ކުރީގެ މިނިސްޓަރު އަދި ނިޝާން ޢިއްޒުދީންގެ ޢިއްޒަތުގެ ވެރިޔާ އުމަރު ޒާހިރު އަވަހާރަވުމަކީ މުޅި ގައުމަށްވެސް ލިބުނު ފުން ހިތާމައެއް ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
ރައީސް އެހެން ވިދާޅުވީ މިރޭ ކުރެއްވި ޓްވީޓެއްގައެވެ. އަދި އުމަރު ޒާހިރުގެ ފުރާނައަށް ހެޔޮ ރަހުމަތް ލައްވައި، އާއިލާއަށް ކެތްތެރިކަން ދެއްވުމަށް ދުއާ ދަންނަވާފައި ވެއެވެ.
އޭގެ އިތުރުން ރައީސް މިއަދު އުމަރު ޒާހިރުގެ އާއިލާއަށް ފޯނުން ގުޅުއްވައި ތައުޒިޔާ ދަންނަވާފައި ވެއެވެ. އެގޮތުން، އުމަރު ޒާހިރުގެ ދަރިކަނބަލުން އާމިނަތު ސާމިހާ ޒާހިރާ ގުޅުއްވައި ރައީސް ވިދާޅުވީ، އެ ހަބަރު އެއްސެވީ ފުން ހިތާމައާ އެކުގައި ކަމަށެވެ. އަދި އާއިލާގެ ހުރިހާ ބޭފުޅުންނަށް އިހުލާސްތެރިކަމާއެކު ތައުޒިޔާ ވިދާޅުވިއެވެ.
އުމަރު ޒާހިރު އަވަހާރަވީ ކޮވިޑް ބަލީގައި ދަރުމަވަންތަ ހޮސްޕިޓަލުގައި ފަރުވާ ހޯއްދަވަމުން ދަނިކޮށް މިއަދު މެންދުރުފަހު 2:02ގަ އެވެ. އަވަހާރަވި އިރު، އުމުރުފުޅަކީ 85 އަހަރެވެ.
އުމަރު ޒާހިރު ކޮވިޑަށް ޕޮޒިޓިވްކަން އެނގިވަޑައިގަތީ، ފުވައްމުލަކުގައި އޭނާގެ އަމިއްލަ ހަރަދުގައި ބިނާކުރެއްވި މިސްކިތް ހުޅުވުމަށް ފަހު އެނބުރި މާލެވަޑައިގެންނެވި ފަހުން ހުމުގެ އާލާސްކަންފުޅާ އުޅުއްވާތީ ޓެސްޓު ކުރެއްވުމުންނެވެ.