ލީގު ބުރުގެ ފަހު މެޗުގައި އަވައްޓެރި ސްރީ ލަންކާވެސް ބަލިކޮށް ސާފް ފުޓްސަލް ޗެމްޕިއަންޝިޕުގެ ހުރިހާ މެޗަކުން މޮޅުވުމުގެ ރެކޯޑާއެކު ރާއްޖެއިން ސަރަހައްދީ ފުޓްސަލް ރަސްކަން ހޯދައިފިއެވެ. މުބާރާތުގައި ރާއްޖެ ކުޅުނު ފަހު މެޗުގައި ލަންކާ އަތުން މޮޅުވެފައިވަނީ 5-2 ގެ ނަތީޖާއަކުންނެވެ. މެޗުގައި ރާއްޖޭގެ ފަރާތުން ފެނުނީ މޮޅު ކުޅުމެކެވެ. ފުރަތަމަ މެޗުގައި ޕާކިސްތާނު އަތުން 7-1 ގެ ނަތީޖާއަކުން ރާއްޖެ މޮޅުވިއިރު، ދެވަނަ މެޗުގައި ބަންގްލަދޭޝް އަތުން މޮޅުވީ 6-1 ގެ ނަތީޖާއަކުންނެވެ. ތިންވަނަ މެޗުގައި ސަރަހައްދުގެ ގަދަބާރު އިންޑިއާ އަތުން މޮޅުވީ 5-0 އިންނެވެ. ނޭޕާލް އަތުން 2-1 އިން މޮޅުވިއިރު، ބޫޓާންގެ މައްޗަށް ކުރިހޯދީ 3-1 އިންނެވެ. ރާއްޖެއިން ވަނީ ލަންކާ މެޗާ ކުރިމަތިލީ އިރުވެސް ސަރަހައްދުގެ ތަށި ޔަގީންކޮށްފައެވެ. ރާއްޖެއިން ތަށި ކަށަވަރުކުރީ ބޫޓާނާ ދެކޮޅަށް ކުޅުނު މެޗުގައި ހޯދި ތިން ޕޮއިންޓާއެކު އެވެ. މި މެޗުގައި ރާއްޖެއަށް ލީޑު ނަގައިދިން ލަނޑު ކެޕްޓަން މުހައްމަދު އިމްރާން (އިންމި) ކާމިޔާބުކުރީ މެޗުގެ 12 ވަނަ މިނެޓުގައެވެ. އޭގެ ފަސް މިނެޓުފަހުން ލަންކާއިން ނަތީޖާ އެއްވަރުކުރި ނަމަވެސް ފުރަތަމަ ހާފުގެ އެންމެ ފަހުކޮޅު ރާއްޖޭގެ ހުޒައިފަތު ރަޝީދު (ހުޒޭ) ވަނީ ލީޑު ނަގައިދީފައެވެ. ދެވަނަ ހާފު ފަށައިގެން ހަ ވަނަ މިނިޓްގައި ލަންކާއިން އެއްވަރުކުރި އިރު، އޭގެ ތިން މިނެޓު ފަހުން އަހުމަދު ހަމީދު (އައްމަޑޭ) ވަނީ ރާއްޖެއަށް އަނެއްކާވެސް ލަނޑެއް ޖަހާފައެވެ. އޭގެފަހުން ހުސެއިން ސުހައިލް (ސޮކޭ) ރާއްޖެއަށް ލީޑު ނަގައިދިންއިރު، މެޗުގެ 16 ވަނަ މިނެޓުގައި ރާއްޖޭގެ ފަސްވަނަ ލަނޑު ޖެހީ ކެޕްޓަން އިންމިއެވެ.