2031 ވަނަ އަހަރުގެ ނިޔަލަށް ސްޕޭނުގެ ބާސެލޯނާ އަށް ކުޅެން އުރުގުއޭގެ ޑިފެންޑަރު ރޮނަލްޑް އަރައުހޯ ކޮންޓްރެކްޓް އާކުރުމަށްފަހު އޭނާގެ ލޯބިވެރިޔާގެ އަބިގައިލް އޮލިވޭރާގެ ކިބައިން ކައިވެނި ކުރުމަށް އެދިއްޖެ އެވެ.
މި ދެ މީހުންނަށް ދެ ކުދިން ލިބިފައިވާއިރު އަރައުހޯގެ ހުށަހެޅުމަށް އޭނާގެ ލޯބިވެރިޔާ ވަނީ އާނ ބަސް ބުނެފަ އެވެ. ސޮއިކުރުމުގެ ރަސްމިއްޔާތުގައި އަރައުހޯގެ އާއިލާ ވެސް ބައިވެރިވި އެވެ.
އޭނާ ބާސެލޯނާގައި މަޑުކުރީ 25 އަހަރުގެ ޑިފެންޑަރު ގަތުމަށް އިނގިރޭސިވިލާތުގެ އާސެނަލް އާއި އިޓަލީގެ ޔުވެންޓަސްއިން ވަރަށް ބޮޑަށް މަސައްކަތް ކުރަނިކޮށެވެ. ހާއްސަކޮށް ޔުވެންޓަސްއިން ކުޅުންތެރިޔާއާއެކު އެއްބަސްވެ، އޭނާ ގަތުމަށް ބާސެލޯނާ އަށް 50 މިލިއަން ޔޫރޯ ވެސް ހުށަހެޅި އެވެ.
ނަމަވެސް އޭނާ ބާސެލޯނާގައި މަޑުކުރީ ބާސެލޯނާގެ ސްޕޯޓިން ޑައިރެކްޓަރު ޑެކޯއާއެކު ބޭއްވި ބައްދަލުވުންތަކަށްފަހު އެވެ. އަރައުހޯގެ ޝަރުތަކަށްވީ ތިން ކަމެކެވެ. އެއީ ބާސެލޯނާގެ ޓިމު ވަރުގަދަ ކުރުމާއި މިހާރަށްވުރެ ރަނގަޅު މުސާރައެއް ދިނުމާއި އޭނާ ގަންނަން ބޭނުންވާ ކުލަބުތަކަށް އެކަން ފަސޭހައިން ކުރެވޭނެ ގޮތަކަށް ކަންކަން ރާވާފައި ބޭއްވުމެވެ.
އޭނާގެ ކޮންޓްރެކްޓްގައި ރޭ ސޮއިކުރީ ބާސެލޯނާގެ އޮފީހުގައި ބޭއްވި ކުޑަ ރަސްމިއްޔާތެއްގައި ކުލަބުގެ ރައީސް ޖޯން ލަޕޯޓާ އެވެ. މި ރަސްމިއްޔާރުގައި ޑެކޯ އާއި ބާސެލޯނާގެ ނާއިބް ރައީސް ރަފާ ޔުސްޓޭ ވެސް ބައިވެރިވި އެވެ.
ޔޫރަޕުގައި މިވަގުތު ހުރި އެންމެ އިތުބާރު އެއް ޑިފެންޑަރުގެ ގޮތުގައި ގިނަ ބަޔަކު ދެކޭ އަރައުހޯ އަކީ 2018 ވަނަ އަހަރު ބާސެލޯނާއާ ގުޅުނު ކުޅުންތެރިއެކެވެ. އޭނާ ވަނީ މިހާތަނަށް ބާސެލޯނާ އަށް 150ވުރެ ގިނަ މެޗު ކުޅެދީފަ އެވެ.