ކުޑަކުއްޖަކާ މެދު ޖިންސީ އަމަލެއް ހިންގި ކަމަށް، ރައްޔިތުންގެ މަޖިލީހުގެ ކުރީގެ މަރަދޫ ދާއިރާގެ މެންބަރު ހަސަން އާދިލުގެ މައްޗަށް ދައުލަތުން އުފުލި ދައުވާ ސާބިތު ނުވާ ކަމަށް ހައި ކޯޓުން ވެސް ހުކުމްކޮށްފި އެވެ.
2011 ވަަނަަ އަަހަރު އާދިލްގެ މައްޗަށް 13 އަހަރުގެ ކުޑަކުއްޖަކާ ބެހުނުކަމުގެ ތުހުމަތު އާދިލްގެ މައްޗަށް ކުރި ނަމަވެސް ކްރިމިނަލް ކޯޓުން ނިންމީ އޭނާގެ މައްޗަށް ކުށް ސާބިތުނުވާކަމަށެވެ.
ކުޑަކުދިންނާ ބެހުމުގެ މައްސަލަތަކުގެ ޝަރީއަތްތަކަކީ ސިއްރުކޮށްގެން ކުރިއަށް ގެންދާ ޝަރީއަތްތަކެއް ކަމުން ހައި ކޯޓުން މިއަދު ދަށު ކޯޓުގެ ނިންމުމަށް ތާއީދުކޮށް ހުކުމްކުރި ނަމަވެސް އެ ހުކުމުގައި ފާހަގަކުރި ކަންތައްތައް ސާފުވާ ގޮތެއް ވަނީ ނުވެފަ އެވެ.
ނަމަވެސް އެނގިފައިވާ ގޮތުގައި ހައި ކޯޓުން މިއަދު ނިންމީ އެ މައްސަލަ ބެލި ފަނޑިޔާރުންގެ ބެންޗުގެ އަޣުލަބިއްޔަތުންނެވެ.
އާދިލްގެ މައްޗަށް އެ ކުށް ސާބިތުވި ނަމަ 10 އަހަރާއި 14 އަހަރާއި ދެމެދުގެ މުއްދަތެއްގެ ޖަލު ހުކުމެއް އޭނާއަށް އަންނާނެ އެވެ.