ޖޭއެސްސީގައި ހުންނަވާ ރައީސުލްޖުމްހޫރިއްޔާގެ މެމްބަރު މުހައްމަދު ސަލީމް (ރޭނިސް ސަލީމް) ޖިނާއީ މައްސަލައެއްގެ ތުހުމަތުގައި ފުލުހުންގެ ތަހުގީގަކަށް މިއަދު ޕޮލިހަށް ހާޒިރުކުރަން ނިންމައިފި އެވެ.
ފުލުހުންގެ މީޑިއާ އޮފިޝަލަކު ވިދާޅުވި ގޮތުގައި ސަލީމް ހާޒިރުވެވަޑައިގަތުމަށް އަންގާފައިވާނީ ހަވީރު 3:00 އަށެވެ. ނަމަވެސް އެ މައްސަލައިގެ އިތުރު އެއްވެސް ތަފްސީލެއް އޭނާ ނުދެއްވަ އެވެ.
"ހަވީރަ"ށް އެނގިފައިވާ ގޮތުގައި ސަލީމްގެ މައްޗަށް ކުރަނީ ގޭންގް ގުރޫޕެއް ބޭނުންކޮށްގެން ކުށްތަކެއް ހިންގި ކަމުގެ ތުހުމަތެވެ. އޭގެ ތެރޭގައި ބިރު ދައްކައިގެން ފައިސާ ހޯދުމުގެ މައްސަލަ ވެސް ހިމެނޭ ކަމަށް ވަނީ އެނގިފަ އެވެ.
ސަލީމުގެ މައްޗަށް ކުރާ ތުހުމަތާ ގުޅިގެން މިހާރު ތިން މީހަކު ވަނީ ހައްޔަރުކޮށްފަ އެވެ. އޭގެ ތެރޭގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު ޑރ. އަފްރާޝީމް އަލީ އަވަހާރަކޮށްލަން ރޭވި ކަމަށް، އެ މައްސަލާގައި ދައުވާ ލިބޭ ހުސެން ހުމާމު ބުނާ އަޒްލިފް ރައޫފު ވެސް ހިމެނެ އެވެ.
އަޒްލިފް ބުރާސްފަތި ދުވަހު ހައްޔަރުކުރީ އަފްރާޝީމްގެ މަރާ ގުޅިގެން ނޫން ކަމަށް ފުލުހުން ވަނީ ބުނެފަ އެވެ.
މިކަމާ ބެހޭ ގޮތުން ސަލީމުގެ ބަހެއް އަދި ނުލިބެ އެވެ.