އައްޑޫގެ ކަރަންޓުގެ މައްސަލައަށް ހައްލެއް ނުލިބި ދިގުލައިގެން ގޮސް ރައްޔިތުންނަށް ބޮޑެތި ގެއްލުންތަކެއް ލިބެމުންދާތީ، މިމައްސަލަ ހައްލުކުރުމަށް މިހާތަނަށް އެސްޔުއެލް އާއި އެކުންފުނީގެ ބެލެނިވެރި ފެނަކަ ކޯޕަރޭޝަނުން އެކަށީގެންވާ އެއްބާރުލުމެއް ދީފައި ނުވާތީ އެކަން ބަަލައިދިނުމަށް ކައުންސިލުން ރައްޔިތުންގެ މަޖިލިސްގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީއަށް ހުށަހެޅުމަށް ތައްޔާރުވަމުން އަންނަކަމަށް ކައުންސިލުން ބުނެފިއެވެ.
އައްޑޫގެ މޭޔަރ އަބްދުﷲ ސޯދިޤް(ސޯބެ) މިއަދު ވިދާޅުވީ އައްޑޫން ކަރަންޓް ކެޑުމުގެ މައްސަލަ ހައްލުކުރުމުގައި އެސްޔޫއެލް އާއި ފެނަކައިން އިހްމާލުވެފައިވާތީ އެކަން ހިގަމުންދާގޮތް ބަލައި ދިނުމަށް މަޖިލިސްގެ ސަރުކާރުގެ މަސްއޫލިއްޔަތު އަދާކުރާ ކޮމެޓީއަށް ހުށަހެޅުމަށް ނިންމާފައިވާ ކަމަށެވެ.
ސޯބެ ވިދާޅުވީ މާދަމާގެ ވަގުތެއްގައި މައްސަލަ ކޮމެޓީއަށް ހުށަހެޅޭނެކަމަށެވެ.
"އައްޑޫގެ ކަރަންޓްގެ މައްސަލަ ހައްލުކުރުމަށް އެސްޔޫއެލް އިން ކުރަމުން އަންނަ މަސައްކަތެއް އަޅުގަނޑުމެންނަކަށް ނޭގެ، ރައްޔިތުން ދުވާލާއި ރޭގަޑު ތިބެން މި ޖެހެނީ ކަރަންޓާއި ނުލައި، އެހެންވެ މާދަމާ ކޮމެޓީއަށް މައްސަލަ ހުށަހެޅުމަށް މިއަންނަނީ ތައްޔާރުވަމުން" ސޯބެ ވިދާޅުވިއެވެ.
ސޯބެ އިތުރަށް ވިދާޅުވީ ފާއިތުވި ދުވަސްތަކުގައި އައްޑޫ ރައްޔިތުން ކަނު އަދިރީގައި އުޅެންޖެހިފައި ވީއިރު އެސްޔޫއެލް އިން އިންޖީނުތަކަށް ދިމާވެގެން އުޅޭ މައްސަލައިގައި އެކަށީގެންވާ ޖަވާބެއް ދީފައި ނުވާކަމަށެވެ.
ސޯބެ ވިދާޅުވީ މަޖިލިސްގެ ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމެޓީއަށް ހުށަހަޅާ އަނެއް މައްސަލައަކީ އައްޑޫގެ މަގުތައް ހެދުމުގައި އެސްޔުއެލް އިހްމާލުވެފައިވާ މައްސަލައެެވެ.
"އައްޑޫގެ މަގުތައް މަރާމާތު ކުރުން ވެސް މިއޮންނަނީ އެސްޔޫއެލްގެ ދަށުގައި، މަގުތައް ހަލާކުވެ ނެތިގެންދާއިރުވެސް އެތަން ނުބެލެހެއްޓޭ. މިގެ ސަބަބުން ވެސް އާއްމު ރައްޔިތުންނަށް ވަރަށް އުދަނގޫވޭ"
ސޯބެ ވިދާޅުވީ ކަރަންޓާއި، ބޯފެނާއި، ނަރުދަމާ، އަދި މަގު މަރާމާތުކޮށް ބެލެހެއްޓުމުގެ ހުރިހާ ޒިއްމާއެއް ގާނޫނު އަސާސީން ކައުންސިލަށް ލިބިދީފައިވަނިކޮށް އެހުރިހާ ކަމެއް އެސްޔޫއެލްގެ ބެލުމުގެ ދަށައްގެންގޮސް ރައްޔިތުންނަށް ބޭނުންވާ ހިދްމަތް ފޯރުކޮސް ނުދިނުމަކީ ބޮޑު މައްސަލައެއް ކަމަށެވެ.
ސޯބެ ވިދާޅުވީ ސަރުކާރުން އެސްޔޫއެލްއަށް ދައްކަންޖެހޭ ކަރަންޓް ބިލްތަކެއް އެބަހުރިކަމަށެވެ. އެގޮތުން އީސީސީ އާއި އަދިވެސް އެފަދަ ބައެއް ތަންތަނުން ދައްކަން ޖެހޭ ކަރަންޓްބިލްގެ ފައިސާ އެސްޔޫއެލް އަށް ނުދައްކާ ކަމަށެވެ. ނަމަވެސް އެ ބިލްތަކަކީ ކައުންސިލުން ދައްކަން ޖެހޭ ބިލުތަކެއް ކަމަށް ބުނެ ފެނަކައިން ދައްކާ ވާހަކަތަކަކީ އެއްވެސް އަސްލެއް ނެތް ވާހަކަތައް ކަމަށް ވިދާޅުވިއެވެ.
ސޯބެ ވިދާޅުވީ މަޖިލިސްގެ ކޮމެޓީއަށް ހުށަހެޅުމަށް ފަހު އަދި އެމައްސަލަ ބަލައިދިނުމަށް އެދި ކޯޓަށްވެސް ދާނެކަމަށެވެ.
އައްޑޫގެ މަރުކަޒީ އިންޖީނުގޭގެ ބައެއް ޖަނަރޭތަރު ތަކަށާއި ހުޅުމީދޫ އިންޖީނުގޭގެ ޖަނަރޭޓަރުތަކަށް ދޭންޖެހޭ ސާވިސް ބަރާބަރަށް ނުދެވި ގިނަ ދުވަސްތަކެއް ވުމުގެ ސަބަބުން ޖަނަރޭޓަރުތަކަށް އަންނަނީ ބޮޑެތި މައްސަލަތައް ދިމާވަމުންނެވެ.
އަދި އެމައްސަލަ ހައްލު ކުރުމަށް ފެނަކައިން މަސައްކަތް ކުރަމުން އަންނަ އިރު މި މައްސަލައަށް ދާއިމީ ހައްލެއް ލިބޭނީ ރޯދަ އާއި ހިސާބަށްކަމަށް ފެނަކައިން ވަނީ ބުނެފައެވެ.