މައުމޫން، ރައީސް ސޯލިހާ ބައްދަލުކުރައްވައިފި

ކުރީގެ ރައީސް މައުމޫން އަބްދުލްގައްޔޫމް، ރައީސް އިބްރާހިމް މުހައްމަދު ސޯލިހާއި މިއަދު ބައްދަލުކުރައްވައިފިއެވެ.
މިއަދު ރައީސް އޮފީހުގައި ބޭއްވި މި ބައްދަލުވުމަށްފަހު މައުމޫން ކުރެއްވި ޓްވީޓެއްގައި ވިދާޅުވީ ސަރުކާރު ކޯލިޝަނުގެ ބަދަހިކަން ދެމެހެއްޓުމަށް ރައީސް ސޯލިހު ކުރައްވާ މަސައްކަތްތަކަށް ޝުކުރު އަދާކުރައްވާ ކަމަށެވެ. އަދި މިއަދުގެ ބައްދަލުވުމުގައި މަޝްވަރާ ކުރެވުނު ހުރިހާ ކަންތައްތަކުގައި ދެ ފަރާތުގެ މެދުގައި އެއްގޮތް ހިޔާލުތަކެއް ހުރުމުން އެކަމާ އުފާކުރައްވާ ކަމަށްވެސް މައުމޫން ވިދާޅުވިއެވެ.
Thank you President YE @ibusolih for the honour and privilege of meeting you today and for your commitment to maintain and strengthen the Coalition. I am extremely happy that we had total agreement on all issues discussed. pic.twitter.com/QM5E3xsVMB
— Maumoon Abdul Gayoom (@maumoonagayoom) April 16, 2019
މިއީ ނިމިގެންދިޔަ ރައްޔިތުންގެ މަޖިލީހުގެ އިންތިހާބަށްފަހު މައުމޫން ރައީސް ސޯލިހާއި ބައްދަލުކުރެއްވި ފުރަތަމަ ފަހަރެވެެ. މައުމޫން އަކީ މިހާރު އުފެދިފައިވާ ކޯލިޝަން ދެމެހެއްޓުމަށް އެންމެ ބޮޑަށް މަސައްކަތް ކުރައްވާ އެއް ލީޑަރުވެސް މެއެވެ.
މަޖިލިސް އިންތިހާބުގެ ގޮނޑިތަށް ބެހުމުގެ މައްސަލާގައި ކޯލިޝަނުގައި ހިމެނޭ އެންމެ ބޮޑު ދެ ޕާޓީ ކަމަށްވާ އެމްޑީޕީ އާއި ޖުމްހޫރީ ޕާޓީއާ ދެމެދު ހިޔާލު ވަރަށް ބޮޑަށް ތަފާތުވެ ދެ ޕާޓީގެ އިސްވެރިންގެ މެދުގައި ބަހުގެ ހޫނު ހަމަލާތަކެއް ވެސް ރައްދުކޮށްފައިވެއެވެ.
އަދި އެންމެފަހުން މަޖިލިސް އިންތިހާބުގައި ޖުމްހޫރީ ޕާޓީން ވާދަކޮށްފައިވަނީ އިދިކޮޅު ޕީޕީއެމް އާއި ކޮންގްރެސް ޕާޓީއާ ގުޅިގެންނެވެ. ނަމަވެސް އިންތިހާބުގައި ޖޭޕީ އަށް ކާމިޔާބު ކުރެވުނީ އެންމެ ފަސް ގޮނޑިއެވެ. އެމްޑީޕީން ވަނީ 65 ގޮނޑި ކާމިޔާބުކޮށް މަޖިލީހުގެ މެޖޯރިޓީ ހޯދާފައެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