"ތި ބުނީ ކިހިނެއް ބަދަލު ހިފާ ވާހަކައެއް؟ ކީއްކުރަން ސުހާ ތި އުޅެނީ؟ ކީއްވެ ބަދަލު ހިފަންވީ؟"
- އެޕިސޯޑް 75 –ނަޒީރާއަށް ބަދަލު ހިފާނަމޭ ސުހާ ތަކުރާރުކޮށް ބުނުމުން ވާރިޝްއަށް ލިބުން ހައިރާންކަން ވީ އިތުރެވެ. ވަގުތުކޮޅެއްގެ ހިމޭން ކަމަކަށްފަހު ވާރިޝް އަނެއްކާ ވެސް އޭނާގެ ހިތުގެ ތެރޭގައި އުފެދިގެން ދިޔަ ސުވާލުތައް ސުހާއަށް ކޮށްލަން ބޭނުން ވިއެވެ. "ތި ބުނީ ކިހިނެއް ބަދަލު ހިފާ ވާހަކައެއް؟ ކީއްކުރަން ސުހާ ތި އުޅެނީ؟ ކީއްވެ ބަދަލު ހިފަންވީ؟" ވާރިޝްގެ ސުވާލު ތަކުން ސުހާ ހިތްހަމަނުޖެހޭ ގޮތްވިއެވެ. "ކީކޭ ކިޔަން ވާރިޝް ތިއުޅެނީ؟ ވާރިޝް ތަ ތި ސުވާލު ތި ކުރަނީ؟ ވާރިޝްއަށް ނޭނގޭތަ ނަޒީރާގެ ސަބަބުން އަހަރެންގެ މުޅި ދިރިއުޅުން ބަރުބާދު ވެގެން ދިޔަކަން.. އަހަރެން އުޅުނީ ހާދަ ވޭނެއްގައޭ.. އެތައް މަސް ތަކެއް އަހަރެން ހޭދަ ކުރީ ނުނިދާ.. ނުކައި.. އަހަރެންގެ މުޅި ޙަޔާތް ޑިޕްރަޝްގަ އަހަރެން ހޭދަ ކުރީ.. ނަޒީރާގެ ރޭވުމުން އަހަންނާ ވާރިޝް ދުރު ކުރީމަ... ތަޤުދީރުން އަހަންނާ ވާރިޝް އަނެއްކާ ދިމާ މިވީ... އެއީ މާތްﷲގެ ނިންމެވުން.. ހަޤީޤީ ލޯބި ކޮންމެވެސް ދުވަހަކުން ދިމާވާނޭ މީހުން ބުނެއުޅެއެއްނު! ހަމަ އެގޮތަށް.. އެކަމު ވާރިޝް ކީއްވެތަ މިހާރު އަހަންނާ ވާހަކަދައްކާ ގޮތް ތަފާތު ތި ވަނީ.. އަހަރެން ނަޒީރާއަށް ބަދަލު ހިފަން ބޭނުން ވަނީ ވެސް ވާރިޝްގެ ހައްޤުގަ.. އެހެން ނޫނީ، ނަޒީރާއަށް ކަންތައް ތަކެއް ޝައްކު ވާނެ.. އޭގެ ސަބަބުން އަހަރެމެން ދެ މީހުންނަށް ވެސް އުނދަގޫ ވާނެ.. ބޭނުންތަ އަނެއްކާ ވެސް ދެމީހުން ދުރުވާން.. އެ ގޮތް ތަ ބޭނުން ވަނީ؟"ސުހާގެ އަޑުގައި ހިތާމަ އާއި ރުޅިވެރިކަން ހުއްޓެވެ. ވާރިޝް ޖަވާބު ގައި "ނޫން ނޫން" ބުނެލިއެވެ. "އަހަރެން ސުހާއާ ވަކިވާކަށް ބޭނުމެއް ނޫން.. އަހަރެން ބޭނުން ވަނީ ސުހާއާ އެކުގަ ދިރިއުޅެން.. އަހަރެން ލޯބި ވަނީ ސުހާ ދެކެ. އެކަމު އަހަރެން މި ދައްކާ ވާހަކަ ވެސް އަޑު އަހާލަ ބަލަ! މި ބުނަނީ ޙާލަތުގެ ވާހަކަ. އަހަރެން.." ވާރިޝްގެ ވާހަކަ ފުރިހަމަ ކުރަން ސުހާ ފުރުސަތެއް ނުދިނެވެ."