އިލެކްޝަންސް ކޮމިޝަން (އީސީ)ން ސީޔާސީ ޕާޓީތަކުގެ ދަފްތަރު އާންމުކޮށް، ޝަކުވާއަށް ހުޅުވާލި ފަހުން މިވީ ހަ ދުވަސް ތެރޭ މިހާތަނަށް 400އަށް ވުރެ ގިނަ ޝަކުވާ ލިބިފައިވާ ކަމަށް އެ ކޮމިޝަނުން ހިއްސާކުރި ތަފާސްހިސާބުތަކުން ދައްކައިފި އެވެ. އޭގެ ތެރެއިން %60 އަކީ ޕީއެންސީން ހުށަހެޅި ވަގު ފޯމުތައް ކަމަށް ބެލެވޭ ފޯމުތަކާ ގުޅޭ ޝަކުވާތަކެވެ.
ވީ ކިހިނެއް؟ - ވެރިކަމުގައި އޮތް ޕީއެންސީގެ ސަރުކާރަށް އަހަރު ފުރޭ ދުވަހު 75،000 މެންބަރުން ހަމަ ކުރުމަށް މިިދިޔަ އަހަރު ފަހުކޮޅު އެ ޕާޓީން ހިންގި މެމްބާޝިޕް ޑްރައިވްގެ ތެރެއިން ގިނަ އަދަދެއްގެ ބަޔަކު އެ ޕާޓީއަށް 'ވަގަށް' ވެއްދި ކަމަށް ބުނާ މައްސަލަ ވަނީ ބޮޑުވެފަ އެވެ. އެއާ އެކު، އީސީން ޕާޓީތަކުގައި  ދަފްތަރު މި މަހު 23ގައި އާންމުކޮށް، އެއްވެސް ޕާޓީއަކަށް ވަގަށް މީހަކު ވައްދާފައިވޭތޯ ބެލުމަށް ޝަކުވާއަށް ހުޅުވާލާފައިވެ އެވެ.
ތަފްސީލު - އިސީން މިއަދު 'ދައުރު'އާ ހިއްސާކުރި ތަފާސްހިސާބުތަކުން ދައްކާ ގޮތުން، އިއްޔެގެ ނިޔަލަށް ޖުމްލަ 416 ޝަކުވާ ހުށަހަޅާފައިވެ އެވެ. އޭގެ ތެރެއިން 252 ޝަކުވާއާ އެކު އެންމެ ގިނަ އަދަދަކަށް ހުށަހަޅާފައި ވަނީ ޕީއެންސީއާ ގުޅޭ މައްސަލަތަކެވެ.
މިހާރު ރަޖިސްޓްރީކޮށްގެން ހިންގާ ހުރިހާ ސިޔާސީ ޕާޓީއަކާ ގުޅޭ ގޮތުން ޝަކުވާ ހުށަހަޅާފައިވާއިރު، މި ލިސްޓުގެ ކުރީގައި ދެން އުޅެނީ، ވިޔަފާރިވެރިޔާ އަދި މާމިގިލީ ދާއިރާގެ މެމްބަރު ގާސިމް އިބްރާހިމްގެ ޖުމްހޫރީ ޕާޓީ (ޖޭޕީ) އެވެ. އެ ޕާޓީއާ ގުޅޭ 54 ޝަކުވާ ހުށަހަޅާފައިވެ އެވެ.
އެހެން ޕާޓީތަކާ ގުޅޭ ގޮތުން ހުށަހަޅާފައިވާ ޝަކުވާގެ އަދަދު:
އަދާލަތު ޕާޓީ: 27
އެމްޑީއޭ: 26
އެމްޓީޑީ: 19
އެމްއެންޕީ: 14
އެމްޑީޕީ: 13
އެމްއާރުއެމް: 8 (މިހާރު އުވާލާފައި)
ޕީޕީއެމް: 6
ޑިމޮކްރެޓްސް: 3
ޕީއެންއެފް: 3
އީސީގެ މެންބަރު އަދި ތަރުޖަމާނު ހަސަން ޒަކަރިއްޔާ މިއަދު 'ދައުރު'އަށް ވިދާޅުވި ގޮތުގައި، އެ ޝަކުވާތަކުގެ ތެރޭގައި އެއްވެސް ޕާޓީއަކަށް ނިސްބަތް ނުވާ މީހުން ޕާޓީތަކަށް ވައްދައިގެންނާއި އެހެން ޕާޓީއެއްގެ ދަފްތަރުގައި އޮއްވާ އެ މީހުންނަށް ނޭނގި އެހެން ޕާޓީއަކަށް ވެއްދި ކަމަށް ބުނެ ހުށަހެޅި ޝަކުވާތައް ހިމެނެ އެވެ.
