ނިމިދިޔަ އެމްޑީޕީ ސަރުކާރުގެ ގެދޮރުވެރިޔާ ސްކީމްގެ ދަށުން ދޫކުރާ ފްލެޓުތަކަށް ޝަރުތުހަމަވާން 75 ޕޮއިންޓް ލިބުނު މީހުންގެ ތެރެއިން ބާކީވި މީހުންނަށް، ދެ ކޮޓަރީގެ ފުލެޓުތައް ދޭން ކުރިން ބުނި ނަމަވެސް، މިހާރު އެ އުސޫލު ބަދަލުކޮށް، ފުލެޓުތައް ދޭނީ ނިކަމެތި ހާލުގައި އުޅޭ މީހުންނަށް ކަމަށް ހައުސިން މިނިސްޓަރު ޑރ. އަބްދުالله މުއްތަލިބު މިއަދު ވިދާޅުވެއްޖެއެވެ. ގެދޮރުވެރިޔާ ސްކީމަށް ފުލެޓު ދޫކުރުމަށް ކުރީ ސަރުކާރުން ކަނޑައަޅައިފައި އޮތީ، 76 ޕޮއިންޓް ލިބޭ މީހުންނަށް ތިން ކޮޓަރީގެ ފުލެޓުތައް ދިނުމަށް ފަހު، 75 ޕޮއިންޓް ލިބުނު މީހުންގެ މެދުގައި ގުރު ނަގައިގެން ބާކީ ހުރި ތިން ކޮޓަރީގެ ފުލެޓުތައް ދިނުމަށެވެ. އެހެންނަމަވެސް، 76 ޕޮއިންޓް ލިބޭ 300އަށްވުރެ ގިނަ މީހުންނަށް ފުލެޓު ކަނޑަނާޅައި، 75 ޕޮއިންޓް ލިބުނު ބައެއް މީހުންނަށް ފުލެޓު ދިން މައްސަލައެއް ފެންމަތިވިއެވެ. އެ މައްސަލަ މި ސަރުކާރުގެ ހައުސިން މިނިސްޓްރީން ވަނީ އެންޓި ކޮރަޕްޝަން ކޮމިޝަން (އޭސީސީ)އަށް ވެސް ހުށަހަޅައިފައެވެ. https://sun.mv/212558 އެފަހުން އޮކްޓޯބަރު 12، 2025ގައި ބޭއްވި ނޫސްވެރިންގެ ބައްދަލުވުމުގައި މުއްތަލިބު ވިދާޅުވީ 76 ޕޮއިންޓު ލިބި، ތިން ކޮޓަރީގެ ފުލެޓު ނުލިބޭ 330 މީހުން ތިބި ކަމަށާއި، އެ އެންމެންނަށްވާ ވަރަށް ތިން ކޮޓަރީގެ ފުލެޓު ހަމަނުވާ ކަމަށެވެ. އެހެންވެ، 75 ޕޮއިންޓް ލިބުނު މީހުންގެ އަތުން ފްލެޓުތައް ކެންސަލްކުރީ ކަމަށް އޭނާ ވިދާޅުވިއެވެ. އަދި ތިން ކޮޓަރީގެ ފުލެޓުތަކުގެ ބަދަލުގައި، 75 ޕޮއިންޓު ލިބުނު މީހުންނަށް ދެ ކޮޓަރީގެ ފުލެޓުތައް ވެސް ދޭންޖެހިދާނެ ކަމަށް އެ ދުވަހު މުއްތަލިބު ވިދާޅުވިއެވެ. އެފަދައިން ބުނެފައި އޮތްއިރު ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު މުއްތަލިބު ވިދާޅުވީ 75 މާކްސް ލިބުނު މީހުންގެ މެދުގައި ނޮވެމްބަރު 16، 3023ގައި ގުރުއަތުން ނަގައި، ގުރުއަތުން ނުހޮވޭ ފަރާތްތަކާ މެދު އަމަލުކުރާނީ ކިހިނެއްތޯ ވަރަށް ގިނަ މީހުން ސުވާލުކުރާ ކަމަށެވެ. އެކަމާ ގުޅިގެން މިހާތަނަށް ސަރުކާރުން ބުނަމުން އައީ އެކަށީގެންވާ ވަރަކަށް ފްލެޓް ބާކީވާނަމަ އެފަރާތްތަކަށް ފުރުސަތު ދޭނެ ކަމަށް ކަމަށް މުއްތަލިބު ވިދާޅުވިއެވެ. އެހެންނަމަވެސް މިހާރު ތިން ކޮޓަރީގެ ފްލެޓުތައް އެއްކޮށް ހަވާލުކޮށް ނިމިފައިވާ ކަމަށާއި، ދެ ކޮޓަރީގެ ވެސް ހުރީ ވަރަށް މަދު ފުލެޓުތައްކަން މިނިސްޓަރު ފާހަގަކުރެއްވިއެވެ. އެހެންކަމުން 75 ޕޮއިންޓް ލިބުނު ފަރާތްތަކުގެ މެދުގައި 16 ނޮވެމްބަރުގައި ގުރުއަތު ނަގާފައި ހުރުމުން އިތުރު ގުރުއަތަކަށް ގޮސްގެން އެ އުސޫލު އިތުރަށް ކުރިއަށް ނުގެންދާނެ ކަމަށް މުއްތަލިބު ވިދާޅުވިއެވެ. އޭގެ ބަދަލުގައި ސަރުކާރުން ކަނޑައަޅާފައި އޮތް އުސޫލުގެ ތެރެއިން ބާކީ ހުރި ދެ ކޮޓަރީގެ ފުލެޓުތައް ނިކަމެތި ހާލުގައި އުޅޭ ފަރާތްތަކަށް ދޭން އިސްކަންދޭނެ ކަމަށް މުއްތަލިބު ވިދާޅުވިއެވެ. ސަރުކާރުން ކަނޑައަޅާފައި އޮތް އުސޫލުގެ ތެރެއިން ބާކީ ހުރި ދެ ކޮޓަރީގެ ފުލެޓުތައް ކަނޑައެޅުމުގެ މަސައްކަތް ކުރިއަށްގެންދާއިރު، ނިކަމެތި ހާލުގައި އުޅޭ ފަރާތްތަކަށް އިސްކަންދެވޭކަހަލަ ގޮތަކަށް [ކުރާނަން]. އެހެންނަމަވެސް މިދެންނެވި ގޮތަކީ، 75ގެ ގުރުއަތު ނަގާފައި ހުރުމާއެކު ބާކީ ގުރުއަތު ނުނަގާ ހުރި 475 ފަރާތަކަށް ވަކި އިތުރު ގުރުއަތެއް ނަގައިގެން ކުރިއަށްގެންދާ ގޮތަކަށް އަޅުގަނޑުމެން ކަނޑައަޅާފައެއް ނުވާނެ، ހައުސިން މިނިސްޓަރު ޑރ. އަބްދުالله މުއްތަލިބު ގެދޮރުވެރިޔާ ފުލެޓުތަކުގެ ތެރެއިން، 76 ޕޮއިންޓު ލިބުނު އެންމެންނަށް ފުލެޓު ކަނޑަނާޅަނީސް 75 ޕޮއިންޓް ލިބުނު މީހުންނަށް ފުލެޓު ދިނުމާ ގުޅޭ ގޮތުން، ކުރީގެ ސަރުކާރުގައި ފުލެޓާއި ގޯތި ދޫކުރުމުގައި އިސްކޮށް ހުންނެވި، ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވަނީ ސަރުކާރުގެ ތުހުމަތަށް ރައްދު ދެއްވައިފައެވެ. އޭނާ ވިދާޅުވީ 76 މާކްސް ލިބުނު މީހުންގެ ތެރެއިން ގުރު ނަގައިފައި ނުވަނީ ދެ ފުލެޓަށް ޝަރުތު ހަމަވި ދެމަފިރިންގެ އެކަނި ކަމަށެވެ. އެގޮތަށް ދިމާވި މީހުންނަށް، ކޮންމެ ދެމަފިރިއަކަށް އެއް ފުލެޓް ރިޒާވްކޮށްފައި ހުންނާނެ ކަމަށާއި، މިނިސްޓްރީން މައުލޫމާތު އޮޅުވާލަނީ ކަމަށް އަކްރަމް ތުހުމަތުކުރައްވައިފައިވެއެވެ.