ކިހާ ދެރަ ކަމެއް ތީ! އަބަދު ޙާލަތު ޙާލަތު.. ތި ނޫން އެއްޗެއް ނުބުނޭ.. އަހަރެންނާ ދޭތެރޭ ކީއްވެތަ ތި ނުވިސްނަނީ؟" ސުހާ ހަރު ކޮށް ބުނެލިއެވެ. "އަހަރެން ސުހާއާ މެދު ވަރަށް ވިސްނަން.. އަހަރެން ހުވާ ކޮށްފަ މިބުނީ.. އަހަރެން ސުހާ ދެކެ ވަރަށް ލޯބިވޭ،.. ވަރަށް ބޮޑަށް ލޯބިވޭ... ވަރަށް ބޮޑަށް ލޯބިވޭ.. އެކަމު ސުހާ... އަހަންނަށް ނުކެރޭނެ މި ޙާލަތުގަ އީމާއަށް ދެރައެއް ދޭކަށް.. އަހަރެމެން ދެ މީހުން މީތި ކުޅެން ޖެހޭނީ ސްމާރޓްކޮށް.. އެހެން ނޫނީ ދެމީހުން ވެސް ވާނީ ބޭޒާރު" ވާރިޝްގެ ވާހަކަ އަޑު އަހަމުން ދިޔަ އިރު، ސުހާ ރުޅި އައިސްގެން ތުރުތުރު އަޅަމުން ދިޔައެވެ. އެއްވެސް އެއްޗެއް ނުބުނެ ސުހާ ފޯނު ކަނޑާލީއެވެ. އަދި ދެ އަތަށް ފޯނު ލާފައި ފިއްތާލި ގޮތުން ހީވީ ފޯނު ހިމުންކޮށްލަން އުޅުން ހެންނެވެ. ***ވަރުބަލި ގޮތަކަށް ދާއިން ގެއަށް އައިސް ވަތް އިރު، ލީޒާ އިނީ އަކްޔަން ނިންދުވާށެވެ. ދާއިން ގެއަށް އައީ ޝަރާގެ ކަންތައްތައް ބަލަހައްޓަން އޭނާގެ ވަރަށް ގާތް މީހަކު ހޮސްޕިޓަލްގައި ބަހައްޓާފައެވެ. "ދާއިން.. އެއްޗެއް ކާނަންތަ؟ ހުންނާނެ ޕާސްތާ ހަދާފަ.." ލީޒާއަށް ދާއިން ފެނުމާ އެކުގައި އަހާލެވުނެވެ. "ނޫން ނުކާނަން.. އަހަރެން މިއައީ ފްރެޝް ވެލަން.." ދާއިން ކޮޓަރިއަށް ވަދެ، ފާޚާނާއާ ދިމާލަށް ހިނގައިގަތެވެ. އަކްޔަން އެނދުގައި ބޭއްވުމަށްފަހު، ލީޒާ ކޮޅަށް ތެދުވިއެވެ. އަދި ދާއިންގެ އަތުގައި ހިފާލިއެވެ. "ކީއްވެ އެއްޗެއް ނުކަނީ؟ އެއްވެސް އެއްޗެއް ކައިގެންތަ ތި އުޅެނީ؟ ދާއިން ތިހެން އުޅެންޏާ، ދާއިން ބަލިވެ ދާނެއެއްނު!" ލީޒާ ބަލަހައްޓައިގެން ހުރީ ދާއިންގެ މޫނަށެވެ. ދާއިން ގަދަކަމުން ހިނިތުންވެލިއެވެ. އަދި ލީޒާގެ ކޮނޑުގައި ހިފާލަމުން ލީޒާއާ އެކުގައި ދާއިން އިށީންނީ އެނދުގައެވެ. އަދި އެނދުގައި އޮތް އަކްޔަންއަށް ދާއިން ބަލައިލިއެވެ. ވަގުތުކޮޅަކު އަކްޔަން ބަލަން އިނުމަށްފަހު ދާއިން ބަލައިލީ ލީޒާއަށެވެ. "ލީޒާ ކައިފިންތަ؟" ދާއިން ބަލަން އިނީ ސީދާ ލީޒާގެ މޫނަށެވެ. ލީޒާ ޖަވާބުގައި ބޯ ޖަހާލިއެވެ. "އެކަމު، އެއްޗެއް ރަނގަޅަކަށް ނުދިރޭ.. އެކަމު ވެސް އަކްޔަންއަށް ވިސްނާފަ ކޮންމެ ވެސް އެއްޗެއް ކެއިން.. އަހަރެންގެ އަތުން މި ދަރިފުޅު ވަކިވަން ދެން އަހަރެން ކެތް ކުރާނަން.." ލީޒާގެ ދެ ލޮލުން ހޯސްލާފައި ކަރުނަތައް ފައިބައިގަތެވެ. "ލީޒާ.." ދާއިން މަޑުމަޑުން ލީޒާގެ އަތުގައި ހިފާލިއެވެ."