ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެފައިވަނީ ރައްޔިތުންނާއި ގާތުން ޚިދުމަތް ދިނުމުގެ މަސައްކަތް ބައްޓަންކުރުމުގައި ކައުންސިލްތަކުން ވަރަށް ގިނަ މަސައްކަތްތަކެއް ކުރައްވާ ކަމަށެވެ. ވަޒީރު މިހެން ވިދާޅުވީ އިއްޔެ ދ. ކުޑަހުވަދޫގައި ދިވެހި ރައްޔިތެއްކަން އަންގައިދޭ އައިޑީ ކާޑު ޕްރިންޓް ކުރުމުގެ ޚިދުމަތް ފެއްޓުމަށްޓަކައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.ވަޒީރު ވިދާޅުވި ގޮތުގައި ކައުންސިލްތަކަށް ލިބޭ އާމްދަނީއަކުން އައިޑީ ކާޑުފަދަ ޚިދުމަތެއް ރައްޔިތުންނަށް ފޯރުކޮށްދިނުމަށް ނިންމަވާ ނިންމެވުމަކީ ފަސޭހަ ނިންމެވުމެއް ނޫނެވެ. އެހެނީ އައިޑީ ކާޑު ހެދުމަށް ބޭނުންކުރާ ސާމާނުތަކާއި، ޑޭޓާބޭސްއަށް އެކްސެސް ދިނުމާއި، އެ ސިސްޓަމްތައް ކައުންސިލް އިދާރާއެއްގައި ބެހެއްޓުމަކީ ވަރަށް ބޮޑު ޒިންމާއެއް ކަމަށް ވަޒީރު ފާހަގަކުރެއްވިއެވެ."ހިތްހަމަޖެހިގެން މި ޚިދުމަތް ރަށްރަށުގަ ދޭން ހުއްދަދެވޭ ވަރުވެއްޖެ. މިފަދަ ޚިދުމަތްތަކަކީ ވަކިން ޚާއްސަކޮށް އައިޑީ ކާޑު ހަދަން ގެންގުޅޭ ބައެއް ސާމާނުތަކާއި އައިޑީ ކާޑުގެ ޑޭޓާ ބޭސްއަށް އެވާ އެކްސެސް އާއި އެ އެކްސެސްވެވޭ ސިސްޓަމްތަކާއި މިތަނުން އަޅުގަނޑުމެންގެ ކޮންޓްރޯލުން ބޭރުން ކައުންސިލް އިދާރާއެއްގަ ބަހައްޓަން އެއީ ވަރަށް ބޮޑު ޒިންމާއެއް،" ވަޒީރު ވިދާޅުވިއެވެ.އެހެންނަމަވެސް، އައިޑީ ކާޑުގެ ޚިދުމަތަކީ މުހިންމު ޚިދުމަތެއްކަން ދ. އަތޮޅު ކައުންސިލްގެ ރައީސް އަދި މެމްބަރުންނަށް ވިސްނުމުގެ ނަތީޖާއަކީ އައިޑީ ކާޑުގެ ޚިދުމަތް ދެވޭ ދެވަނަ ކައުންސިލަކަށް ކުޑަހުވަދޫ ވެގެންދިޔުންކަން ވަޒީރު ފާހަގަކުރެއްވިއެވެ. މި ޚިދުމަތް ރައްޔިތުންނަށް ފޯރުކޮށްދެވިގެން އައީ ކައުންސިލުގެ އަމިއްލަ ޚަރަދުގައިކަން ފާހަގަކުރައްވާ ވަޒީރު ވިދާޅުވީ މި މަސައްކަތަކީ މިލިއަނެއްހާ ފައިސާ ޚަރަދުވާ މަސައްކަތެއް ކަމަށާއި ރައްޔިތުންގެ ހައްގުގައި މިއީ ބޮޑު ޚަރަދެއް ހިނގާ ކަމެއްކަމަށެވެ."އަދި މިތަކެތި މެއިންޓެއިން ކުރުމަށް އަޅުގަނޑުމެން މި ކަނޑައަޅާފަ ހުންނަ ސަލާމަތާއި ރައްކާތެރިކަން ކަށަވަރުކުރެވޭނެ މިންގަނޑުތަކަށް މިތަން ބެލެހެއްޓުމަކީވެސް ފަސޭހަ ކަމެއްނޫން. އެހެންވެގެން އަޅުގަނޑުމެން މި އަސްލު ބޭނުންވާ ސްޕީޑުގަ ކައުންސިލްތަކުން މި ޚިދުމަތް ނުފެއްޓިގެން އުޅެނީ،" ވަޒީރު އިތުރަށް ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން ވަޒީރު ވަނީ ޑީއެންއާރު ހިންގުމާ ހަވާލުވެވަޑައިގެން ހުންނެވި ޑެޕިއުޓީ މިނިސްޓަރު އަހުމަދު އާލީ އަދި އައިޓީ ޑިރެކްޓަރ މުހައްމަދު އުމެއިރަށް ވަރަށް ޚާއްސަ ޝުކުރެއްވެސް އަދާކުރައްވާފައެވެ. ވަޒީރު ވިދާޅުވީ މި ދެ ބޭފުޅުން ޒަމާނީ ޓެކްނޮލޮޖީގެ އެހީގައި ސަލާމަތާއި ރައްކާތެރިކަމާއެކު މި މަސައްކަތް ކުރުމުގައި ކުރައްވާ މަސައްކަތް ވަރަށް އިޚްލާސްތެރިކަމާއެކީ ބަލައިގަންނަ ކަމަށެވެ.މި ރަސްމިއްޔާތާ ގުޅިގެން، ދ. ކުޑަހުވަދޫ އަކީ މާލެ ފިޔަވައި އައިޑީ ކާޑު ހެދުމުގެ ޚިދުމަތް ދޭ ދެވަނަ ރަށްކަން ފާހަގަކުރެވެއެވެ. މި ޚިދުމަތް ފެށުމުން، ކުޑަހުވަދޫ އަދި އެ ސަރަހައްދުގެ ރައްޔިތުންނަށް އައިޑީ ކާޑު ހެދުމަށް މާލެއަށް ދަތުރުކުރަން ނުޖެހި، ފަސޭހަކަމާއެކު މި މުހިންމު ޚިދުމަތް ލިބިގެންދާނެއެވެ.މި ޚިދުމަތް ފެށުމަކީ ސަރުކާރުގެ ލާމަރުކަޒީ ސިޔާސަތުގެ ދަށުން، ރައްޔިތުންނާ ގާތުން ޚިދުމަތް ދިނުމުގެ މަސައްކަތުގައި އެޅުނު މުހިންމު ފިޔަވަޅެއް ކަމުގައި ބެލެވެއެވެ. އަދި މި ކަމަކީ އެހެން ރަށްރަށުގެ ކައުންސިލްތަކަށްވެސް މިފަދަ ޚިދުމަތްތައް ފެށުމަށް ހިތްވަރު ލިބިގެންދާނެ ކަމެއް ކަމަށް އުންމީދު ކުރެވެއެވެ.