ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ކުރިއަށްގެންދާ ނައިންޓީ ޕްލަސް ގޯލްޑްކަޕް 2024 ގެ ސެމީ ފައިނަލުގައި ރ. އަލިފުއްޓާއި އައްޑޫ ސިޓީ ބައްދަލުކުރި މެޗު ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ޝަރަފްވެރިކޮށްދެއްވައިފި އެވެ.
މުޅި ރާއްޖެއަށް ހުޅުވާލައިގެން ކުރިއަށްގެންދާ މި މުބާރާތުގެ ސެމީ ފައިނަލުގައި އައްޑޫ ސިޓީން ވަނީ ރ. އަލިފުށީގެ މައްޗަށް 2-0 ގެ ނަތީޖާއަކުން ކުރިހޯދާފައެވެ. މި ނަތީޖާއާއެކު އަންނަ އަންގާރަ ދުވަހު ކުޅޭ ފައިނަލް މެޗުގައި ބައްދަލުކުރާނީ އައްޑޫ ސިޓީއާއި ބ. އޭދަފުއްޓެވެ. މުބާރާތުގެ ފައިނަލަށް އައްޑޫ ސިޓީ ދަތުރުކުރީ އެއްވެސް މެޗަކުން ބަލިނުވެއެވެ.
މެޗުގައި އައްޑޫ ސިޓީގެ ދެ ލަނޑު ކާމިޔާބުކުރީ ޝަމްވީލް ގާސިމް އާއި އިބްރާހީމް މަހުދީ ހުސައިން އެވެ. އަލިފުއްޓަށް ވެސް ވަނީ މި މެޗުގައި ލަނޑުޖަހާނެ ރަނގަޅު ފުރުސަތުތަކެއް ލިބިފައެވެ. އައްޑޫ ސިިޓީ އާއި އަލިފުށީގެ ގިނަ އަދަދެއްގެ ސަޕޯޓަރުންވެސް މިރޭގެ މެޗު ބެލުމަށް ދަނޑަށް ވަނެވެ. ފޯރިގަދަ ކުޅުމަކަށްފަހު އައްޑޫއިން މެޗު ގެންގޮސްފައިވާއިރު މި މެޗުގެ އެންމެ މޮޅު ކުޅުންތެރިއަކަށް ހޮވުނު ޝަމްވީލް ގާސިމްއެވެ. އޭނާއަށް ޓްރޮފީ ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބެވެ.
ޖުމްލަ 17 ޓީމާއެކު ކުރިއަށްދާ ނައިންޓީ ޕްލަސް ގޯލްޑް ކަޕަކީ ރަށްރަށުގެ ފުޓުބޯޅަ ފޯރި ދިރުވާ އާލާކުރުމުގެ މަގްސަދުގައި ރާއްޖޭގެ ތަޖުރިބާކާރު ކޯޗުންގެ ޓީމަކުން ރާވާ ހިންގަމުން އަންނަ ފުޓުބޯޅަ މުބާރާތެކެވެ.