ލީޒާ.. އެއްވެސް ކަމަކަށް މާ ބޮޑަށް އުއްމީދު ނުކުރައްޗޭ! އަހަރެން ބޭނުމެއް ނޫން ލީޒާ ބަލިކަށި ވާކަށް.. ޝަރާ އަކީ ވެސް ވަގުތީ މެހެމާނެއްކަން އެނގި ހުރެ ދޯ އަހަރެމެން އުޅުނީ... އަކްޔަން އަކީ ވެސް އަހަރެމެން އަތުން ބީވެގެން ދާނެ ކުއްޖެއް.. އެއީ އަޔާޒްއާ ހަވާލު ކުރަން ޝަރާ ވަސިއްޔަތް ކޮށްފަ އިން ފުރާނައެއް.. އެހެންވީމަ އެކަން ވިސްނައްޗޭ! އަހަރެންނަށް އެބަ ގެޓް ވޭ ލީޒާ ތި ބުނަން އުޅޭ އެއްޗެއް.. އެހެންވީމަ، ލީޒާ ޕްލީޒް.. އެއްވެސް ކަމަކަށް މާ ބޮޑަށް އެޓޭޗް ނުވާތި.." އެހެން މީހަކަށް ހިތްވަރު ދެވޭ ވަރަށް ވުރެ، ބަލިކަށި ޙާލުގައި އިނދެ ވެސް ދާއިން ލީޒާއަށް ވިސްނާދެވޭތޯ މަސައްކަތްކޮށްލިއެވެ. "އަހަރެންނަކަށް ނުވާނެ ދާއިން.." ލީޒާގެ ބަޑި ފަޅައިގެން ދިޔައެވެ. ދާއިންގެ ދެލޯ ވަގުތުން ބޮޑުވެގެން ދިޔައެވެ. ދާއިން ބަލައިލީ ލީޒާގެ ދެލޮލަށެވެ. އެ ދެލޮލުން ފެންނަނީ ލީޒާއަށް ކޮށްފައިވާ ވޭނީ އަސަރުތަކެވެ. "އަހަރެން ރޯން ބޭނުންވެފަ ހުންނަތާ ކޮން އިރެއް.. ދެން ކެތެއް ނުވާނެ ދާއިން.. ނެތް ހިތްވަރެއް ހަށިގަނޑަށް ދީގެން ދިރިއެއް ނޫޅެވޭނެ.. އަހަރެން އެއްކޮށް ބަލިކަށި ވެއްޖެ.. އަހަރެންނަށް ޔަޤީންވާ ކަމަކީ، އަހަރެންނަށް އަކްޔަންއާ ނުލާ ދެނެއް ދިރިއެއް ނޫޅެވޭނެ.. އެއީ ހަމަ އަހަރެންގެ ދަރިއެއް.. އަކްޔަން ލިބުނީސުރެ، އަކްޔަންއާ ވަރަށް ގާތުގަ މި އުޅެނީ.. އަދި މިހާރު ހުރިހާ ވަގުތެއް އަހަރެން ހޭދަ ކުރަނީ އަކްޔަންއާ އެކުގަ.. ދެން އަހަންނަކަށް އަކްޔަން އެއްވެސް މީހަކަށް ދުލެއް ނުކުރެވޭނެ.. އޭރުން އަހަރެން މުޅިން ހަލާކު ވާނެ ދާއިން.. އަހަންނަށް އިޙްސާސް ވަނީ އަކްޔަންއަކީ އަހަރެންގެ އަމިއްލަ ދަރިއެކޭ.. އެއީ ޝަރާ ނެތް ދުވަހަކުން ވެސް ހަމައެކަނި ޝަރާގެ ހަނދާން.. އަހަރެން ކިހިނެއް މި ދޫކޮށްލާނީ؟ އަހަރެންނާ އަކްޔަން ވަކި ނުކުރައްޗޭ! މިހެން ގޭގަ ހުންނަ އިރު، އެ ވިސްނުން އައިސްގެން އަހަރެން މުޅިން ބަލިކަށި ވެއްޖެ! މުޅިން ބަލިކަށި ވެއްޖެ.." ދާއިންގެ މޭގެ ތެރެއަށް ބޮޑިވެ ގަންނަމުން ލީޒާ އަޑުން އަޑު ނަގާ، ގިސްލާ ރޯން ފެށިއެވެ. ދޭތެރެ ދޭތެރެއިން ދާއިންގެ ދެލޮލަށް ޖަމާވަމުން ދިޔަ ކަރުނަތައް ފޮހެލަމުން ދާއިން ގެންދިޔަ އިރު، އޭނާގެ ހިތް ހީވަނީ ހިތާމައިގެ ވޭނުން ފިސްފިސް ވެދާނެހެންނެވެ. (ނުނިމޭ)
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