އަންނަ އޭޕްރީލް މަހު ބާއްވާ ލޯކަލް ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުގައި ވޯޓު ލެވޭ މީހުންގެ ރަޖިސްޓްރީއަށް ގެނައި ބަދަލުތައް އާންމުކޮށް، ޝަކުވާ ހުށަހަޅަން އިލެކްޝަންސް ކޮމިޝަން (އީސީ)އިން މިއަދު ހުޅުވާލައިފިއެވެ. އެ އިންތިޚާބުގައި ވޯޓު ލުމުގެ ހައްގު ލިބިގެންވާ މީހުންގެ ރަޖިސްޓްރީ ފުރަތަމަ އާންމުކުރީ، މި މަހު ހަތެއްގައެވެ. އޭރު އެ ލިސްޓަށް ޝަކުވާ ހުށަހަޅަން މި މަހު18ގެ 12:00އަށް ފުރުސަތު ދިނެވެ. މުއްދަތު ހަމަވިއިރު، އެ ލިސްޓަށް 700އަށް ވުރެ ގިނަ މީހުން ޝަކުވާ ހުށަހެޅިއެވެ. އޭގެތެރޭގައި ގިނައީ، އެޑްރެސް ބަދަލު ކުރުމަށް ހުށަހެޅި މީހުން ކަމަށް އޭރު އީސީން ވަނީ ބުނެފައެވެ. https://sun.mv/216846 އިންތިޚާބެއްގެ ތެރެއިން: ކައުންސިލް އިންތިޚާބުގައި ވޯޓު ލެވޭ މީހުންގެ ރަޖިސްޓްރީއަށް ގެނައި ބަދަލުތަކަށް ޝަކުވާ ހުށަހަޅަން ވަނީ ހުޅުވާލާފައި -- ސަން ފޮޓޯ/ މުޙައްމަދު ޝާތިއު އަބްދުﷲ އެ ބަދަލުތަކާ އެކު، އަލުން މިއަދު އީސީން ވަނީ، އިންތިޚާބުގައި ވޯޓު ލެވޭ މީހުންގެ ރަޖިސްޓްރީއަށް ޝަކުވާ ހުށަހަޅަން ހުޅުވާލާފައެވެ. އެ ލިސްޓަށް ޝަކުވާ ހުށަހެޅޭނީ އަންނަ މަހު އަށެއްގެ 15:00ގެ ނިޔަލަށެވެ. އެއީ، އެ ކޮމިޝަނުގެ މައި ޕޯޓަލް މެދުވެރިކޮށެވެ. މިއަދު އާންމުކުރި ލިސްޓުން އެނގޭ ގޮތުގައި، ވޯޓު ލުމުގެ ހައްގު ލިބިފައިވާ 560 މީހުންގެ އެޑްރެސް ވަނީ ބަދަލުކޮށްދީފައެވެ. އަދި، ނިޔާވެފައިވާތީ ވޯޓު ލުމުގެ ހައްގު ލިބިފައިވާ 61 މީހުން ލިސްޓުން އުނިކޮށްފައިވާއިރު، ދިހަ މީހުންގެ ދާއިރާ ބަދަލުކޮށްދީފައިވެއެވެ. މީގެ އިތުރުން، ހަ މީހުންގެ ނަން ބަދަލުކޮށްފައިވާ ކަމަށް އެ ލިސްޓުން ދައްކައެވެ. އީސީން ބުނީ، ރަޖިސްޓްރީގައި ހިމާނަފައިވާ މައުލޫމާތަށް ބަދަލު ގެނައުމަށް ހުށަހަޅާއިރު، ޝަކުވާގެ ސައްހަކަން ސާބިތުވާނެ ރަސްމީ ލިޔުމެއްގެ ކޮޕީ ހުށަހަޅަން ވާނެ ކަމަށެވެ. އީސީން ބުނި ގޮތުގައި، އިންތިޚާބުގައި ވޯޓު ލުމުގެ ހައްގު ލިބެނީ، 294،937 މީހުންނަށެވެ. އެއީ، 150،410 ފިރިހެނުންނާއި 144،527 އަންހެނުންނެވެ. އަންނަ އޭޕްރިލް މަހުގެ ހަތަރު ވަނަ ދުވަހު ބާއްވާ ކައުންސިލް އިންތިޚާބުގައި ކައުންސިލްތަކުގެ ޖުމްލަ 225 ދާއިރާއަކަށް މެންބަރުން އިންތިޚާބު ކުރަންޖެހެއެވެ.