މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބާއްވާ މިއުޒިކަލް ޑްރިލް ޑިސްޕްލޭ މިއަދު ހަވީރު އާޓިފިޝަލް ބީޗުގައި ކުރިއަށް ގެންދާ ގޮތަށް ހަމަޖެހިއްޖެއެވެ.
އެމްއެންޑީއެފްއިން މައުލޫމާތުދޭ ގޮތުގައި، މިއުޒިކަލް ޑްރިލް ޑިސްޕްލޭ އާޓިފިޝަލް ބީޗުގައި އޮންނާނީ މިއަދު ހަވީރު 16:30 ގައި އަދި 17:15 ގައިއެވެ.
އަދި 14 ނޮވެންބަރު ވާ ހޮނިހިރު ދުވަހު (މާދަމާ) 16:30 ގައި ހުޅުމާލޭ ސެންޓްރަލް ޕާކް ސަރަހައްދުގައި ޑިސްޕްލޭ ބާއްވާގޮތަށް ވަނީ ހަމަޖެހިފައެވެ.
މިއުޒިކަލް ޑްރިލް ޑިސްޕްލޭ އަކީ އަސްކަރީ ސިފަވަންތަކަމާއި ސަފުތަކުގެ ބަދަހިކަމާއި އެއްބައެއްގެ ގޮތުގައި މަސައްކަތްކުރުމުގެ މަތިވެރި ރޫޙު ވަރަށް ފުރިހަމައަށް ދައްކުވައިދޭ ހެވިކަމެކެވެ. އަދި މެހިތަރުގެ އެއްވެސް ކޮމާންޑެއް ނެތި ވަކި ސީކުއެންސަކަށް ސިފައިން އެއްބައެއްގެ ގޮތުގައި ހެވިކަމުގެ އެކިއެކި ހަރަކާތްތައް ދައްކުވައިދޭ މަންޒަރުތައް ހިމެނޭ ކަމެކެވެ.
ޖުމްހޫރީ ދުވަހުގެ މުނާސަބަތުގައި ގައުމީ ދިފާއީ ބާރުން ވަނީ މިދިޔަ ބުދަ ދުވަހު ވެސް މިއުޒިކަލް ޑްރިލް ޑިސްޕްލޭއެއް ބާއްވާފައެވެ.