އުމަރު ނަސީރާއި އޭނާގެ ސަޕޯޓަރުންނަކީ މިއަދުވެސް ޕީޕީއެމްގެ ރައީސް މައުމޫން އަބްދުލްގައްޔޫމްގެ ސަޕޯޓަރުން ކަމަށް ޕީޕީއެމްގެ ކުރީގެ އިންތިގާލީ ނާއިބް ރައީސް އުމަރު ނަސީރު ވިދާޅުވެއްޖެ އެވެ.
ޖުމްހޫރީ ކޯލިޝަނާ ގުޅިވަޑައިގަތުމަށް ފަހު މިއަދު ބޭއްވި ނޫސްވެރިންގެ ބައްދަލުވުމުގައި އުމަރު ވިދާޅުވީ އޭނާގެ ޓީމުން އަދިވެސް ރައީސް މައުމޫނަށް ތާއީދު ކުރައްވާ ކަމަށާއި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމީން އުޅުއްވަނީ މައުމޫން އެކަހެރި ކުރައްވަން ކަމަށެވެ.
"ޝިފާގް މުފީދު ޕީޕީއެމް އިން ވަކިވެގެން ދެއްކެވި ވާހަކައިން ވެސް އަޅުގަނޑުމެންނަށް ޔަގީން ވެއްޖެ ޕީޕީއެމް ތެރޭގައި ޔާމީން ވަރަށް ބޮޑަށް އެބަ މަސައްކަތް ކުރާކަން ރައީސް މައުމޫން އެކަހެރި ކުރަން،" އުމަރު ވިދާޅުވި އެވެ.
އޭނާ ވިދާޅުވީ މައުމޫނާއި ޔާމީނާއި ދޭތެރޭ މިއަދު އޮތީ މައުމޫން ޑީއާރްޕީގައި އުޅުއްވި އިރު އެޕާޓީގެ ލީޑަރު އަހްމަދު ތަސްމީން އަލީއާ ދޭތެރޭ އޮތް ފަދަ ގުޅުމެއް ކަމަށެވެ.
ޔާމީނަށް ރިޔާސީ ޓިކެޓު ލިބިއްޖެ ނަމަ އެއްވެސް ބަޔަކު ޕީޕީއެމްއާ ކޯލިޝަން ނަހަދާނެ ކަމަށް މީގެ ކުރިން އޭނާ ދެއްކެވި ވާހަކަތައް މިއަދު ހަގީގަތަކަށް ވެފައިވާ ކަމަށް ވެސް އުމަރު ވިދާޅުވި އެވެ.
ޔާމީން ކެމްޕޭން ކުރައްވަނީ ޕީޕީއެމްއާ ނުގުޅި އަމިއްލަފުޅަށް ކެމްޕޭން ޖަގަހަތައް ހުޅުވައިގެން ކަމަށާއި ރިޔާސީ އިންތިޚާބު ޔާމީނަށް ކާމިޔާބު ނުކުރެވޭނެކަން ޔަގީންވާ ކަމަށް ވެސް އުމަރު ވިދާޅުވި އެވެ.
އޭނާ ވިދާޅުވީ ޔާމީންގެ އަމަލުތައް ހުރިގޮތުން މައުމޫން ވެސް އޭނާ އާ މެދު ހިތްހަމަޖެހިވަޑައިނުގަންނަވާ ކަމަށާއި ހީވާގޮތުގައި ޔާމީނަށް ތާއީދު ކުރައްވައިގެން މައުމޫން ހުންނެވީ ކޮއްކޯފުޅު ކަމަށްވާތީ ކަމަށެވެ.
އުމަރު ނަސީރު ޔާމީނަށް ފާޑުވިދާޅުވި އިރު އޭނާ ވަނީ ޔާމީނާ އެކު ޕީޕީއެމްގެ ރިޔާސީ ޕްރައިމަރީގައި ވާދަ ކުރައްވައި ބޮޑު ތަފާތަކުން ބަލިވެފަ އެވެ.
އުމަރު އިސްކޮށް ހުންނަވައިގެން އުފެއްދެވި އައިޑީޕީ އަމިއްލަ ފުޅަށް "އުވާލެއްވުމަށް" ފަހު ފުރަތަމަ ޑީއާރުޕީ އާ ގުޅިވަޑައިގަތީ "ކުޑަ އޮޑި ފައްތާލައި ބޮޑު އޮޑިއަށް" އެރުއްވީ ކަމަށް ވިދާޅުވެފަ އެވެ. ނަމަވެސް އެ ޕާޓީގެ ލީޑާޝިޕާ ދެމެދު ޖެހުނު މައްސަލައެއްގައި އޭނާ ވަނީ އެ ޕާޓީން ވަކިކޮށްފަ އެވެ. ހަމަ އެ ގޮތަށް އޭނާ ޕީޕީއެމް އިން ވެސް ފަހުން ވަނީ ކަނޑާލައިފަ އެވެ.
ސަން އަށް ކަށަވަރުވެފައިވާ ގޮތުގައި އުމަރު މިއަދު ޖޭޕީ އާ ގުޅިވަޑައިގަތީ "ޕާޓީއެއްގެ ދަރަޖައިގަ" އެވެ. އަދި ޖުމްހޫރީ ގުޅުމެއްގެ ސަރުކާރެއްގެ 15 ޕަސެންޓް އޭނާ އަށް ދޭ ގޮތަށެވެ.