ގިނަ ބައަކަށް އެކަމަކާއި ވަކިވާން އެންމެ އުނދަގޫވާނީ އެމީހަކަށް އެންމެ ބޮޑަށް އަރާމުލިބޭ ކަންކަމާއިއެވެ. އެއިގެ ތެރެއިން އެއްކަމަކީ ނިންޖެވެ. ހުރިހާ ކަމެއްވެސް އެންމެ މޮޅަށް ދެނެވޮޑިގެންވަނީ ﷲ ތަޢާލާއެވެ. ވީމާ ރޭގަނޑުގެ އަރާމު ނިދިން ބައެއް ޤުރްބާންކުރަން ﷲ ތަޢާލާ އަންގަވާފައި އެވަނީ އެކަމުން ލިބެން އޮތް ފައިދާ މާބޮޑުވީމައެވެ.
މީސްތަކުން ދުނިޔޭގައި ލެއްވެވީ ﷲ ތަޢާލާއަށް އަޅުކަންކުރުމަށެވެ. އަބަދުވެސް ﷲ ތަޢާލާގެ މަތިން ހަނދުމަކުރުމަށެވެ. ޛިކުރުކުރުންމަތީގައި ތިބުމަށެވެ. ނަމަވެސް ދުވާލުގެ ގިނަ ވަގުތުތަކުގައި އެކަންކަން އޮންނަނީ ނުކުރެވިފައެވެ. އެއީ ދިރިއުޅުމަށް ކުރަންޖެހޭ މަސައްކަތްތައް ގިނަވެފައި ބުރަކަމުންނެވެ.
މިކަންކަން މިފަދައިން މެދުވެރިވާނެކަން ﷲ ތައާލާ ދެނެވޮޑިގެންވެއެވެ. ރޭގަނޑުގެ ފަހު ދަންފަޅި އެންމެ މާތް ކުރައްވަވައި ދަމުނަމާދުކުކޮށް ޤުރްއާން ކިޔަވައި ޛިކުރުކޮށް ދުޢާ ކުރަން ޚާއްޞަ ވަގުތެއްކަމަށް ލައްވަވާފައި އެވަނީ އެސަބަބަށްޓަކައެވެ. އެވަގތަކީ ދިރިއުޅެން އެއްވެސް މަސައްކަތެއް ކުރަންޖެހޭނެ ވަގުތަކަށް ނުވާނެތީއެވެ. ސިކުނޑިން ދުނިޔަވީ ކަންކަން ހުސްކޮށްލައި ﷲ ތަޢާލާއަށް ޚާއްޞަކުރެވޭނެ ވަގުތަކަށްވާތީއެވެ.
މީސްތަކުންނޭވެ! އެނގިގެން މިދަނީ ﷲ ތަޢާލާ މީސްތަކުން ދެކެ ލޯބިވެވޮޑިގަންނަވާ މިންވަރެވެ! ﷲ ތަޢާލާ ޢާއި ކުތަންވެ ސުވަރުގެ ލިބުމަށް މަސައްކަތްކުރަން އެދިވޮޑިގަންނަވާ މިންވަރެވެ! ވީމާ މިހައި ތަނަވަސް ފުރުޞަތުތައް މިންވަރުކުރައްވަވައި ދެއްވަވާފައި އޮތުމުންވެސް ފުރުޞަތުގެ ބޭނުން ނުހިފައި ކަންނެތްވ ނިދަން ތިބެފައި ދުނިޔެއާއި އާޚިރަތް ބާއްޖަވެރިވުމަށް އެދެން ލަދުވެތިވާން ނުޖެހޭ ހެއްޔެވެ؟
މީސްތަކުންނޭވެ! ﷲ ތަޢާލާ ދެއްވަވާފައިވާ މިފަދަ އަގުބޮޑު ފުރުޞަތުތައް ނަގައިނުލާށެވެ! ކަންނެތްވެ އެފަދަ ވަގުތުތަކުގައި ނިދަން ނުތިބޭށެވެ! ރޭއަޅުކަމުގައި ވަގުތު ހޭދަކުރާށެވެ! ވާން އޮތްވަރަކަށް އެކަމުގައި ހޭދަކުރާ ވަގުތުތައް ގިނަކުރާށެވެ! ތިބާއަށް ދެދުނިޔޭގައިވެސް ކާމިޔާބީ މިންވަރުކުރައްވަވަި ދެއްވަވާނެތެވެ! އިން ޝާ ﷲ
--އިސްލާމީ ތިލަފަތުގެ ދަރުސަކުން