ކުޑަ ކުދިންގެ ދުވަހުގެ މުނާސަބަތާ ގުޅުވައިގެން، ކުޑަކުދިންގެ ލޮލުގެ ޞިއްޙަތު ދެނެގަތުމަށާއި، ލޮލުގެ މައްސަލަތަކަށް އަވަސް ފަރުވާ ހޯދުމަށް ހިތްވަރު ދިނުމުގެ ގޮތުން އައިކެއަރ ހޮސްޕިޓަލުން ޚާއްޞަ ޕެކޭޖުތަކެއް ތަޢާރަފުކޮށްފިއެވެ. މިއަދު ތަޢާރަފުކުރި ޕެކޭޖުތަކުން، އިންޝުއަރެންސް ކެނޑުމަށްފަހު ދައްކަންޖެހޭ ފައިސާއިން 30 އިންސައްތައިގެ ބޮޑު ޑިސްކައުންޓެއް ލިބިގެންދާނެއެވެ. މިއީ ކުޑަކުދިންގެ ލޮލުގެ ފަރުވާއަށް ލުއިފަސޭހަ ގޮތްތަކެއް ހޯދައިދިނުމަށް އެ ހޮސްޕިޓަލުން ފެށި މުހިންމު މަސައްކަތެކެވެ. މި ކެމްޕޭނުގެ ދަށުން އައިކެއަރއިން ވަނީ މައިގަނޑު ދެ ޕެކޭޖެއް ތަޢާރަފުކޮށްފައެވެ. އެއީ ބްރައިޓް އައިސް – ބޭސިކް އަދި ބްރައިޓް އައިސް – އެޑްވާންސް ޕެކޭޖެވެ. ބޭސިކް ޕެކޭޖުގެ ދަށުން ލޮލުގެ ފެނުން ޓެސްޓުކުރުމާއި، ލޮލުގެ ނަންބަރު ބެލުމުގެ އިތުރުން ލޮލުގެ ޚާއްޞަ ޑޮކްޓަރަށް ދެއްކުމުގެ އިންތިޒާމު ހަމަޖެހިފައިވެއެވެ. އަދި އެޑްވާންސް ޕެކޭޖުގައި މި ޚިދުމަތްތަކުގެ އިތުރުން، ކޯނިއަލް ޓޮޕޮގްރަފީ އަދި ފަންޑަސް ފޮޓޯގްރަފީ ހެދުމުގެ ފުރުޞަތުވެސް ހިމެނެއެވެ. މި ޕެކޭޖުތަކުގެ ދަށުން ޚިދުމަތް ހޯދާ ފަރާތްތަކަށް އާސަންދަ އަދި އެހެނިހެން އިންޝުއަރެންސްތައް ބޭނުންކުރެވޭނެއެވެ. އަދި 30 އިންސައްތައިގެ ޑިސްކައުންޓް ލިބޭނީ އިންޝުއަރެންސް ކަވަރުކުރުމަށްފަހު ބާކީ ދައްކަންޖެހޭ ޢަދަދުންނެވެ. މި ކެމްޕޭނާ ގުޅޭގޮތުން އައިކެއަރއިން މަޢުލޫމާތު ދޭގޮތުގައި، މިއީ ކުދިން ބޮޑުވަމުން އަންނަ ދުވަސްވަރު ލޮލުގެ ފެނުން ގަވާއިދުން ޗެކްކުރުމަށް ބާރުއެޅުމުގެ ގޮތުން ހުޅުވާލި ފުރުޞަތެކެވެ. ޚާއްޞަކޮށް މިހާރަކަށް އައިސް ސްމާޓްފޯނާއި ޓެބްލެޓް ފަދަ ސްކްރީންތައް ބޭނުންކުރާ މިންވަރު އިތުރުވުމާއި، ކިޔެވުމުގެ ކަންކަމުގައި ލޮލަށް ކުރާ ބާރު ބޮޑުވުމުގެ ސަބަބުން ކުދިންގެ ލޮލުގެ ޞިއްޙަތަށް ބޮޑެތި ނޭދެވޭ އަސަރުތަކެއް ކުރަމުންދާކަން އެ ހޮސްޕިޓަލުން ފާހަގަކުރެއެވެ. ގިނަ ކުދިންނަށް ލޮލުގެ ފެނުމުގެ މައްސަލަތައް ހުރި ނަމަވެސް، އެކަން ސާފުކޮށް ބުނެދޭން ނޭނގުމަކީ ޢާއްމުކޮށް ދިމާވާ ކަމެކެވެ. މީގެ ސަބަބުން ކުއްޖާގެ އުނގެނުމަށާއި، ކަންކަމަށް ސަމާލުކަން ދިނުމަށް ބޮޑެތި ހުރަސްތަކެއް ކުރިމަތިވެއެވެ. އައިކެއަރއިން ތަޢާރަފުކުރި މި ޚާއްޞަ ޕެކޭޖުތައް އަމާޒުކޮށްފައިވަނީ 18 އަހަރުން ދަށުގެ ކުދިންނަށެވެ. އަދި މި ޕެކޭޖުތަކުގެ ދަށުން ކުދިން ދައްކަންޖެހޭނީ ކުޑަކުދިންގެ ލޮލުގެ ޚާއްޞަ ޑޮކްޓަރުންނަށެވެ. މި ޕްރޮމޯޝަންގެ ދަށުން ޑޮކްޓަރަށް ދެއްކުމަށްޓަކައި ކުރިން އެޕޮއިންޓްމަންޓް ހެއްދުމަށް އައިކެއަރއިން އިލްތިމާސްކުރެއެވެ. އެޕޮއިންޓްމަންޓް ހެއްދުމަށް އެ ހޮސްޕިޓަލުގެ ވައިބަރ ނުވަތަ ވަޓްސްއެޕް ނަންބަރު 7201026 އަށް މެސެޖުކުރުމުން ނުވަތަ އައިކެއަރގެ ރަސްމީ ވެބްސައިޓް (www.eyecare.mv) މެދުވެރިކޮށްވެސް ހަމަޖެހޭނެއެވެ.