ހުށަހަޅާފައިވަނީ އޭނާ ދިރިއުޅޭ ގޭގައި ދިގު މުއްދަތެއް ވަންދެން މަސައްކަތް ކުރި އަންހެނެކެވެ. މުމްބާއީ ފުލުހުންނާ ހަވާލާދީ މީޑިއާތަކުން ބުނެފައިވަނީ ނަދީމް، އެ އަންހެންމީހާއާ އެކު ގުޅުން އޮންނަތާ މިހާރު 10 އަހަރުވެފައިވާ ކަމަށެވެ. އަދި، އޭނާ ވަނީ އެ މީހާއާ ކައިވެނިކުރާނެ ކަމަށް ވައުދުވެފައި ކަމަށް ވެސް އިންޑިއާގެ ނޫސްތަކުގައި ބުނެފައިވެއެވެ. އުމުރުން 41 އަހަރުގެ އެ އަންހެން މީހާ، ނަދީމާ ދެކޮޅަށް ރިޕޯޓުކުރި މައްސަލައާ ގުޅިގެން މިދިޔަ ހަފުތާގެ ބުރާސްފަތި ދުވަހުން ފެށިގެން ނަދީމް ހުރީ ފުލުހުންގެ ބެލުމުގެ ދަށުގައެވެ. ނަދީމް ފިލްމު 'ދުރަންދަރު'ގެ މަންޒަރެއްގައި--ފޮޓޯ/ޑީއެންއޭ އެ އަންހެން މީހާ، ނަދީމާ ދެކޮޅަށް މައްސަލަ ހުށަހަޅަން ނިންމީ 10 އަހަރުވަންދެން އޭނާއާ ކައިވެނިކުރާނެ ކަމަށް ވައުދުވުމަށް ފަހު، އެންމެ ފަހު ވަގުތު ކައިވެނި ނުކުރާނެ ކަމަށް ނިންމުމުން ކަމަށް ފުލުހުންނާ ހަވާލާދީ ރިޕޯޓުތަކުން ބުނެއެވެ. މީޑިއާތަކުން ބުނެފައިވާ ގޮތުގައި ނަދީމްގެ ގޭގައި މަސައްކަތު މީހެއްގެ ވަޒީފާގައި އުޅޭ އެ އަންހެން މީހާއަކީ ބޮލީވުޑްގެ ވަރަށް ގިނަ އެކްޓަރުންގެ ގޭގޭގައި މަސައްކަތްކުރަމުން އަންނަ މީހެކެވެ. ފިލްމު "ދުރަންދަރު"ގައި ނަދީމް ޚާން ކުޅެފައިވަނީ އެ ފިލްމުގެ މުހިންމު ރޯލެއް ކުޅުނު އަކްޝޭ ކަންނާގެ ގޭގައި ކައްކާ މީހެއްގެ ރޯލެވެ. ނަދީމަކީ އެކްޓަރު އަމީތާބް އަދި ކުރީގެ ކޮމެޑީ އެކްޓަރު އަސްރާނީއާ އެކު ވަރަށް ގިނަ ފިލްމުތަކުން ފެނިފައިވާ އެކްޓަރެކެވެ.