އިސްލާމީ ކަންތައްތަކާ ބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، އިމާމުންނަށް އިތުރު ތަމްރީނު ދިނުމުގެ މަސައްކަތުގެ ތެރެއިން 15 އިމާމަކު އިންޑޮނޭޝިޔާއަށް ފުރުމަށް ތައްޔާރުވެއްޖެއެވެ. މި ދަތުރު ކުރިއަށް ދާނީ މި މަހުގެ 10 ވަނަ ދުވަހުގެ ނިޔަލަށެވެ.މި ދަތުރަށް ފުރުމުގެ ކުރިން، އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވަނީ އިމާމުންނާ ބައްދަލުކުރައްވާފައެވެ. މި ބައްދަލުވުމުގައި ވަޒީރު ވަނީ އިމާމުންނަށް ދަތުރުގެ ބޭނުން ހެޔޮ ގޮތުގައި ހިފުމަށާއި، ލިބޭ ޢިލްމާއި މަޢުލޫމާތުތަކުގެ ބޭނުން ޢަމަލީ މައިދާނުގައި ހިފުމަށް ނަސޭހަތްތެރިވެލައްވާފައެވެ.މިއަހަރުގެ މިހާތަނަށް އިތުރު ތަމްރީނަށް 100 އިމާމުން ރާއްޖޭން ބޭރަށް ފޮނުވާފައިވާކަން ވުޒާރާއިން ފާހަގަކޮށްފައިވެއެވެ. މީގެ ތެރޭގައި ސަޢުދީ ޢަރަބިއްޔާ، ބުރޫނާއީ އަދި މެލޭޝިޔާއަށް އިމާމުން ފޮނުވާފައިވާކަން ފާހަގަކުރެވެއެވެ.ރައީސް ޑރ. މުޙައްމަދު މުޢިއްޒުގެ ސަރުކާރުން އިމާމުންނަށް އިތުރު ތަމްރީނާއި ތަޢުލީމުގެ ފުރުސަތުތައް ހޯދައިދިނުމަށް ވަރަށް އިސްކަމެއް ދެއްވާފައިވާކަން ވުޒާރާއިން ފާހަގަކޮށްފައިވެއެވެ. މި މަސައްކަތަކީ އިމާމުންގެ ޢިލްމީ ފެންވަރު މަތިކޮށް، ދީނީ ޚިދުމަތްތައް އިތުރަށް ހަރުދަނާކުރުމަށް ކުރެވޭ މުހިންމު މަސައްކަތެއްކަން ފާހަގަކުރެވެއެވެ.