އާސަންދަ ނިޒާމަށް ގެންނަ ބަދަލަކުން ރައްޔިތުން ކަންބޮޑުވާން ނުޖެހޭނެ ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެ އެވެ. މިހާރު އިންޑިއާގެ ބައެއް ހޮސްޕިޓަލްތަކުން އާސަންދައިގެ ޚިދުމަތް ހުއްޓާލާފައިވާއިރު، އާސަންދައިން ފޯރުކޮށްދޭ ބޭސްތަކުގެ ލިސްޓަށް ގެނެވުނު ބަދަލާ ގުޅިގެން ގިނަ ބަޔަކަށް ބައެއް ބޭހާއި އިންޖެކްޝަންތައް ނުލިބޭ ހާލަތަށް ގޮސްފައިވެއެވެ. އަދި ޕްރައިވެޓް އިންޝުއަރެންސް އޮންނަ ފަރާތްތަކަށް އާސަންދައިގެ ޝަރުތުތަކަށް ގެނެވުނު ބަދަލުތަކާ ގުޅިގެން، ޑޮކްޓަރަށް ދެއްކުމާއި ޓެސްޓުތަކަށް އަމިއްލަ ޖީބުން ޚަރަދުކުރަން ޖެހިފައިވެއެވެ.
“އަޅުގަނޑު ކަށަވަރުކޮށްދޭން ބޭނުން ވަނީ މި ނިޒާމަށް އަންނަ ރިފޯމަކުން ދިވެހި ރައްޔިތުން ކަންބޮޑުވާންޖެހޭ އެއްވެސް ކަމެއް ނާންނާނެ،” ނާޒިމް ވިދާޅުވި އެވެ.
އާސަންދަ އިންޝުއަރެންސް ސްކީމުގެ ތެރެއިން އެ ހިދުމަތް އެންމެ ބޭނުންވާ ފަރާތްތަކަށް އެ ނިޒާމުގެ ފައިދާ ލިބި، ނިޒާމުގައި ހުރި “ލޫޕްހޯލްތައް” ބަންދުކުރެވިގެން ނޫނީ އެ ނިޒާމު ދެމެހެއްޓެން ނެތް ކަމަށްވެސް ނާޒިމް ވިދާޅުވި އެވެ. ނަމަވެސް އާސަންދައަކީ “އެ ޚިދުމަތް ބޭނުންވާ ފަރާތްތައް” ކަނޑައަޅައިގެން ދޭން ޖެހޭ ޚިދުމަތެއް ނޫނެވެ. އަދި އެފަދައިން އެ ޚިދުމަތް ދިނުމަކީ ޤާނޫނީ ކުށެކެވެ. ޤާނޫނުގައި އެ ޚިދުމަށް އެންމެންނަށް ހަމަހަމަކޮށް ދޭން ކަނޑައަޅާފައިވެއެވެ. އިނދިކޮޅުން ދަނީ ސަރުކާރުގެ އަމާޒަކީ ޕީއެންސީ މީހުންނަށް އެކަނި އާސަންދަ ދިނުން ކަމަށް ބުނެ ނުރުހުން ފާޅު ކުރަމުންނެވެ.
ހެލްތު އެކްސްޕޯ ފެށުމުގެ ރަސްމިއްޔާތުގައި ވާހަކަދައްކަމުން ނާޒިމް ވިދާޅުވީ އާސަންދަ ނިޒާމު ހަރުދަނާކޮށްގެން މެނުވީ ސިއްހީ ނިޒާމުގައި ރައްޔިތުންނަށް ފޯރުކޮށްދޭ ހިދުމަތްތައް އެންމެ ރަނގަޅު ގޮތުގައި ފުރިހަމަނުކޮށްދެވޭނެ ހަގީގަތެއް ކަމަށެވެ. ރައީސް ޑރ. މުހައްމަދު މުއިއްޒުގެ ބެއްލެވުމާއި އިރުޝާދުގެ ދަށުން އާސަންދަ ރިފޯމް ކުރުމުގެ މަސައްކަތް މިހާރު ކުރެވެމުންދާ ކަމަށާއި އެ ނިޒާމު ވެގެންދާނީ ރައްޔިތުންނަށް އުއްމީދު ގެނެސްދޭ އަދި ރައްޔިތުންނަށް ބަރުހެލި ކަމެއް ނެތި، ދެމެހެއްޓެނިވި ގޮތެއްގައި ސިއްހީ ނިޒާމު ކުރިއަށް ގެންދިޔުމަށް މަގުފަހިކޮށްދޭނެ ނިޒާމަކަށް ކަމަށް ވިދާޅުވި އެވެ.
މިނިސްޓަރުގެ ވާހަކަފުޅުގައި ވަނީ ޞިއްޙީ ދާއިރާއިން މި ވޭތުވެދިޔަ އެއް އަހަރު ދުވަހުގެ ތެރޭގައި ހޯދާފައިވާ ކާމިޔާބީތަކަށް ވެސް އަލި އަޅުވާލާފަ އެވެ. އެގޮތުން އެއަރ އެމްބިއުލާންސްގެ ޚިދުމަތާއި ، ކޮލިޓީ ބޭސް ، އަދި ކާބޯތަކެތީގެ ރައްކާތެރިކަމުގެ ޤާނޫނަށް އަމަލުކުރަން ފެށުން ފާހަގަކުރެއްވި އެވެ. ނަމަވެސް އެ ވިދާޅުވި އެއަރ އެމްބިއުލާންސްގެ ޚިދުމަތް ވަނީ ހުއްޓާލާފައެވެ. އަދި އޭރު އެއަރ އެމްބިއުލާންސްކަމަށް ދައްކާފައިވަނީ، އާދައިގެ ފްލައިޓެއްގައި ކުލަ ކޮޅެއްލާފައެވެ. އެމްބިއުލާންސް އަކަށް ބޭނުންވާ ޚިދުމަތްތަކާއި ވަސީލަތްތަކެއް އޭރުވެސް އޭގައި ނެތެވެ.