ދެކުނު އޭޝިއާގެ ފަތުރުވެރިކަމުގެ ސިނާޢަތުގައި ދޭ ޚިދުމަތްތަކުގެ އަގުވަޒަންކުރާ ސައުތު އޭޝިއަން ޓްރެވަލް އެވޯޑްސް (ސަޓާ)އަށް ކުރިމަތިލުމުގެ ފުރުސަތު ހުޅުވާލައިފިއެވެ. މި އަހަރު ސަޓާ އެވޯޑު ބާއްވަން ހަމަޖެހިފައިވަނީ އަވައްޓެރި ސްރީލަންކާގެ ވެރިރަށް ކޮލަމްބޯގައެވެ. މި އަހަރު ބާއްވާ ދިހަވަނަ ސަޓާ އެވޯޑަށް ދެ އާ ކެޓަގަރީއެއް ތައާރަފުކުރާނެއެވެ. އެއީ، އެންމެ މޮޅު ޝެފާއި އެންމެ މޮޅު ޒުވާން ހޮޓެލިއާގެ ކެޓަގަރީތަކެވެ. އެންމެ މޮޅު ޒުވާން ހޮޓެލިއާގެ ކެޓަގަރީއަށް ކުރިމަތިލެވޭނީ 40 އަހަރު ފުރިފައިނުވާ ނަމައެވެ. ސަޓާ އެވޯޑަކީ މުޅި ދެކުނު އޭޝިއާ ސަރަހައްދުގައި ބާއްވާ އެންމެ ބޮޑު އެއް ޓްރެވަލް އެވޯޑެވެ. އެ ގޮތުން، ރާއްޖޭގެ ވިޒިޓް މޯލްޑިވްސް ކޯޕަރޭޝަނާއި ޓްރެވަލް އޭޖެންޓުންގެ އެސޯސިއޭޝަން (އާޓާ)އާއި، ރާއްޖޭގެ ބޯޓިން އެސޯސިއޭޝަނާއި، ސްރީލަންކާގެ ހޮޓެލްތަކުގެ އެސޯސިއޭޝަން ފަދަ ދެކުނު އޭޝިއާ ސަރަހައްދުގައި ފަތުރުވެރިކަމާ ބެހޭ މައި 15 އިދާރާއަކުން މި އެވޯޑަށް އިތުބާރުކުރެއެވެ. ސަޓާ އެވޯޑު ހަފުލާ ވަނީ ރާއްޖެއާއި ސްރީލަންކާއާއި އިންޑިއާއާއި ނޭޕާލު ހިމެނޭހެން އެކި ތަންތަނުގައި ވޭތުވެދިޔަ އަހަރު ބާއްވައިފައެވެ. މި އެވޯޑު ހަފުލާއަށް ބޭރުގެ އެކި މީޑިއާތަކާއި ޓްރެވަލް ދާއިރާގައި ހަރަކާތްތެރިވާ އިސްވެރިންގެ ސަމާލުކަން ވެސް ލިބިފައިވެއެވެ. އެކި ކެޓަގަރީތަކުން އެވޯޑު ލިބޭ ފަރާތްތައް ކަނޑައަޅަނީ ޓްރެވަލް ދާއިރާގެ މާހިރުންނާއި ތަޖުރިބާކާރު ފަނޑިޔާރުންގެ ޕެނަލަކުންނެވެ.