އާޓިފިޝަލް އިންޓެލިޖެންސްގެ ދާއިރާގައި ކުރިއަރަމުން އަންނަ ކުންފުނި އޯޕަންއޭއައި އިން އާންމުންނަށް އަމާޒުކޮށްގެން ނެރޭ ފުރަތަމަ ހާޑްވެއާ އުފެއްދުމެއްގެ ގޮތުގައި ސްކްރީނެއް ނުހިމެނޭ ޕޯޓަބަލް ސްމާޓް ސްޕީކަރެއް ބާޒާރަށް ނެރުމަށް ތައްޔާރުވަމުން އަންނަކަމަށް ބްލޫމްބާގް ނިއުސްއިން ރިޕޯޓުކޮށްފިއެވެ. މި ޚަބަރު ފެތުރިފައި މި ވަނީ، އޯޕަންއޭއައި އިން އެޕަލްގެ ސިއްރު މައުލޫމާތުތަކެއް ވަގަށް ނަގާފައިވާކަމަށް ބުނެ، އެޕަލް ކުންފުނިން އޯޕަންއޭއައި އަދި އެޕަލްގެ ކުރީގެ ދެ މުވައްޒަފެއްގެ މައްޗަށް ދައުވާކޮށްފައިވާ ދަނޑިވަޅެއްގައެވެ. އެޕަލްއިން ތުހުމަތުކުރާ ގޮތުގައި އޯޕަންއޭއައި އިން ވަނީ ކޮންސިއުމާ ހާޑްވެއާ ވިޔަފާރީގެ ތެރެއަށް ވަނުމަށްޓަކައި އެޕަލްގެ ކުރީގެ މުވައްޒަފުންނާއި ސަޕްލަޔަރުން ބޭނުންކޮށްގެން އެ ކުންފުނީގެ މުހިންމު މައުލޫމާތުތަކެއް ސިއްރިޔާތުގައި ހޯދާފައެވެ. މިހާރުވެސް ތަރައްޤީކުރުމުގެ މަރުހަލާގައިވާ މި ޑިވައިސް ފަރުމާކޮށްފައި ވަނީ ގޭތެރޭގައި ގެންގުޅޭ އިންސާނަކާ އެއްފަދަ އޭއައި ބައިވެރިއެއްގެ ގޮތުގައެވެ. އޯޕަންއޭއައިގެ އަޑު ފެތުރިފައިވާ ހާޑްވެއާ ޕްރޮޑަކްޓަކީ ހޯމްޕޮޑް އެއް ފަދަ ވަރަށް ތަފާތު ޑިވައިސްއެއް --- މި ސްޕީކަރު މެދުވެރިކޮށް ގޭތެރޭގެ ސްމާޓް ވަސީލަތްތައް ކޮންޓްރޯލްކުރުމާއި، މީޑިއާ ޕްލޭކުރުމާއި، ސުވާލުތަކަށް ޖަވާބުދިނުމުގެ އިތުރުން މެސެޖުތަކަށް ރައްދުދިނުމާއި ޗެޓްޖީޕީޓީގެ އެހެނިހެން ފުރިހަމަ ޚިދުމަތްތައް ލިބިގެންދާނެއެވެ. އަދި މީގެ އިތުރުން ކެމެރާއާއި ސެންސަރުތައް ބޭނުންކޮށްގެން ބޭނުންކުރާ މީހާގެ ވަށައިގެންވާ މާހައުލު ދެނެގަތުމުގެ ޤާބިލުކަންވެސް އާންމު ސްމާޓް ސްޕީކަރުތަކަށްވުރެ ފުރިހަމައަށް މި ޑިވައިސްއަށް ލިބިފައިވާނެކަމަށް ރިޕޯޓުތައް ބުނެއެވެ. މި ޑިވައިސް އުފެއްދުމުގެ މަސައްކަތުގައި އެޕަލްގެ ކުރީގެ މަޝްހޫރު ޑިޒައިނާ ޖޮނީ އައިވްގެ ސްޓޫޑިއޯ، 'ލަވްފްރޮމް' އިން ދަނީ އެހީތެރިކަން ފޯރުކޮށްދެމުންނެވެ. އޯޕަންއޭއައި އިން ވަނީ ފާއިތުވި އަހަރު 6.5 ބިލިއަން ޑޮލަރަށް ޖޮނީ އައިވްގެ އޭއައި ޑިވައިސް ސްޓާޓްއަޕް 'އައިއޯ' ގަނެފައެވެ. މި މަސައްކަތުގައި އައިފޯނާއި މެކް ފަދަ އުފެއްދުންތަކުގައި މަސައްކަތްކޮށްފައިވާ އެޕަލްގެ ކުރީގެ ގިނަ ޑިޒައިނަރުންނާއި އިންޖިނޭރުންވެސް ބައިވެރިވާކަމަށް ބްލޫމްބާގްއިން ފާހަގަކޮށްފައިވެއެވެ. މިއީ އޯޕަންއޭއައިއަށް އާމްދަނީ ހޯދުމުގެ އައު މަގަކަށް ވެގެންދާނެކަމަށް ބެލެވޭއިރު، މިކަމާ ގުޅޭގޮތުން އެކުންފުނިން އަދި ރަސްމީކޮށް އެއްޗެއް ބުނެފައެއް ނުވެއެވެ.