އިލެކްޝަން ކޮމިޝަންގެ މެމްބަރު ކަމަށް އައްޔަން ކުރެއްވުމަށް ރައީސުލްޖުމްހުރިއްޔާ އަބުދުﷲ ޔާމީން މަޖިލީހަށް ފޮނުއްވާފައިވާ ތިން ބޭފުޅުންގެ ނަންފުޅު ދިރާސާ ކުރެއްވުމަށް މިނިވަން މުއައްސަސާތަކުގެ ކޮމެޓީއަށް ފޮނުވައިފި އެވެ.
މަޖިލީހުގެ ރުހުން އޮތްތޯ ބެލުމަށް މަޖިލީހަށް ރައީސް ފޮނުވާފައިވާ ތިން ނަމަކީ އެ ކޮމިޝަނުގެ ކުރީގެ ސެކްރެޓަރީ ޖެނަރަލްގެ ބ. އޭދަފުށި، ހަތިހާ، އާސިމް އަބްދުއްސައްތާރާއި ނ. ވެލިދޫ، އާހިޔާ، އައިޝަތު ހަފީޒް އާއި ގއ. މާމެންދޫ، އަލިވާގެ އަމްޖަދު މުސްތަފާ އެވެ.
އިލެކްޝަންސް ކޮމިޝަނަށް ތިން މެމްބަރެއްގެ ނަންފުޅު ފޮނުއްވާފައި މިވަނީ މިހާރު އެކޮމިޝަނުގައި ތިއްބެވި މުހައްމަދު ފާރޫގު އާއި އަލީ މުހައްމަދު މަނިކުގެ ދައުރު އަންނަ ނޮވެމްބަރު މަހުގެ 24 ވަނަ ދުވަހުގެ ނިޔަލަށް ހަމަވާތީ އެވެ.
އޭގެ އިތުރުން އިލެކްޝަންސް ކޮމިޝަނުގައި ތިއްބެވި އެ ކޮމިޝަނުގެ ރައީސް ފުއާދު ތައުފީގާއި ނައިބު ރައީސް އަހްމަދު ފަޔާޒް މަގާމުން ވަކި ވެފައިވާ ކަމަށް ސުޕްރީމް ކޯޓުން މިދިޔަ އަހަރު ކަނޑައަޅާފައި ވާތީ އެ ދެ މެމްބަރުންގެ ބަދަލުގައި ވެސް ދެ މެމްބަރުން އައްޔަން ކުރުމަށް ރައީސް ވަނީ ހަތަރު ބޭފުޅެއްގެ ނަންފުޅު މަޖިލީހަށް ފޮނުވާފަ އެވެ. ނަމަވެސް އެ ބޭފުޅުންނާ މެދު އަދި މަޖިލީހުން ގޮތެއް ނިންމާފައެއްނުވެ އެވެ.