125 ވަނަ ސިފައިންގެ ދުވަސް ފާހަގަކުރުމުގެ ގޮތުން ހިންގާ ހަރަކާތްތަކުގެތެރޭގައި އެމްއެންޑީއެފުން ބޭއްވި ސިފައިންގެ އާއިލީ ހަވީރު މިއަދު ނިންމާލައިފިއެވެ.
ރަސްފަނުގައި އިއްޔެ ފެށި މި އާއިލީ ހަވީރު ނިންމާލާފައި ވަނީ މިއަދު ހަވީރުއެވެ. ސިފައިންގެ އާއިލާތަކަށާއި އާންމުންނަށް ހުޅުވާލައިގެން ދެ ދުވަހަށް ކުރިއަށްގެންދިޔަ ސިފައިންގެ އާއިލީ ހަވީރު ޚާއްސަކޮށްފައި ވަނީ "އައިލެންޑް ލައިފް" މި ތީމަށެވެ.
މި އާއިލީ ހަވީރުގައި ދިވެހިންގެ ދިރިއުޅުމުގެ އެހާރާއި މިހާރުގެ އާދަކާދަތަކާއި ދިވެހިން ކުރަމުންދިޔަ ބައެއް މަސައްކަތްތަކާއި ސިފައިންގެ ޚިދުމަތްތައް ދައްކުވައިދޭ ސްޓޯލްތަކުގެ އިތުރުން ކުޅިވަރުގެ ތަފާތު އެކި ހަރަކާތްތަކާއި ސްޓޭޖް އައިޓަމްތައްވެސް މި އާއިލީ ހަވީރުގައި ކުރިއަށްގެންގޮސްފައިވެއެވެ.