ރައްޔިތުންގެ މަޖިލީހުގެ ފަރާތުން ޖުޑީޝަލް ސާވިސް ކޮމިޝަން (ޖޭއެސްސީ) ގައި އިންނަވާ މެމްބަރުގެ ގޮތުގައި ގުރައިދޫ ދާއިރާގެ މެމްބަރު އިބްރާހިމް ރިޒާ ހޮވުމަށްޓަކައި އޭނާގެ ނަން ޕީޕީއެމުން ހުށަހަޅައިފި އެވެ. މަޖިލީހުގެ މިއަދުގެ ޖަލްސާ އަށް ރިޒާގެ ނަން ހުށަހެޅުއްވީ ޕީޕީއެމްގެ ޕާލިމެންޓްރީ ގްރޫޕްގެ ލީޑަރު، ވިލިމާފަންނު ދާއިރާގެ މެމްބަރު އަހްމަދު ނިހާނެވެ. ރިޒާގެ އިތުރުން މަޖިލީހުގެ ފަރާތުން ޖޭއެސްސީ އަށް ހޮވާ މެމްބަރު ކަމަށް ކެންދޫ ދާއިރާގެ މެމްބަރު އަލީ ހުސައިންގެ ނަން ޖުމްހޫރީ ޕާޓީގެ ފަރާތުން ހުށަހެޅި އެވެ. އޭނާގެ ނަން މިއަދުގެ ޖަލްސާ އަށް ހުށަހެޅުއްވީ ދަނގެތީ ދާއިރާގެ މެމްބަރު އިހްލާމް އަހްމަދެވެ. ޖޭއެސްސީ އަށް އައްޔަން ކުރެއްވުމަށްޓަކައި މަޖިލީހުގެ މައިނޯރިޓީ ޕާޓީ، އެމްޑީޕީގެ ފަރާތުން މެމްބަރެއްގެ ނަމެއް ހުށައެއްނާޅަ އެވެ. ރިޒާ އާއި އަލީ ހުސައިންގެ ތެރެއިން ޖޭއެސްސީ އަށް އައްޔަން ކުރާނެ ބޭފުޅަކު މަޖިލީހުގެ މިއަދުގެ ވޯޓުގައި ހޮވާނެ އެވެ.