ނެރެފައިވާ ކޯޓް އަމުރާއި އެއްގޮތަށް ހޯމް މިނިސްޓަރު އުމަރު ނަސީރު މިއަދު ކޯޓަށް ހާޒިރުވެ ވަޑައިގެންފި އެވެ.
ހެނދުނު 11.00 ޖެހި އިރު މިނިސްޓަރު އުމަރު މިއަދު ކޯޓަށް ވަޑައިގެންނެވީ އަމިއްލަފުޅަށެވެ. އަދި އުމަރު ކޯޓަށް ހާޒިރުވެވަޑައިގެންނެވުމުން، އެމަނިކުފާނުގެ މައްޗަށް ކުރާ ޝަރީއަތް ވެސް ވަނީ ކުރިއަށް ގެންގޮސްފަ އެވެ. ޝަރީއަތް ނިންމުމަށްފަހު، ކޯޓުން ނިކުމެވަޑައިގަންނަވަމުން، މީޑިޔާއަށް އެއްވެސް މައުލޫމާތެއް ހިއްސާކުރައްވަން ބޭނުންފުޅުވެވަޑައި ނުގަންނަވާކަމަށް ވިދާޅުވެ، އުމަރު ވަޑައިގެންނެވީ އެވެ.
އުމަރުގެ މައްޗަށް ކުރާ ދައުވާގައި ބުނަނީ ޖެނުއަރީ 23، 2012 ގައި އެމްއެމްއޭ ކައިރީގައި މުޒާހަރާ ކުރި މީހުންނާ މުހާތަބުކޮށް މުޒާހަރާގެ ހަރަކާތްތައް ބަދަލުކޮށްލުމަށާއި އެގޮތަށް ހަރަކާތްތައް ބަދަލުކޮށްލުމުން އެ ހަރަކާތްތައް ރައީސް އޮފީސް ކައިރީގަ އާއި ރައީސް އޮފީހަށް ބޭރުގެ ޑިޕްލޮމޭޓުން ދާ ގަޑީގަ އާއި އދ. ގެ މަންދޫބުން އެއާޕޯޓަށް ފައިބައި ގަޑީގަ އާއި އދ. އޮފީސް ކައިރީގަ އާއި އެމްއެންބީސީ ކައިރީގައި ކުއްލިކުއްލިއަށް ހިނގާނެ ކަމަށް އުމަރު ވިދާޅުވެފައިވާ ކަމަށެވެ.
އަދި އެގޮތަށް ކަންތައްކޮށް ސިފައިންނަށް ދަތި ކުރުމަށާއި އެ ހަރަކާތަށް ބޭނުން ވަނީ 2000 ވޮލަންޓިއަރުން ކަމަށް ވިދާޅުވި އިރު އެ 2000 މީހުން ވަކި އިންތިޒާމެއްގެ ދަށުން އެ ހަރަކާތް ހިންގައި ދިވެހި ސިފައިން ވަރުބަލި ކުރުމަށްފަހު 12 ފޫޓުގެ 50 ހަރުގަނޑު ބޭނުންކޮށްގެން ދިފާއީ ބާރުގެ މައި މަރުކަޒުގެ ތެރެއަށް އެއްފަހަރާ ވަންނާނީ ކަމަށް ދޭހަވާ ގޮތަށް ވިދާޅުވެ ރާއްޖޭގެ އަމަންއަމާން ކަމަށް ގެއްލުން ލިބިދާނެ ވާހަކަ ދައްކަވާފައިވާ ކަމަށެވެ. ނަމަވެސް އުމަރު ވަނީ އޭނާގެ މައްޗަށް ކުރާ ދައުވާއަށް އިންކާރު ކުރައްވާފަ އެވެ.