އަފްޣާނިސްތާނުގެ އުތުރުގައި އޮންނަ އެ ގައުމުގެ އެންމެ ބޮޑު އެއް ސިޓީ ކަމަށްވާ މަޒާރު ޝަރީފް ކައިރިއަށް 6.3 މެގްނިޓިއުޑްގެ ބާރުމިނުގައި ބިންހެލުމެއް އައިސްފައިވާ ކަމަށް އެމެރިކާގެ ބިންހެލުމެއް އައިސްފައިވާ ކަމަށް އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ބުނެފިއެވެ. އެ ހާދިސާގައި ގާތްގަނޑަކަށް ހަތަރު މީހަކު މަރުވެފައިވާ ކަމަށް ކަމާބެހޭފަރާތްތަކާ ހަވާލާދީ ބީބީސީ ރިޕޯޓުކޮށްފައިވެއެވެ. ޔޫއެސްޖީއެސް އިން ބުނީ ހުކުރު ދުވަހުގެ ރެއިން ފެށިގެން ހޯމަ ދުވަހުގެ ނިޔަލަށް ބިންހެލުން އައިސްފައިވަނީ ހިންދޫ ކުޝް ސަރަހައްދުގެ މަޒާރު ޝަރީފް ސިޓީ ކައިރީގައި އޮންނަ ޚޮލްމް އަށް 28 ކިލޯމީޓަރު (17 މޭލު) އަޑިއަށެވެ. އެ އިދާރާއިން ފުރަތަމަ ބުނީ ބިންހެލުން އައީ 10 ކިލޯމީޓަރު (6 މޭލު)ގެ އަޑިއަށް ކަމަށެވެ. ބިންހެލުމާ ގުޅިގެން މަޒާރު ޝަރީފުގައި ގިނަ ބަޔަކު ތިބީ އެމީހުންގެ ސަލަމާތްތެރިކަން ހޯދުމަށް ރޭގަނޑު ދަންވަރު މަގުމައްޗަށް ނުކުމެއެވެ. އަފްޣާނިސްތާނުގެ ވެރިކަމަށް 2021 ވަނަ އަހަރު ތާލިބާނުން އައި ފަހުން ކަމާބެހޭ ފަރާތްތަކަށް ބޮޑެތި ބައެއް ބިންހެލުންތަކާ ކުރިމަތިލާން ޖެހިފައިވާއިރު، އޭގެ ތެރޭގައި 2023 ވަނަ އަހަރު އީރާނާ އަފްޣާނިސްތާނު ހިއްސާވާ ބޯޑަރުގައި އޮންނަ ހުޅަނގު ހެރާތު ސަރަހައްދަށް އައި ބިންހެލުމާ ގުޅިގެން 1،500 އަށް ވުރެ ގިނަ މީހުން މަރުވެ 63،000 އަށް ވުރެ ގިނަ ގެދޮރު ވަނީ ހަލާކުވެފައެވެ. މިއަހަރު އޮގަސްޓް 31 ވަނަ ދުވަހު އެގައުމުގެ އިރުމައްޗަށް 6.0 މެގްނިޓިއުޑް ބާރުމިނުގައި ބިންހެލުމެއް އައިސް 2،200 އަށް ވުރެ ގިނަ މީހުން މަރުވެފައިވެއެވެ. ޚާއްސަކޮށް ޔޫރޭޝިއަން އާއި އިންޑިއާގެ ޓެކްޓޮނިކް ޕްލޭޓްތައް ބައްދަލުވާ ހިސާބު ކައިރީގައި އޮންނަ ހިންދޫ ކުޝް ފަރުބަދަ ސަރަހައްދަކީ ބިންހެލުން އާންމު ސަރަހައްދުތަކެވެ. އަފްޣާނިސްތާނުގައި ދިގު ޒަމާންތަކެއް ވަންދެން ކުރިއަށް ގެންދިޔަ ހަނގުރާމައަށް ފަހު ގިނަ މުސީބާތްތަކަކާ ވަނީ ކުރިމަތިލާންޖެހިފައެވެ. ފަގީރުކަމާއި، ހަނަފަސްކަމުގެ ސަބަބުން އަވަށްޓެރި ޕާކިސްތާނާއި އީރާނަށް އެތައް މިލިއަން އަފްޣާން މީހުން ވަނީ ހިޖުރަކޮށްފައެވެ. އިނގިރޭސިވިލާތުގެ ޖިއޮލޮޖިކަލް ސާވޭގެ ސެއިސްމޮލޮޖިސްޓެއް ކަމަށްވާ ބްރައިއަން ބަޕްޓީ ވިދާޅުވި ގޮތުގައި 1900 ވަނަ އަހަރުން ފެށިގެން އަފްޣާނިސްތާނުގެ އިރުއުތުރަށް 7.0 އަށް ވުރެ ބާރުމިނުގައި 12 ބިންހެލުން އައިސްފައިވެއެވެ.