ހިރިޔާ ސްކޫލްގެ ޕީޓީއޭ އިން އިންތިޒާމުކުރި ފުޓްސަލް މެޗަކަށްފަހު، އެ މެޗުގައި ކުޅުނު ބެލެނިވެރިއަކު ކުއްލި ގޮތަކަށް ނިޔާވެއްޖެއެވެ. 
އެޑިޔުކޭޝަން މިނިސްޓްރީން ބުނީ، ހިރިޔާ ސްކޫލްގެ ޕީޓީއޭ އިން އިންތިޒާމުކުރި ކުޅިވަރުހަރަކާތެއްގައި ރޭ ކުޅެވުނު ފުޓްސަލް މެޗެއް ނިމުނު ފަހުން ދަނޑުމަތީ އޮށޯތް ބެލެނިވެރިޔަކަށް ސިއްހީ މައްސަލައެއް ދިމާވިކަން ފާހަގަކުރެވިގެން ވަގުތުން ކައިރީގައި ހުރި އައި.ޖީ. އެމް .އެޗަށް  ގެންދެވުނުކަމަށް ސްކޫލުގެ ފަރާތުން މިނިސްޓްރީ އަށް އަންގާފައިވާ ކަމަށެވެ.
އަދި އެ ބެލެނިވެރިޔާ ނިޔާވެފައިވާކަމަށާ މިކަމުގައި އާއިލާ އާއި ސްކޫލަށް ފޯރުކޮށްދޭންޖެހޭ އެހީތެރިކަން މިނިސްޓްރީގެ ފަރާތުން ފޯރުކޮށްދެމުން ގެންދާނެ ކަމަށް ބުންޏެވެ.
Advertisement
މިއާއެކު މިނިސްޓްރީން ވަނީ ނިޔާވި ބެލެނިވެރިޔާގެ އާއިލާއަށް މިނިސްޓްރީގެ ފަރާތުން ތަޢުޒިޔާ ދަންނަވައި  މަރުޙޫމުގެ ފާފަތައް ފުއްސަވައި ދެއްވައި ސުވަރުގޭގެ މަތިވެރި ނިޢުމަތް ދެއްވަވައި , ޢާއިލާގެ އެންމެ ބޭފުޅުންނަށް ކެއްތެރިކަން ދެއްވުން އެދި ދުޢާ ކޮށްފައެވެ.
މައުލޫމާތު ލިބިފައިވާ ގޮތުގައި ނިޔާވެފައި ވަނީ އެ ސްކޫލްގެ ގްރޭޑް 10ގެ ބެލެނިވެރިއެއްކަމަށްވާ އަހްމަދު ޝަރީފް، ދަފުތަރު ނަންބަރު ރސ 12602/މާލެ އެވެ.