މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ނައިބު ރައީސް, މުޙައްމަދު ފަޒީންގެ މައްޗަށް ތުހުމަތުކުރެވޭ ޖިންސީ ފުރައްސާރައިގެ މައްސަލައެއް ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީއިން ބަލަންފަށައިފިއެވެ. "ސަން" އަށް އެނގިފައިވާ ގޮތުގައި ފަޒީންގެ މައްޗަށް ތުހުމަތު ކުރަނީ އެތަނުގައި މަސައްކަތް ކުރާ އަންހެން މުވައްޒަފަކަށް ޖިންސީ ގޯނާ ކުރި ކަމަށެވެ. މިކަމާ ގުޅިގެން "ސަން" އަށް މައުލޫމާތު ދެއްވަމުން ފަޒީން ވިދާޅުވީ، އޭނާގެ މައްސަލައެއް މަޖިލީހުން ބަލަމުން އަންނަ ކަމަށެވެ. މައްސަލައާ ގުޅޭގޮތުން އިތުރަށް ވާހަކަ ދައްކާކަށް ފަޒީން ބޭނުމެއް ނުވެއެވެ. ކުރިން ރާއްޖެ ޓީވީގައި ނޫސްވެރިއެއްގެ ގޮތުގައި މަސައްކަތް ކުރެއްވި, ފަޒީން, ބްރޯޑްކޮމްގެ ނައިބު ރައީސްގެ މަގާމަށް އައްޔަނުކުރީ ނިމިދިޔަ އެމްޑީޕީ ސަރުކާރުގައެވެ.