"ހަވީރު"ގެ ނޫސްވެރިންނަކީ 24 ގަޑިއިރު ބުރަކޮށް މަސައްކަތުގައި އުޅެމުން ވެސް ބަދަހި ގުޅުމެއް ބާއްވަައި، އެކުވެރި ޓީމެއްގެ ގޮތުގައި ކުރިއަށް ދާން އަޒުމް ކަނޑައަޅާފައިވާ ބައެކެވެ. އެކަމަކު މިހާރު ކުޑަ މާޔޫސްކަމަކާ ކުރިމަތިލާން ޖެހިއްޖެ އެވެ. އެންމެ ޒުވާން އަދި ހުނަރުވެރި އެއް ލިއުންތެރިޔާ އަލީ ނާފިޒްގެ ދިރިއުޅުމަށް އަންނަ ބޮޑު ބަދަލަކާ ގުޅިގެން، އަންނަ އާދިއްތަދުވަހު އޭނާ ކިޔުބާ އަށް ފުރާނެ އެވެ. ކިއުބާގެ ނޫސްވެރިޔަކާ ކައިވެނިކޮށް ޒަވާޖީ ހަޔާތެއް ފެށުމުގެ މި ދަތުރަށް ފެށުމުގެ ކުރިން މިއަދު "ހަވީރު" ނޫސްވެރިން އޭނާ އަށް ހެޔޮއެދުންތައް ރައްދުކުރި އެވެ. ނާފިޒްގެ ފެއާވެލްގައި ނޫސްވެރިންގެ ފަރާތުން އެޑިޓަރު މޫސަ ހަދިޔާއެއް ހަވާލްކޮށްދެއްވަނީ. --ހަވީރު ފޮޓޯ: ނިޝާން އަލީ ހަވީރު ނިއުސްރޫމްގެ މަސައްކަތް މިއަދު ފެށީ ހެނދުނުގެ ސަޔާ އެކު ޒުވާން ނޫސްވެރިޔާ އަށް ބޭއްވި ފެއާވެލް ޕާޓީންނެވެ. ކިއުބާ އަށް ދިރިއުޅުން ބަދަލުކުރަން ނާފިޒް ނިންމުމުން "ހަވީރު"ގެ ހުރިހާ ނޫސްވެރިން ވެސް ދެރަވި އެވެ. އެކަމަކު އޭނާގެ ވަކިވުމަކީ "ހަވީރާ" އެކު އޮތް ގުޅުން ކަނޑާލުމެއް ނޫނެވެ. އޭގެ ބަދަލުގައި "ހަވީރު"ގެ ފުލްޓައިމް ލިއުންތެރިއެއްގެ ގޮތުން ކިއުބާގައި ހުރެ ނާފިޒްގެ މަސައްކަތް ކުރިއަށް ގެންދާނެ އެވެ. "ނާފިޒަކީ ރާއްޖޭގެ ނޫސްވެރިކަމުގެ ތާރީހުގައި އެމެރިކާ ސަރަހައްދުގައި ބަހައްޓާ ރާއްޖޭގެ ވެސް އަދި ހަވީރުގެ ވެސް ފުރަތަމަ ކޮރެސްޕޮންޑެންޓް،" އެޑިޓަރު މޫސާ ލަތީފު، ސަމާސާ ރާގެއްގައި، ވިދާޅުވި އެވެ. ނޫސްވެރިއެއްގެ ގޮތުގައި މިހާތަނަށް ކޮށްދީފައިވާ މަސައްކަތުގެ އަގު ވަޒަންކޮށް، މުޅި "ހަވީރު"ގެ ނަމުގައި މޫސަ ވަނީ ނާފިޒަށް ޝުކުރު އަދާކުރައްވައިފަ އެވެ. އަދި ނާފިޒަކީ ރާއްޖޭގައި އުފެދުނު ނޫސްވެރިންގެ ތެރޭގައި ހިމެނޭ އިނގިރޭސި އާއި ދިވެހިން ވެސް މޮޅަށް ލިޔާ، ކުޅަދާނަ ލިއުންތެރިއެއްކަން މޫސަ ފާހަގަކުރެއްވި އެވެ. ނާފިޒު ފުރުމުގެ ކުރިން "ހަވީރު"ގެ ފަޒީނާ އަހުމަދު (ކ)، އައިމިނަތު ޝިފްލީން، އަދި ފޮޓޯގްރާފަރު ނިޝާން އަލީ (ވ) އެންމެ ފަހުގެ ސެލްފީ ނަގަނީ "ކިއުބާ އަށް ދިރިއުޅުން ބަަދަލުކުރިއަސް ނާފިޒް ހަވީރާ ވަތްކެއް ނުވާނެ. ނާފިޒް ބަދަލުވުމުން "ހަވީރަ"ށް ބޮޑެތި ކުރިއެރުންތައް ވެސް ލިބޭނެ، އެއީ އަހަރެމެން ނިދާ ގަޑީގައި ނާފިޒު ހުންނާނީ ހޭލައި، މަސައްކަތުގައި،" ކިއުބާ އާއި ރާއްޖެއާ ދެމެދު އޮންނަ ގަޑީގެ ބޮޑު ފަރަގަށް އިޝާރަތްކުރައްވާ މޫސަ ވިދާޅުވި އެވެ. "ނާފިޒުގެ މޮޅު، ހިތްގައިމު ލިއުންތައް ހަވީރުގެ ކިއުންތެރިންނާ ހަމައަށް ގެނެސްދޭނެ، އިރާދަކުރެއްވިއްޔާ." ނޫސްވެރިއެއްގެ ގޮތުގައި ނާފިޒް މިހާތަނަށް ހޭދަކުރި ހަ އަހަރުގެ ތެރޭގައި އޭނާ ވަނީ އެކި ދާއިރާތަކުން މުހިއްމު ހަބަރުތަކާއި ރިޕޯޓްތައް ލިއެފަ އެވެ. ސްރީ ލަންކާގައި ނޫސްވެރިކަމުގެ ރޮނގުން ޑިޕްލޮމާ އަށް ކިޔަވާފައިވާ އަދި މިދިއަ އަހަރު އިންޑިއާގައި، ދުނިޔޭގެ އެކި ގައުމުތަކުގެ ނޫސްވެރިންނަށް ބޭއްވި ތިން މަސް ދުވަހުގެ ކޯހުން އެއް ވަނަ ހޯދި ނޫސްވެރިޔާގެ ލިއުންތެރިކަމުގެ ސްޓައިލް ވެސް ރާއްޖޭގެ ގިނަ ނޫސްވެރިންނާ ތަފާތުކަން "ހަވީރު"ގެ އެޑިޓަރުން ފާހަގަކުރެ އެވެ.