އަންނަ މަހު ފަށާ ވޯލްޑް ކަޕް ފުޓްބޯޅަ މުބާރާތަށް "ހަވީރު"ން ތައްޔާރުކުރި ވޯލްޑް ކަޕް ގައިޑް ކުރީގެ ރައީސް މުހައްމަދު ނަޝީދަށް "ހަވީރު"ން މިއަދު ހަދިޔާކޮށްފި އެވެ.
އެމްޑީޕީ އޮފީހުގައި މިއަދު މެންދރު ފަހު ބޭއްވި ކުޑަ ރަސްމިއްޔާތެއްގައި "ހަވީރު"ގެ ފަރާތުން ރައީސް ނަޝީދަށް ހަވީރުގެ ވޯލްޑް ކަޕް ގައިޑް ހަދިޔާކުރެއްވީ މެނޭޖިން އެޑިޓަރު އިސްމާއިލް ނަސީރެވެ.
މި ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވަނީ ވޯލްޑް ކަޕާ ބެހޭ ގޮތުން ކިޔުންތެރިންނަށް ބޭނުންވާ މައުލޫމާތުތައް އެކުލެވޭ ގޮތަށް ފޮތެއް ނެރުނީތީ ހަވީރަށް ޝުކުރު އަދާކުރައްވައިފަ އެވެ.
"ކުޅިވަރު ކުރިއެރުވުމަށް ހަވީރަކީ ވަރަށް ބުރަ މަސައްކަތް ކުރާ ނޫހެއް. ހަވީރުން ކުރާ މަސައްކަތް ދަނީ އެއް ދުވަހުން އަނެއް ދުވަހަށް ފުޅާވެ ކުރިއަރަމުން. ކުޅިވަރަށް ހަވީރުން ކުރާ މަސައްކަތަށް އަޅުގަނޑު ވަރަށް ބޮޑަށް ޝުކުރު އަދާކުރަން،" ރައީސް ނަޝީދު ވިދާޅުވި އެވެ.
"ހަވީރު"ގެ މެނޭޖިން އެޑިޓަރު އިސްމާއިލް ވިދާޅުވީ "ހަވީރު"ގެ ވޯލްޑް ކަޕް ގައިޑް ރައީސް ނަޝީދަށް ހަދިޔާކުރުމަކީ "ހަވީރަ"ށް ލިބުނު ވަރަށް ބޮޑު އުފަލެއް ކަމަށެވެ.
ވޯލްޑް ކަޕުގައި ވާދަކުރާ 32 ޓީމާ ބެހޭ މައުލޫމާތާއި މުބާރާތުގައި ކުޅޭ މަޝްހޫރު ކުޅުންތެރިންނާއި އަރަމުން އަންނަ ޒުވާން ތަރިންގެ އިތުރުން ކުރީގެ މަޝްހޫރު ކުޅުންތެރިންގެ ޕްރޮފައިލާއި ވޯލްޑް ކަޕް ސްޓޭޑިއަމްތަކާ ބެހޭ މައުލޫމާތު މި ފޮތުގައި ހިމެނޭނެ އެވެ. އަދި މަޝްހޫރު ކުޅުންތެރިންގެ އަމިއްލަ ދިރިއުޅުމާ ބެހޭ ވަރަށް ގިނަ މައުލޫމާތުތައް ވެސް ހިމަނާފައިވެ އެވެ.
ކޮންމެ ފޮތަކާ އެކު ސްކޯޗާޓެއް ހިލޭ ލިބޭނެ އެވެ. އަދި ވަކިން ވިއްކުމަށް ލިއޮނެލް މެސީ އާއި ކްރިސްޓިއާނޯ ރޮނާލްޑޯ އަދި ނޭމާގެ ޕޯސްޓަރު ވަނީ ތައްޔާރުކޮށްފަ އެވެ. ޕޯސްޓަރެއްގެ އަގަކީ 5ރ. އެވެ.
މަޝްހޫރު ބުކްޝޮޕްތަކުން ވެސް މި ގައިޑް މިހާރު ލިބެން ހުންނާނެ އެވެ. ފޮތެއްގެ އަގަކީ 95ރ. އެވެ.