މިދިޔަ ހުކުރު ދުވަހު ސިނަމާތަކަށް ގެނައި ޑައިރެކްޓަރު އަނޫރާގް ސިންގްގެ ފިލްމު "ބޯޑާ 2" ރިލީޒްކުރިތާ އެންމެ ތިން ދުވަސްތެރޭ ބޮކްސް އޮފީހުގެ 100 ކްރޯޑު ކްލަބުން ޖާގަ ހޯދައިފިއެވެ. މި އަދަދާ އެކު ފިލްމު "ބޯޑާ 2" ވެފައި ވަނީ މިދިޔަ އަހަރު އެންމެ ބޮޑު ކާމިޔާބީއެއް ހޯދި ފިލްމު "ދުރަންދަރު"އަށް ވުރެ ކުރިން ރިލީޒްކުރިތާ އެންމެ ކުޑަ ދުވަސްކޮޅެއްގެތެރޭ 100 ކްރޯޑު ކްލަބުން ޖާގަ ހޯދި ފިލްމަށެވެ. ފިލްމު "ދުރަންދަރު"އަށް ފުރަތަމަ ހަފްތާ ބަންދުގައި 103 ކްރޯޑު ރުޕީސްގެ އާމްދަނީ ލިބުނުއިރު "ބޯޑާ 2"އަށް ލިބުނު އާމްދަނީގެ އަދަދު 121 ކްރޯޑު ރުޕީސްއަށް އަރައެވެ. ފިލްމު ސިނަމާތަކުގައި އެޅުވީ ހަފްތާ ބަންދާ ދިމާކޮށް ކަމަށްވެފައި އިންޑިއާގެ ޖުމްހޫރީ ދުވަހާ ދިމާކޮށް ލިބުނު ދިގު ހަފްތާ ބަންދުގައި ފިލްމު ބަލަން ސިނަމާއަށް ވަންނަ މީހުންގެ އަދަދު އިހުނަށްވުރެ އިތުރުވަމުން އަންނަ ކަމަށް ރިޕޯޓުތަކުން ވަނީ ބުނެފައެވެ. ފިލްމު "ބޯޑާ 2"ގެ މަންޒަރެއްގައި މޯނާ ސިންގް ސަނީ ޑިއޯލްއާ އެކު--ފޮޓޯ/ބޮލީވުޑްހަންގާމާ ފިލްމު "ބޯޑާ 2" އަކީ އެ ފިލްމުގެ ލީޑް އެކްޓަރު ސަނީ ޑިއޯލްގެ ވަރުގަދަ އެކްޝަން ތުރިލާ "ޖާޓް"އަށްފަހު ތިން ދުވަސްތެރޭ އެންމެ ބޮޑު އާމްދަނީއެއް ހޯދި ކެރިއަރުގެ ދެ ވަނަ ފިލްމެވެ. ޖޭޕީ ދައްތާ ފިލްމްސް އާއި ބުޝަން ކުމާރުގެ ޓީ-ސީރީސް ގުޅިގެން އުފެއްދި "ބޯޑާ 2"އަށް ކްރިޓިކުން ވެސް ވަރަށް ބޮޑަށް ތައުރީފުކޮށްފައިވާއިރު މި ފިލްމަކީ ބޮޑު ސްކްރީނުން ބަލާލުން މުހިއްމު ފިލްމެއް ކަމަށް ޓްރޭޑް އެނަލިސްޓް ތަރަން އަދާޝް ވެސް ވަނީ ބުނެފައެވެ. ފިލްމު ބެލުމަށްފަހު ތަރަން ބުނެފައި ވަނީ މިއީ ޤައުމިއްޔަތުކަން ވަރަށް ބޮޑަށް ފެނި އޭގެ އިހުސާސް ކުރެވުނު ފިލްމެއް ކަމަށެވެ. ފިލްމު "ބޯޑާ 2" އެއީ ފިލްމު ބަލަން ވަންނަ ކޮންމެ މީހަކު ވެސް ފަޚުރުވެރިވާނެ ފިލްމެއް ކަމަށާއި އެ ފިލްމުގެ ޓީމުން އިންޑިއާގެ ޤައުމިއްޔަތުކަން ދައްކައިދީ އަސްކަރީ ފޯސްއަށް ކުރީ އިހުތިރާމްގެ ސެލިއުޓެއް ކަމަށް ތަރަން ވަނީ ބުނެފައެވެ. ފިލްމަށް ކްރިޓިކުން ފަސް ތަރީގެ ރޭޓިންގްއެއް ދިންއިރު ބައެއް ފަރާތްތަކުން ދީފައި ވަނީ 4.5ގެ ރޭޓިންގްއެކެވެ. މި ފިލްމަކީ 1997 ވަނަ އަހަރު ޖޭޕީ ދައްތާ ޑައިރެކްޓްކޮށް ގެނެސްދިން "ބޯޑާ"ގެ ސީކުއަލްއެކެވެ. ފިލްމު "ބޯޑާ 2"ގެ ކާސްޓުގައި ހިމެނެނީ ސަނީ ޑިއޯލް، ވަރުން ދަވަން، އަހާން ޝެޓީ، ދިލްޖީތު ދޮސާންޖް، މޯނާ ސިންގް، ސޯނަމް ބާޖްވާ، އާންޔާ ސިންގް އަދި މޭދާ ރާނާއެވެ.