އަބޫދާބީ (ސެޕްޓެމްބަރު 30) - އަބޫދާބީގެ އެއާލައިން، އިއްތިހާދު އެއާވޭސް އަށް މިއަހަރު އާމްދަނީގެ ގޮތުގައި ފަސް ބިލިއަން ޑޮލަރު ލިބޭނެ ކަމަށް ބުނެފި އެވެ. ޔުނައިޓެޑް އެރެބް އެމިރޭޓްސްގެ ގައުމީ އެއާލައިންގެ ޗީފް އެގްޒެކްޓިވް އޮފިސަރު ޖޭމް ހޯގަން ވިދާޅުވީ މިދިޔަ އަހަރު އެ އެއާލައިނަށް 4.1 ބިލިއަން ޑޮލަރު އާމްދަނީގެ ގޮތުގައި ލިބިފައިވާ ކަމަށެވެ. އިއްތިހާދު އެއާވޭސްއިން ރާއްޖެއަށް މިދިޔަ އަހަރުގެ ނޮވެމްބަރު މަހުން ފެށިގެން ކޮންމެ ދުވަހަކު ޝެޑިއުލް ދަތުރުތައް ބާއްވަން ވަނީ ފަށައިފަ އެވެ. އަބޫދާބީގައި އޮތް ވޯލްޑް ރޫޓް ޑިވެލޮޕްމަންޓް ސްޓްރެޓެޖީ ސަމިޓްގައި ހޯގަން ވިދާޅުވީ މިދިޔަ އަހަރުގެ ވެސް އެ އެއާލައިނަށް ސާފު ފައިދާގެ ގޮތުގައި 14 މިލިއަން ޑޮލަރު ލިބިފައިވާ ކަމަށެވެ. އެއީ 2003 ވަނަ އަހަރުގެ ފަހުން ފައިދާވި އަހަރު ކަމަށް ވެސް އޭނާ ވިދާޅުވި އެވެ. ބާރަށް ކުރިއަރަމުން އަންނަ އެ އެއާލައިނަށް މިއަހަރުގެ ފުރަތަމަ ހަ މަސްދުވަހު 281 މިލިއަން ޑޮލަރު އާމްދަނީގެ ގޮތުގައި ލިބިފައިވެ އެވެ. މީގެ ތެރޭގައި ގުޅިފައިވާ އެއާލައިންތަކުން ލިބުނު އާމްދަނީ ވެސް ހިމެނެ އެވެ. އިއްތިހާދު އެއާވޭސްގެ ހިއްސާވާ އެއާލައިންތަކުގެ ތެރޭގައި އަޔަލެންޑްގެ އެއާ ލިންގަސް، އެއާ ބާލިން، އެއާ ސީޝެލްސް އަދި ވާޖިން އޮސްޓްރޭލިއާ ހިމެނެ އެވެ. އެ އެއާލައިންގައި 67 މަތިންބޯޓު އޮޕަރޭޓްކުރެ އެވެ. އޭގެ ތެރެއިން ގިނަ ބޯޓުތަކުގެ އެވްރެޖް އުމުރަކީ 4.9 އަހަރެވެ. އިއްތިހާދު އެއާވޭސްއާ އެންމެ ބޮޑަށް ވާދަކުރަނީ އެ ގައުމުގެ ދުބާއީގެ އެމިރޭޓްސް އާއި ގަތަރު އެއާވޭސް އެވެ. މި ތިން އެއާލައިނުން ދަނީ ޔޫރަޕާއި އޭޝިއާ އަދި އޮސްޓްރޭލިއާއަށް ކުރާ ދަތުރުތައް އިތުރުކުރުމަށް މަސައްކަތްކުރަމުންނެވެ. "އަޅުގަނޑުމެން މިގެންދަނީ އަޅުގަނޑުމެން އަވަށްޓެރިންނާއެކު ވާދަކުރަމުން،" ގަލްފް ސަރަހައްދުގައި ވަރުގަދަ ތިން އެއާލައިންގެ ވާދަވެރިކަމާ ބެހޭ ގޮތުން ހޯގަން ވިދާޅުވި އެވެ. އޭނާ ވިދާޅުވީ ގައުމީ އެއާލައިނަށްވި ނަމަވެސް ވާދަވެރިންނާ އަރާ ހަމަކުރުމަށް އަދިވެސް ވަގުތު ނަގާނެ ކަމަށެވެ. "އަޅުގަނޑުމެން އެ ވާހަކަ ދައްކާއިރު އަޅުގަނޑުމެންނަކީ ޔޫއޭއީ އެންމެ ވާދަވެރި އެއާލައިންގެ ދެ ބައިކުޅަ އެއްބައިވަރުގެ ބައެއް،" މެދުއިރުމަތީގެ އެންމެ ބޮޑު އެއާލައިންއާ އަޅާ ކިޔަމުން އޭނާ ހޯގަން ވިދާޅުވި އެވެ. -- އޭއެފްޕީ