"ޝަކުވާ ލިބޭތޭ ދެތިން ދުވަސް ތެރޭ އެ މީހުންނަށް ޖަވާބު ދޭނެ. އަދި އެ މީހަކު ހުށަހަޅާފައިވާ ގޮތަށް ވަކިވާން އެދިފައިވާ ޕާޓީގެ ދަފްތަރުން އުނިކޮށްދޭނެ ނުވަތަ ކުރިން އޭނާ އޮތް ޕާޓީގެ ދަފްތަރަށް ރުޖޫއަކޮށްދޭނެ،" އޭނާ ވިދާޅުވި އެވެ.
ޕާޓީތަކުގެ ދަފްތަރު އާންމުކޮށް އިސީން ޝަކުވާއަށް ހުޅުވާލާފައި ވަނީ އަންނަ މަހު 10ގެ ނިޔަލަށެވެ. އީސީގެ ޕޯޓަލް މެދުވެރިކޮށް ވެސް ޝަކުވާ ހުށަހެޅޭނެ އެވެ.
ހަސަން ވިދާޅުވި ގޮތުގައި، އަންނަ މަހު 10ގެ ފަހުން ވެސް، މިފަދަ ޝަކުވާއެއް އޮތް ނަމަ، އާންމު އުސޫލުން އެ ޝަކުވާއެއް އީސީއަށް ހުށަހެޅޭނެ އެވެ. އެއީ ކުރިން ވެސް އަމަލު ކުރަމުން އައި ގޮތްކަން އޭނާ ފާހަގަކުރެއްވި އެވެ.
މިގޮތަށް ވަގު ފޯމު ކަމަށް ބެލެވޭ ފޯމު ހުށަހަޅައިގެން މިދިޔަ އަހަރުގެ ފަހު ދެ ކުއާޓަރުގައި ވެސް 300އެއްހާ ޝަކުވާ އިސީއަށް ހުށަހަޅާފައިވެ އެވެ.
ސިޔާސީ ޕާޓީތަކުގެ ގާނޫނުގައިވާ ގޮތުން:
ޕާޓީއެއްގެ މެންބަރުކަމަށް، ގަވާއިދާ ހިލާފަށް މީހެއްގެ ނަން ހުށަހަޅައިފި ނަމަ، އެކަން ކުރި ފަރާތެއް ކޮންމެ ފޯމަކަށް 5،000ރ. އާއި 10،000ރ.އާ ދެމެދުގެ އަދަދަކުން ޖޫރިމަނާ ކުރެވޭނެ
މިހާރު އުޅޭ ފޯމު މައްސަލައިގައި އެ ޕާޓީތަކުން ހުށަހެޅި ކޮންމެ ފޯމަކަށް ޖޫރިމަނާ ކުރާނެތޯ އެހުމުން ހަސަން ވިދާޅުވީ، މިކަން ފުލުހުންގެ މުއައްސަސާއިން ވެސް ތަހުގީގު ކުރަމުންދާ ކަމަށާއި ކޮމިޝަނުން ޖޫރިމަނާކުރާނެ އަދަދާއި އެއާ ގުޅޭ ނިންމުންތައް ނިންމާނީ އެ ތަހުގީގަށް ފަހު ކަމަށެވެ.
ގުޅުން ހުރި - މި މައްސަލައިގައި ޕީއެންސީން ބުނެފައި ވަނީ ފޯމެއްގެ ސައްހަކަން ކަށަވަރު ކުރުމުގެ ގާބިލުކަން އެ ޕާޓީގައި ނެތް ކަމަށެވެ. އެކަން ކުރަން ޖެހޭނީ އީސީން ކަމަށް ޕީއެންސީން ބުނެފައިވެ އެވެ.  
ވަގު ފޯމު ކަމަށް ބެލެވޭ ފޯމުތަކުގެ މައްސަލަ ބޮޑުވެގެން އީސީން ނިންމާފައިވަނީ، މިމަހުގެ ނިޔަލަށް ޕާޓީތަކަށް ފޯމު ހުށަހެޅުމަށް ފުރުސަތު ދިނުމަށް ފަހު، އެ މުއްދަތުގެ ފަހުން ވަގުތީ ގޮތުން ފޯމު ބަލައިގަތުން މަޑުޖައްސާލުމަށެވެ. އަދި އަންނަ މަހު 15 އިން ފެށިގެން އީފާސް މެދުވެރިކޮށް ފޯމު ހުށަހެޅޭ ގޮތަށް ހެދުމަށް ވެސް އީސީން ނިންމާފައިވެ އެވެ.
ޕީއެންސީން ހިންގި މެބާޝިޕް ޑްރައިވްއަށް ފަހު، މިހާރު 68،000އަށް ވުރެ ގިނަ މެންބަރުންނާ އެކު އެއީ ރާއްޖޭގެ އެންމެ މެންބަރުން ގިނަ ޕާޓީއަށް ވަނީ ވެފަ އެވެ. މިދިޔަ އޮގަސްޓުން ފެށިގެން މިދިޔަ ޑިސެމްބަރުގެ ނިޔަލަށް އެ ޕާޓީއަށް 39،000އެއްހާ މެންބަރުން އެ ޕާޓީއަށް ވައްދާފައިވާކަން އީސީގެ ދަފްތަރުން ދައްކަ އެވެ.