ފެންނަ ހުވަފެނާއިމެދު ކަންބޮޑުވުމެއް ނެތެވެ. ނަމަވެސް ހުވަފެނުގައި ފެނުނު ކަންކަމަށް ވިސްނަންވާނެއެވެ. އެހެނީ ހެޔޮ ގޮތުގައި ތިބެން މަސައްކަތްކުރާ މީހުންނަށް ފެންނަ ހުވަފެންތަކަކީ ލިބޭ މެސެޖްތަކެވެ. ބައެއް ހުވަފެންތައް ފެންނަނީ ﷲ ތަޢާލާގެ ޙަޟްރަތުންނެވެ.  
ހެޔޮ ޢަމަލުތައް ކުރަމުންދާ މީހުންނަށް އިހްމާލްވެވޭ ކަންކަމާއި އިޞްލާޙްކުރަންވީ ކަންކަންވެސް ހުވަފެނުގައި ދައްކަވަތެވެ. ހުވަފެނުގައި ފެންނަ ކަންކަމަށް ހޭލުންތެރިވާން މިބުނަނީ އެ ސަބަބަށްޓަކައެވެ.  
ފެންނަ ހުވަފެންތަކާއިމެދު ސަމާލުކަންދޭންވީ ބައެއް ކަންކަން:  
ކޮންމެ މީހަކަށްވެސް ކޮންމެ ފަދަ ހުވަފެނެއްވެސް ފެނިދާނެއެވެ. އެއީ މައްސަލައެއް ނޫނެވެ. ހުވަފެނެއް ފެނުމަކީ އެހައި ބޮޑުކަމެއް ކަމަށް ނުދެކޭށެވެ. އެހެނީ ހުވަފެނުގެ އެތައް ބާވަތެއް އެބަހުރެއެވެ. ހުވަފެން ފެންނަ ސަބަބުތައްވެސް ގިނައެވެ.   
ފެންނަ ހުވަފެނުގެ ތެރޭގައި ޢާންމުކޮށް ހިމެނެނީ 3 ބާވަތެއްގެ ހުވަފެނެވެ. ފުރަތަމަ ބާވަތަކީ ﷲ ތަޢާލާ އެމީހަކަށް ދައްކަވާ ކަންކަމެވެ. ދެވަނަ ބާވަތަކީ ޝައިޠާނާ ދައްކާ ކަންކަމެވެ. 3 ވަނަ ބާވަތަކީ އެމީހަކު ކަމަކާއިމެދު ފިކުރުކުރާނަމަ އެކަމުގެ ސަބަބުން ފެންނަ ހުވަފެންތަކެވެ.  
ފެނުނު ހުވަފެނަކީ ތިމާއަށް ފައިދާކޮށްފާނެ ހުވަފެނެއްކަމަށް ޤަބޫލުކުރެވޭނަމަ ޙަޤީޤަތަކަށް ހެދުމަށް މަސައްކަތްކުރާށެވެ! ﷲ ތަޢާލާ އިރާދަކުރެއްވެވި އަޅަކަށް ހިންމަވައި ދެއްވަވާނެތެވެ. އުންމީދާއިއެކު ދުޢާކުރަމުން ކާމިޔާ ދެއްވަވާނެތެވެ. ޔޫސުފް ސޫރަތުން އެކަން އެނގިގެންދެއެވެ.  
މިބުނަނީ ހުވަފެނުގައި ތިބާ ހެޔޮ އަމަލެއް ކުރަނިކޮށް ފެނިއްޖެ ނަމަ އެކަމެއް ކުރަން މަސައްކަތްކުރާށެވެ! ތިބާ ޢާންމުކޮށް ނުކުރާ އަޅުކަމެއް ކުރަނިކޮށް ފެނިއްޖެ ނަމަ އެކަމެއް ކުރަން އަވަސްވެގަންނާށެވެ! ކުރަމުން އަންނަ ޢަމަލެއް ނުކުރެވި އިހްމާލްވަމުންދަނިކޮށް އެކަން ފެނިއްޖެނަމަ އެކަމެއް ކުރަން އަވަހަށް ފަށާށެވެ. އެހުވަފެނަކީ އެކަމެއް ކުރުމަށް ތިބާއަށް ކުރެއްވެވި އިލްހާމެއްކަމަށް ދެކޭށެވެ!  
ހުވަފެނުގައި މައިންބަފައިން ފެނިއްޖެނަމަ އެމީހުންނަށްޓަކައި ހެޔޮދުޢާކޮށް ޞަދަޤާތްކުރުން ފަދަ ކަންކަންކުރާވެ! އެމީހުން ދުނިޔޭގައި ތިބިނަމަ އެމީހުންނާއި ބައްދަލުކުރާށެވެ! އެހެނީ ހުވަފެނުގައި އެމީހުން އެފެނުނީ އެމީހުން ތިބާއަށް އިންތިޒާރުކުރާތީ ކަމަށްވެސް ވެދާނެއެވެ. ވީމާ ފޯނުންނަމަވެސް ގުޅައި ޙާލުބަލާށެވެ! އެމީހުން ތިބީ ތިބާގެކިބައިން ކަމަކަށް އެދިގެންކަމަށްވެދާނެއެވެ!
 
- އިސްލާމީ ތިލަފަތުގެ ދަރުސަކުން